Abi a srefi fasi fu denki leki di fu Yesus
1. Sortu fasi fu denki Yesus ben sori?
1 Aladi wi no si a Manpikin fu Gado noiti, toku nanga yepi fu den sani di skrifi fu a libi nanga a diniwroko fu Yesus, wi kon kisi lobi gi en trutru (1 Petr. 1:8). Fu di Yesus ben gi yesi na a wani fu en Tata, meki a gowe libi en hei posisi na ini hemel èn a ben kon na grontapu. Leki wan libisma, a ben preiki gi trawan sondro fu denki ensrefi èn a ben gi en libi abra fu a bun fu libisma (Mat. 20:28). A Wortu fu Gado e gi wi a deki-ati: „Tan abi a srefi denki disi di Krestes Yesus ben abi tu.” Fa wi kan gi wisrefi, neleki fa Yesus ben du dati?—Fil. 2:5-8.
2. Sortu tyalensi furu Kresten abi, èn san kan yepi den fu kakafutu gi a tyalensi dati?
2 Te wi weri: Aladi Yesus ben de volmaakti, toku a ben e weri son tron. Na wan spesrutu okasi, a ben gi finifini kotoigi na wan Samaria uma aladi ’a ben weri srefisrefi fu a waka di a ben teki’ (Yoh. 4:6). Furu Kresten na ini a ten disi abi a srefi tyalensi. Te yu weri fu di yu wroko heri wiki, dan a kan de wan tyalensi fu feni krakti fu go na ini a preikiwroko. Ma efu wi du dati doronomo, dan wi sa si taki a Kresten diniwroko e gi wi krakti baka na yeye fasi.—Yoh. 4:32-34.
3. Fa wi kan de klariklari fu gi trawan leri, neleki Yesus?
3 Na wan tra okasi, Yesus nanga den disipel fu en ben de na pasi fu go na wan presi pe nowan tra sma ben de, so taki den ben kan rostu pikinso. Ma wan bigi ipi sma ben kon sabi dati èn den ben lon go drape fu go miti den, fosi den ben doro drape. Na presi fu atibron, Yesus ben „firi sari gi den” èn a ben go doro fu „leri den furu sani” (Mark. 6:30-34). Te wi e bigin wan bijbelstudie, èn te wi e hori wan bijbelstudie, dan wi musu abi a srefi fasi fu denki. Disi wani taki dati wi musu tan meki muiti èn wi musu abi trutru lobi gi sma. Efu yu no abi wan bijbelstudie ete, tan meki muiti fu feni wan.
4. Fa a yepi-pionierwroko kan yepi wi fu abi a srefi fasi fu denki leki di fu Krestes?
4 Poti yeye afersi na a fosi presi: A yepi-pionierwroko kan yepi wi fu de nanga ala wi prakseri na yeye afersi. Wan yongu sisa ben skrifi: „A mama fu wan mati fu mi ben gi wi alatu a deki-ati fu go wán mun na ini a yepi-pionierwroko makandra nanga en. Mi breiti trutru taki wi du dati makandra nanga en. Mi ben prisiri fu di mi kon sabi den brada nanga sisa moro bun, èn heri esi mi bigin si den leki mi famiri. Mi ben feni en wan prisiri sani tu fu abi moro okasi fu fruteri tra sma fu Yehovah èn fu leri den sma disi den tumusi moi tru tori fu a Kownukondre. Ala den sani disi meki mi kisi wan moro bun banti nanga Yehovah, èn nanga en organisâsi.”—Ps. 34:8.
5. Fu san ede wi musu tan meki muiti fu abi a srefi fasi fu denki leki di fu Yesus?
5 Wi alamala abi fu du nanga wan strei di de na mindri wi sondu skin èn a wani di wi abi fu plisi Yehovah (Rom. 7:21-23). Wi musu kakafutu gi a denki fu grontapu di wani taki wi no musu strei (Mat. 16:22, 23). Yehovah kan yepi wi fu du dati nanga yepi fu en santa yeye (Gal. 5:16, 17). Now wi e wakti fu kisi frulusu èn fu go na ini a regtfardiki nyun grontapu fu Gado. Aladi wi e du dati, meki wi abi a srefi fasi fu denki leki di fu Yesus, fu di wi e poti Kownukondre afersi èn den afersi fu tra sma na a fosi presi na ini wi libi.—Mat. 6:33; Rom. 15:1-3.