Filipus—Wan Fayafaya Evangelie Preikiman
BIJBEL abi furu tori fu mansma èn umasma di ben abi wan bribi di trawan kan waka na baka. Luku Filipus, wan Kresten zendeling fu a fosi yarihondro. A no ben de wan apostel, ma toku den ben gebroiki en bun fu panya a Kownukondre boskopu. Fu taki en leti, sma ben kon sabi Filipus leki „na evangelie preikiman” (Tori fu den Apostel 21:8). Fu san ede Filipus ben abi a nen dati? Èn san wi kan leri fu en?
Na ini den tori fu Bijbel wi e yere fu Filipus syatu baka a Pinksterfesa fu 33 G.T. Na a ten dati den Dyu di ben e taki Grikitongo ben bigin krutu nanga den Dyu di ben e taki Hebrewtongo, èn den ben taki dati den ben frigiti den weduwe fu den te na aladei nyanyan ben e prati. Den apostel ben gi ’seibi man di abi wan bun nen’ a wroko fu lusu a problema. Filipus ben de wan fu den man disi di den ben teki.—Tori fu den Apostel 6:1-6.
Den seibi man disi ben „abi wan bun nen”. A vertaling fu James Moffatt e taki tu dati den ben „abi a lespeki fu sma”. Iya, di den ben poti na wroko, dan sma ben sabi den kaba leki man di ben abi yeyefasi èn di man sidon denki sani bun. Na so a de tu nanga den sma di de Kresten opziener na ini a ten disi. Den no e poti den man dati na wroko tumusi esi (1 Timoteus 5:22). Den musu abi „wan bun kotoigi fu den sma na dorosei”, èn kompekresten musu sabi taki den de reidelek èn taki den abi wan krin frustan.—1 Timoteus 3:2, 3, 7; Filipisma 4:5.
Buweisi de taki Filipus ben du a wroko di a ben kisi na Yerusalem, bun. Ma syatu baka dati, wan bigi frufolgu ben kon èn dati ben panya den bakaman fu Krestes. Neleki tra sma, Filipus ben gowe libi a foto, ma a diniwroko fu en no ben tapu. Syatu na baka, a ben bigin preiki na ini wan nyun kontren — Samaria.—Tori fu den Apostel 8:1-5.
A E Opo Nyun Kontren
Yesus ben taki na fesi dati den disipel fu en ben o preiki „na Yerusalem èn na heri Yudea nanga Samaria èn te na a moro farawe pisi fu grontapu” (Tori fu den Apostel 1:8). Fu di Filipus ben e preiki na Samaria, meki a ben yepi fu meki den wortu dati kon tru. Moro furu fu den Dyu ben fru-akti den Samariasma. Ma Filipus no ben desko den sma disi, èn Gado ben blesi en fu di a no ben e teki sma partèi. Iya, furu Samariasma ben kisi dopu, so srefi wan man di ben nen Simon èn di ben de wan towfruman fosi.—Tori fu den Apostel 8:6-13.
Baka wan pisi ten, na engel fu Yehovah ben seni Filipus go na a sabanapasi di ben waka fu Yerusalem go na Gasa. Drape Filipus ben si wan asiwagi nanga wan tiriman fu Etiopia na tapu di ben e leisi nanga wan tranga sten na ini a profeititori fu Yesaya. Filipus ben lon na sei na asiwagi èn a ben bigin taki nanga a man. Ala di na Etiopiaman ben de wan proseliet di ben sabi wan tu sani fu Gado èn fu Bijbel, toku a ben erken na wan saka fasi taki a ben abi yepi fanowdu fu frustan san a ben leisi. Dati meki a ben aksi Filipus fu kon na tapu na asiwagi èn kon sidon nanga en. Baka di Filipus ben gi en kotoigi, dan den ben doro wan pisi watra. „San e tapu mi fu teki dopu?”, na Etiopiaman ben aksi. Filipus ben dopu en wantewante, èn na Etiopiaman ben gowe nanga prisiri. A kan taki a nyun disipel disi ben panya a bun nyunsu di a ben doro baka na en kondre.—Tori fu den Apostel 8:26-39.
San wi kan leri fu a diniwroko fu Filipus di ben abi fu du nanga den Samariasma èn a tiriman fu Etiopia? Noiti wi musu denki taki sma di abi wan sortu nationaliteit, ras, noso posisi no sa abi belangstelling gi a bun nyunsu. Na presi fu dati, wi musu meki a Kownukondre boskopu bekènti na „ala sortu sma” (1 Korentesma 9:19-23). Efu wi e gi wisrefi fu preiki gi ala sma, dan Yehovah kan gebroiki wi fu du a wroko fu „meki disipel fu sma fu ala nâsi” bifo a kaba fu a godelowsu seti fu sani disi e kon.—Mateus 28:19, 20.
Moro Grani gi Filipus
Baka di Filipus ben preiki gi na Etiopia tiriman, dan a ben gi kotoigi na Asdod, „èn a ben waka na ini a heri kontren èn ben tan preiki a bun nyunsu na ala den foto te leki a ben doro Cesarea” (Tori fu den Apostel 8:40). Na ini a fosi yarihondro, furu heiden sma ben libi na ini den tu foto disi. A kan, taki Filipus ben preiki na ini den prenspari Dyu foto soleki Lida nanga Jòpe, di a ben de fu go na a noordsei fu Cesarea. Kande dati meki disipel ben de baka ten na ini den kontren disi.—Tori fu den Apostel 9:32-43.
A lasti leisi di den e taki fu Filipus de so wan 20 yari baka dati. Na a kaba fu Paulus en di fu dri zending waka, Paulus ben teki sipi na Ptolemais. „A tra dei”, na so Lukas di ben reis makandra nanga Paulus ,ben taki, „wi ben teki pasi e gowe èn wi ben doro na Cesarea, èn wi go na ini na oso fu Filipus, na evangelie preikiman.” Na a ten dati, Filipus ben abi „fo umapikin, yonguwenke, di ben taki profeititori”.—Tori fu den Apostel 21:8, 9.
Soleki fa a sori, dan Filipus ben e libi na Cesarea. Ma a no ben lasi a lobi gi a zendingwroko, bika Lukas e kari en „na evangelie preikiman”. Moro furu den wortu disi wani taki fu wan sma di gowe libi en oso fu go preiki a bun nyunsu na ini kontren pe sma no wroko ete. Taki Filipus ben abi fo umapikin di ben taki profeititori e sori taki den ben waka baka a papa fu den di ben de fayafaya.
Kresten papa nanga mama na ini a ten disi musu hori na prakseri taki den pikin fu den na den moro prenspari disipel fu den. Srefi efu den papa nanga mama dati musu skoifi theokrasia grani na wan sei fu di den abi osofamiri frantiwortu, toku den kan tan de futuboi fu Gado di e dini nanga den heri ati, neleki Filipus, èn de papa nanga mama di de wan bun eksempre.—Efeisesma 6:4.
Di Paulus nanga den kompe fu en ben go na a osofamiri fu Filipus, dan dati ben gi na osofamiri wan moi okasi fu sori taki den ben lobi fu ontfanga sma. ¡Prakseri a deki-ati di den ben gi makandra! Kande a ben de na a okasi disi taki Lukas ben tyari den finifini pisi fu den sani di Filipus ben du kon na wán, soleki fa dati ben skrifi baka ten na ini Tori fu den Apostel kapitel 6 nanga 8.
Yehovah Gado ben gebroiki Filipus furu fu horibaka gi Kownukondre afersi. A faya fu Filipus ben meki taki a ben man panya a bun nyunsu na ini nyun kontren èn meki a situwâsi na en oso abi wan bun yeyefasi. ¿Yu ben sa wani kisi den srefi grani nanga blesi? Dan a ben sa bun fu abi densrefi eigifasi di Filipus na evangelie preikiman ben abi.