Osofamiri studie di e gi prisiri

„Koni sa foeroe den kamra na inisei nanga ala sortoe diri èn prisiri sani di abi waarde”, na so bijbel e taki (Odo 24:4). Den diri sani disi di abi waarde a no soso materia goedoe, ma den wani taki troe lobi so srefi, a frede gi Gado, nanga tranga bribi. Den sortoe eigifasi dati e meki na osofamiri-libi kon goedoe troetroe (Odo 15:16, 17; 1 Petrus 1:7). Ma efoe wi wani kisi den eigifasi disi, dan wi moesoe tjari a sabi foe Gado kon na ini wi osofamiri-libi.

NA OSOFAMIRI edeman abi a frantiwortoe foe stampoe a sabi disi go na ini den memre foe na osofamiri (Deuteronomium 6:6, 7; Efeisesma 5:25, 26; 6:4). Wan foe den moro boen fasi foe doe disi de nanga jepi foe wan osofamiri studie di e doe doronomo. A kan de wan troetroe prisiri gi den sma di e teki prati na disi te a studie e hori na so wan fasi taki den kan leri wan sani foe en èn a de wan switi sani toe! Foe dati ede, kon meki wi loekoe wan toe prenspari sani di abi foe doe nanga a hori foe wan boen osofamiri studie.a

Wan osofamiri studie e waka moro boen te a e doe doronomo. Te joe no meki mofo foe hori a studie noso joe e hori en soso te na okasi de, dan soleki fa a sori, joe no sa doe en doronomo. Foe dati ede joe moesoe ’bai ten’ gi a studie (Efeisesma 5:15-17). A kan de wan tjalensi foe feni wan fasti ten di boen gi ala sma. „A ben de wan moeilek sani gi wi foe doe wi osofamiri studie doronomo”, na so wan osofamiri edeman e erken. „Wi ben proeberi difrenti ten te leki wi ben feni wan joeroe te foe kaba, di ben de pikinso moro lati na neti èn di ben boen gi wi alamala. Now na osofamiri studie foe wi e hori doronomo.”

Te joe feni wan boen ten kaba, dan loekoe boen taki joe no e meki sani poeroe joe prakseri so taki a studie no e hori. „Efoe wi ben kisi fisitiman ala di wi ben e studeri,” na so Mariab di abi 33 jari now, e memre, „dan pâ ben aksi den foe wakti te leki a studie ben kaba. Èn efoe wan sma ben bèl, dan a ben taigi a sma nomo taki a ben o bèl en baka na wan tra ten.”

Ma disi no wani taki, dati joe moesoe de strak ala ten. Sani kan pasa di moesoe kisi prakseri wantewante noso di joe no ben froewakti, èn a kan de fanowdoe wanwan leisi foe no meki a studie go doro noso foe skoifi en go na wan tra ten (Preikiman 9:11). Ma loekoe boen taki joe no e meki wan foe den sani disi tapoe a fasi fa joe gwenti doe sani. — Filipisma 3:16.

O langa wan studie moesoe teki? Robert, di kweki wan oemapikin nanga wan manpikin nanga boen bakapisi, e taki: „Nofotron den studie foe wi ben teki wan joeroe. Di den pikin ben jongoe, dan na ini a joeroe dati wi ben proeberi foe hori a belangstelling foe den foe di wi ben loekoe difrenti sani, soleki wan toe paragraaf na ini a studie artikel na ini A Waktitoren, pisi na ini bijbel nanga pisi foe tra poeblikâsi di wi ben soekoe kaba na fesi.” Maria e memre: „Di mi nanga den toe sisa foe mi ben jongoejongoe ete, dan a studie foe wi ben teki so wan 20 miniti, toe noso di tron wan wiki. Di wi ben kon moro bigi, dan na alawiki osofamiri studie foe wi ben teki wan sani foe wán joeroe.”

San wi moesoe studeri?

Te oenoe e poti prakseri na tapoe na aksi disi te ala sma kon na wán gi wan studie, dan dati ben tjari broeja kon èn warti ten gi a studie ben o lasi gowe. Efoe dati ben de so, dan pikin no ben o abi no wan spesroetoe sani di den ben kan froewakti, èn fosi joe denki, den ben o lasi belangstelling. Dati meki, soekoe wan foe den poeblikâsi foe a Genootschap na fesi di oenoe wani studeri.

„A getrow èn koni srafoe” gi wan heri ipi poeblikâsi di wi kan teki (Mateus 24:45-47). Kande joe kan gebroiki wan boekoe di na osofamiri no studeri ete. Èn a e gi troetroe prisiri foe loekoe pisi foe Inzicht in de Schrift di oenoe ben soekoe na fesi, efoe den boekoe disi de foe kisi na ini joe tongo! Foe eksempre, joe ben kan loekoe na artikel baka di e taki foe na Avondmaal na ini den wiki bifo a Memrefesa. Foeroe osofamiri e prisiri foe sreka a Waktitoren-studie gi a wiki. Ma den tra artikel na ini A Waktitoren boen srefisrefi toe foe studeri. Na osofamiri edeman, di sabi san na osofamiri abi fanowdoe na jejefasi, de a moro boen sma di moesoe bosroiti sortoe poeblikâsi moesoe studeri.

„Ala ten wi ben studeri wan poeblikâsi di wi ben soekoe langaten na fesi,” Maria e memre. „Ma wi ben abi a gwenti taki te wan aksi ben opo ede kon noso wan sani ben pasa na skoro, dan wi ben go abra na tapoe tori di ben fiti.” Spesroetoe tori, soleki den problema di jongoewan abi na skoro, a meki foe mofo nanga wan sma foe a tra geslakti, sani di e doe dorosei foe skoroten, èn den sortoe sani dati, e opo ede kon. Te disi e pasa, dan soekoe artikel noso poeblikâsi di e taki foe a problema di opo ede kon. Efoe joe e si bodoi na ini a moro njoen uitgave foe A Waktitoren noso Ontwaakt! di joe ben sa wani studeri nanga na osofamiri wantewante, no draidrai foe seti a tori dati. A no de foe taki, dati joe ben sa wani taigi den osofamiri memre na fesi foe a kenki dati. Ma sorgoe taki joe e go doro nanga den sani di ben de na tapoe a schema, so esi leki joe ben sorgoe gi a sani di ben de fanowdoe.

Sorgoe taki wan vrede situwâsi de

Sma e leri moro boen te situwâsi foe vrede de (Jakobus 3:18). Sorgoe foe dati ede, gi wan situwâsi di no de spanspan, ma di tokoe de nanga lespeki. Wan osofamiri edeman na Amerkankondre e taki: „Awansi wi e studeri na ini a foroisi noso na tapoe balkon, wi e proeberi foe sidon krosibei na makandra na presi taki wi e sidon fara foe makandra na ini wan bigi kamra. Gi wi, disi e tjari wan firi foe waran fasi kon.” Èn Maria e memre nanga foeroe prisiri: „Mi nanga den sisa foe mi ben kisi primisi foe taki pe foe na oso wi ben o studeri a wiki dati. Disi ben meki wi firi boen.” Hori na prakseri dati wan boen faja, boen presi foe sidon, èn wan switi kontren di no broejabroeja, e meki wan vrede situwâsi kon. Te joe abi wan sani gi na osofamiri foe njan noso foe dringi baka a studie, dan dati e jepi toe foe meki a neti de wan prisiri sani.

Son osofamiri wani, taki tra osofamiri srefi de na a studie foe den wanwan leisi, san e meki taki a studie e hori a belangstelling foe sma moro makriki èn a e meki toe taki moro difrenti komentaar e kon. Te sma di de paspas na ini waarheid, e kisi a kari foe teki prati na a seti disi, dan den kan abi wini te den e si fa wan osofamiri edeman di abi ondrofeni e hori wan osofamiri studie.

Meki bijbel kon na libi

Meki a ten te oenoe e studeri de wan sani di e meki den pikin kon de nanga faja, èn den sa loekoe go na den studie disi nanga prisiri. Joe kan doe disi foe di joe e gi pikin-nengre deki-ati foe meki prenki foe situwâsi na ini bijbel. Te disi fiti, dan meki den pikin prei wan sani di pasa na ini bijbel. Nanga jongoe pikin a no de fanowdoe foe hori joesrefi na wan officieel fasi foe aksi nanga piki. Te joe e leisi noso froeteri tori foe sma na ini bijbel, dan dati na wan prisiri fasi foe stampoe den gronprakseri foe Gado go na ini den. Robert, di wi ben taki foe en kaba, e memre: „Son leisi wi ben leisi pisi na ini bijbel, foe di ibri sma ben kisi wan beurt, èn ben kisi a toewijzing foe leisi den difrenti ’sten’ foe den sma.” Joe kan aksi pikin toe foe teki wan sma di den wani prenki na ini a bijbel-leisipisi.

Te joe e gebroiki karta nanga tabel, dan dati sa jepi den moro owroe pikin foe si na den fesi den kontren nanga difrenti sani foe a kondre pe sani ben pasa di oenoe e taki foe den. A de krin, taki te joe e go sidon prakseri sani pikinso moro fini, dan wan osofamiri studie kan hori fajafaja èn na wan difrenti fasi. Èn den pikin sa kon angri foe a Wortoe foe Gado. — 1 Petrus 2:2, 3.

Jepi ala sma foe teki prati

Efoe pikin moesoe prisiri nanga a studie, dan den moesoe kisi a firi toe taki a abi foe doe nanga den. Ma a de wan tjalensi foe meki pikin di abi difrenti jari, teki prati. Ma a bijbel gronprakseri e taki: „A sma di e teki fesi, meki a doe disi na wan troetroe serjoesoe fasi” (Romesma 12:8). A e jepi te joe de nanga faja, bika trawan kan kon de nanga faja toe.

Ronald e meki en oemapikin Dina, di abi feifi jari, teki prati toe foe di a e meki en leisi den ondro-edeprakseri na ini a sani di den e studeri èn a e aksi en foe gi komentaar na tapoe den prenki. A jari di pasa, di a Memrefesa foe Krestes dede ben doro, dan a ben poti prakseri na tapoe den prenki na ini a boekoe A moro bigi man di oiti ben libi, di ben abi foe doe nanga a tori.c A e taki: „Disi ben jepi en foe froestan san a sani disi di pasa, wani taki.”

Ronald e go pikinso moro fara nanga en oemapikin Misja di abi tin jari. „Misja kon so fara kaba, taki a no kan froestan nomo san na den prenki, ma a kan froestan toe san den wani taki,” na so Ronald e taki. „Dati meki, di wi ben studeri a boekoe De Openbaring — Haar grootse climax is nabij! (Na Openbaring — En moro bigi heimarki de krosibei!),d dan wi ben poti prakseri na tapoe san den prenki wani taki, èn disi jepi en.”

Te den pikin e tron tini, aksi den foe sori fa a materiaal di oenoe e studeri de praktis foe gebroiki. Efoe aksi e opo ede kon te oenoe e studeri, dan gi den a toewijzing foe go ondrosoekoe a tori. Robert ben doe dati di Paul foe en, di abi 12 jari, ben aksi foe wan skoro club di ben opo paspas èn di ben abi a plèi Dungeons and Dragons (Doengroe-oso nanga draak). Paul nanga den tra sma na ini na osofamiri ben soekoe bodoi foe di den ben gebroiki na Index van Wachttoren-publikaties, èn den ben loekoe a tori baka na ini na osofamiri studie foe den. „A bakapisi ben de”, na so Robert e taki, „dati Paul ben froestan esi-esi taki a plèi no ben de wan boen sani gi kresten.”

Robert ben gi toewijzing foe go ondrosoekoe tori na tra ten toe. En wefi Nancy e memre: „Te wi ben ondrosoekoe den apostel foe Jesus, dan ibri wiki, ibriwan foe wi ben kisi wan apostel leki toewijzing. A ben de troetroe wan prisiri sani foe si fa den pikin ben pristeri a tori foe den fajafaja na a osofamiri studie!” Foe di den pikin ben doe den eigi ondrosoekoewroko èn ben prati den tori nanga na osofamiri, meki dati ben jepi den foe ’gro kon bigi nanga Jehovah.’ — 1 Samuèl 2:20, 21.

A poti di joe e poti aksi — aksi foe kon sabi san den e denki, so srefi aksi di kan jepi den gi a piki — na wan moi fasi toe foe tjari den pikin kon ini a tori. A Meester Leriman Jesus, ben poti aksi foe kon sabi san sma ben denki, soleki: „San joe denki?” (Mateus 17:25) „Te wan foe wi ben abi wan aksi, dan noiti a papa nanga mama foe wi ben piki wi langalanga”, Maria e memre. „Ala ten den ben poti aksi foe jepi wi feni a piki, san ben jepi wi foe prakseri-go-prakseri-kon foe a tori.”

Abi komunikâsi — No gi toemoesi hebi strafoe!

Na osofamiri studie kan de wan moro prisiri sani efoe ala sma di drape kan taki san den e denki èn san den e firi sondro foe frede taki wan sma sa spotoe den. Ma „wan boen komunikâsi na a ten foe na osofamiri studie kan, soso te den kan abi komunikâsi na tra ten toe”, wan papa e taki. „Joe no kan doe leki joe abi komunikâsi na a ten foe a studie nomo.” Joe no moesoe taki kwetikweti foe sani sondro foe joe prakseri fosi, soleki: ’Na dati na ala? Mi ben denki taki a ben de wan prenspari sani’; ’Dati na wan don sani foe taki’; ’We san joe e froewakti? Joe na wan pikin nengre ete’ (Odo 12:18). Abi firi nanga sari-atifasi gi den pikin foe joe (Psalm 103:13; Maleaki 3:17). Abi prisiri nanga den, èn jepi den te den e proeberi foe doe san den e leri. — Odo 29:17.

A situwâsi foe na osofamiri studie moesoe de so, taki a prakseri foe a pikin de klariklari foe teki leri. „Te joe e bigin sori den pikin tapoe den fowtoe,” na so wan papa foe fo pikin di abi boen bakapisi, e froeklari, „dan den sa mândi pikinso.” Na ini so wan situwâsi, bodoi no sa doro den ati kande. Foe dati ede, no proeberi foe meki a ten foe a studie kon tron wan ten foe gi tranga leri nanga strafoe. Efoe dati de fanowdoe, dan gi disi baka ten èn na ibri pikin aparti.

A warti a moeiti

A e teki ten nanga moeiti foe bow wan osofamiri di goedoe na jejefasi. Ma a psalm singiman e froeklari: „Loekoe! Manpikin na wan goedoe di den kisi foe Jehovah; a froktoe foe a bere na wan pai” (Psalm 127:3). Èn papa nanga mama e kisi a frantiwortoe foe „kweki den [pikin] na ini a tranga leri èn a serjoesoe froemane foe Jehovah” (Efeisesma 6:4). Dati meki, kweki den bekwaamfasi foe hori wan boen èn prisiri osofamiri studie. Doe san joe man doe foe sorgoe gi „a soifri merki di de foe a wortoe”, so taki den pikin foe joe kan „gro kon kisi froeloesoe”. — 1 Petrus 2:2; Johanes 17:3.

[Foetoewortoe]