Schema gi na osofamiri—Na osofamiri studie
1 A moro warti gudu di yu leki Kresten papa noso mama kan gi den pikin fu yu, na fu leri den fu lobi Yehovah neleki fa yu lobi en. Wan prenspari fasi fa yu kan du dati, na „te yu e sidon na ini yu oso” fu hori na alawiki osofamiri studie (Deut. 6:5-7). Efu yu na wan papa, noso wan mama di abi wan patna di no de na bribi, efu yu e libi na ini wan osofamiri pe ala sma no abi a srefi bribi, noso efu yu no abi wan trowpatna, toku yu kan yepi yu pikin fu tron bun mati fu yu èn fu kon krosibei na Yehovah nanga yepi fu wan osofamiri studie di e hori doronomo.
2 Fa yu kan bigin hori wan osofamiri studie: A fosi sani di musu pasa, na taki unu leki osofamiri musu kisi a gwenti fu studeri makandra. Efu yu no sabi seiker o ten yu musu hori a studie, dan kande yu kan taki nanga na osofamiri fu luku o ten unu kan du dati (Odo 15:22). Efu yu abi yongu pikin, dan kande yu ben sa wani fu hori wan tu syatu studie na ini a wiki. Luku sortu schema e wroko moro bun gi yu osofamiri. Poti wan spesrutu ten gi a studie èn skrifi dati na tapu a schema gi na osofamiri. Abi a fasti bosroiti fu hori yusrefi na a schema.
3 San yu ben sa kan studeri? Son osofamiri e studeri a pisi di den sa luku na a Gemeente Bukustudie noso den e hori a Waktitoren-studie. Trawan e studeri den buku di meki spesrutu gi yonguwan. Wan papa di abi wan pikin boi nanga wan pikin meisje, ben taki: „Wan sani di e meki taki den pikin e feni taki a studie fu a wiki span, na fu di wi e prei leki wi na den sma na ini den pisi tori fu Mi boekoe nanga bijbel tori. Fu di wi e studeri na so wan fasi, meki a studie abi furu krakti tapu den pikin èn den e frustan a pisi tori moro bun. Disi de moro prenspari leki fu luku omeni paragraaf wi e studeri.”
4 Studeri ibri wiki: Na osofamiri studie musu hori doronomo èn ala memre fu na osofamiri musu de nanga prisiri fu de na a studie. Meki yu schema na so wan fasi taki yu kan kenki a dei noso a yuru te a studie e hori, fu di wan sani kan pasa di unu no fruwakti. Kande a sa de fanowdu son leisi fu studeri wan tra sani leki a pisi tori di unu ben o studeri. Ma awansi wan prenspari sani pasa di meki taki a dei noso a yuru fu a studie kenki, toku dati no musu meki taki yu no e hori yusrefi fu wan langa pisi ten na a schema fu na osofamiri. Wan umapikin na ini wan osofamiri e taki: „Efu wi o hori a studie fu wi na wan tra ten, dan ala ten mi papa e skrifi dati na tapu wan papira èn a e poti a papira na a doro fu na ijskasi so taki ala sma sabi o ten wi o hori a studie.” A de fu prèise taki osofamiri e du so furu muiti fu hori na osofamiri studie doronomo! Te yu e go doro fu kweki yu pikin „nanga a trangaleri èn a seryusu frumane fu Yehovah”, dan yu e sori taki yu lobi den èn taki yu lobi wi hemel Tata sosrefi.—Ef. 6:4.