Sori taki yu abi faya gi a pionierwroko
1. Fa wan sma kan sori taki a abi faya gi a pionierwroko?
1 Awinsi den e dini leki pionier now, noso awinsi den no man du dati, toku ala Kownukondre preikiman kan sori taki den abi faya gi a pionierwroko. Den alamala wani gi yesi trutru na a komando di den kisi fu preiki èn fu meki disipel (Mat. 28:19, 20; Tori. 18:5). Den e broko den ede nanga sma èn den e du ala san den man fu du a diniwroko fu den (Mat. 9:36; Tori. 20:24). Den futuboi fu Yehovah de klariklari fu du ala san de fanowdu fu yepi trawan fu kon leri sabi a waarheid (1 Kor. 9:19-23). Meki wi go luku wan eksempre fu wan sma di ben abi a faya dati, namku Filipus, a preikiman fu a bun nyunsu.
2. Fa owruman nanga dinari ini a diniwroko kan waka baka na eksempre fu Filipus di ben abi faya gi a preikiwroko?
2 Preiki èn gi leri: Filipus ben abi bigi frantwortu na ini a fosi yarihondro gemeente (Tori. 6:1-6). Ma na a fosi presi a ben de wan fayafaya preikiman fu a bun nyunsu (Tori. 8:40). We, na ini a ten disi, owruman nanga dinari ini a diniwroko kan sori taki den abi faya gi a pionierwroko te den e teki fesi fayafaya na ini a preikiwroko, aladi den e tyari den frantwortu di den kisi. Disi e gi a gemeente deki-ati nanga krakti trutru!—Rom. 12:11.
3. Fa wi kan sori taki wi abi faya gi a pionierwroko, aladi wi e kisi tesi?
3 Baka a dede fu Stefanus, dan wantronso den disipel bigin kisi hebi frufolgu èn dati ben bruya den libi trutru. Ma Filipus ben tan preiki, èn a ben de wan bigi yepi fu bigin a preikiwroko na mindri den Samariasma (Tori. 8:1, 4-6, 12, 14-17). Wi kan waka baka na eksempre fu en fu di wi e tan fruteri sma a bun nyunsu awinsi wi e kisi tesi, èn fu di wi e preiki gi ala sortu sma di wi e miti.—Yoh. 4:9.
4. Sortu eksempre Filipus gi wi nanga a fasi fa a ben e gi leri?
4 Filipus ben de wan bun leriman fu Gado Wortu, èn dati de krin fu si ini a tori fu na eunuch fu Etiopia di ben teki a Kresten bribi (Tori. 8:26-38). Wan tra fasi fa wi kan sori taki wi abi faya gi a pionierwroko na te wi e leri fu ’gebroiki den Buku fu Bijbel fu taki-go-taki-kon’ nanga sma (Tori. 17:2, 3). Neleki Filipus, wi e suku fu prati a bun nyunsu na ala presi pe sma de èn na ibri okasi di fiti.
5. San kan yepi Kresten papa nanga mama fu gi den pikin fu den deki-ati fu kisi faya gi a pionierwroko?
5 Osofamiri nanga gemeente: A no de fu taki dati a fasi fa Filipus ben e denki èn sosrefi na eksempre di a ben e gi, ben abi bun krakti tapu den umapikin fu en (Tori. 21:9). Na a srefi fasi, papa nanga mama di e poti Kownukondre afersi na a fosi presi na ini den libi, e gi den pikin fu den deki-ati fu du dati tu. Te wan papa noso mama e preiki fayafaya gi tra sma, aladi a weri na a kaba fu a wiki, dan dati kan abi furu krakti tapu na ati fu a pikin èn a pikin no sa frigiti dati noiti.—Odo 22:6.
6. Fa wi kan sori taki wi e warderi den pionier na ini a gemeente fu wi?
6 Paulus nanga Lukas ben de fayafaya Kresten di ben e wroko tranga na ini a diniwroko fu Yehovah, èn Filipus ben teki den na ini en oso (Tori. 21:8, 10). Fa wi kan sori taki wi e warderi èn e horibaka gi den wan di e wroko fayafaya na ini a ten disi? Kande wi kan aksi den pionier fu wroko nanga den na wan mamanten noso na wan bakadina te furu preikiman no e go na ini a preikiwroko (Fil. 2:4). Wi kan gi den wan kari tu fu kon na wi oso, so taki wi kan gi makandra deki-ati. Meki wi alamala du muiti fu sori taki wi abi faya gi a pionierwroko, awinsi fa a situwâsi fu wi de.