Wi musu abi lespeki gi Yehovah en tirimakti
San yu e prakseri te yu e leisi den nen disi fu owruten; Korak, Datan, nanga Abiram? Sma di opo densrefi teige tirimakti! A tirimakti fu suma? Den opo densrefi teige a tirimakti fu Gado. Den finifini tori fu na ogri fasi fa den ben handri, skrifi na ini Numeri kapitel 16, èn na artikel di nen „Saka yusrefi na wan getrow fasi na ondro a tiri di Gado poti”, di de fu feni na ini A Waktitoren fu 1 augustus 2002, e fruklari a kapitel disi. A ben o bun efu yu ben sa leisi na artikel disi bifo yu luku a video Heb respect voor Jehovah’s autoriteit (Abi lespeki gi Yehovah en tirimakti). A video disi sa gi yu deki-ati fu prakseri dipi fu a tori. Yu sa si sortu trobi bigin na mindri den getrow manpikin fu Korak, nanga a papa fu den di ben opo ensrefi teige den wan di ben kisi frantwortu. Korak ben de fu go strei teige A Moro Heiwan fu hemel nanga grontapu (Num. 26:9-11). A drama disi di abi fu du nanga sani di pasa trutru, musu gi wi alamala deki-ati fu tan getrow na Yehovah dorodoro.
Te yu e luku a video, dan luku efu yu kan si san na den siksi prenspari sani di Korak nanga den bakaman fu en ben du, di e sori taki den no ben de getrow: (1) Fa den ben wisiwasi a tirimakti fu Gado? (2) Fa a du kon taki den ben kisi bigifasi, taki den bigin feti fu kisi makti, èn taki den ben dyarusu? (3) Fa den ben suku fowtu na den wan di Yehovah ben gi frantwortu? (4) Na sortu fasi den ben e kragi? (5) Fu san ede den no ben de tevrede moro nanga den grani di den ben abi? (6) Fu san ede den ben tan getrow na den famiri nanga mati fu den, na presi taki den tan getrow na Yehovah Gado?
Luku fa den sani di wi leri na ini a Bijbel drama disi abi fu du nanga a fasi fa wi e si a tirimakti fu Gado na ini a ten disi: (1) Fa wi musu handri te den owruman na ini a gemeente e teki bosroiti, èn fu san ede wi musu handri na a fasi dati? (2) Fa wi kan kakafutu gi ibri takru prakseri di wi abi? (3) Fa wi musu handri te wi e si den fowtu fu den wan di kisi a frantwortu fu teki fesi? (4) San wi musu du te wi si taki wi e bigin kragi na ini wi ati? (5) Fa wi musu denki fu iniwan grani di wi kisi? (6) Efu wi wani tan loyaal na Gado, dan suma no kan de moro prenspari gi wi, èn na sortu momenti disi kan de wan bigi tesi gi wi?
Unu no denki taki a ben o bun fu luku a video disi ete wan tron, baka te unu taki fu en na ini a gemeente? Meki a video disi yepi yu fu frustan moro bun fu san ede wi musu lespeki a tirimakti fu Yehovah ala ten!—Ps. 18:25; 37:28.