Sori taki yu e broko yu ede nanga trawan—Fu di yu luku sani finifini
1 Yehovah Gado nanga Krestes Yesus sabi moro leki iniwan tra sma sortu spesrutu sani libisma abi fanowdu, èn den de klariklari fu yepi den na a moro bun fasi (2 Kron. 16:9; Mark. 6:34). Te wi e kon sabi san na den broko-ede fu den sma di wi e miti na ini a diniwroko, dan wi sa man pristeri a bun nyunsu na wan fasi di e fiti a situwâsi fu den sma.
2 Luku sani finifini: Yesus ben e luku sani finifini (Mark. 12:41-43; Luk. 19:1-6). Na a srefi fasi, te wi e go na sma oso èn wi e si sani di sma e gebroiki na ini a bribi fu den, sosrefi sani di skrifi na tapu den wagi, noso preisani tapu a prasi, dan kande dati na wan moi okasi fu gi den wan bun kotoigi fu a bun nyunsu.
3 A fasi fa wan sma e poti en fesi èn a fasi fa a e tyari ensrefi kan sori wi fa a e firi (Odo 15:13). Kande wan sma fu en dede, noso kande a abi tra problema di e meki taki a e sari èn taki a abi trowstu fanowdu. Kande a sma o firi bun efu wi leisi wan tu bijbeltekst nanga en di fiti (Odo 16:24). Efu na ososma e gowe na a momenti dati, noso efu a e hori wan beibi di e krei, dan kande a ben o moro bun fu go wan tra leisi na a sma dati. Te wi e hori sma na prakseri èn te wi „e firi gi tra sma”, dan kande wi kan gi a sma a deki-ati fu arki te wi e go baka na en.—1 Petr. 3:8.
4 Fiti den sani di yu e taki na a situwâsi fu na ososma: Na apostel Paulus ben si taki a foto Ateine ben abi wan altari pe ben skrifi na tapu: „Gi wan Gado di wi no sabi.” Disi ben meki taki Paulus pristeri a bun nyunsu tra fasi, fu di a ben taki: „Na fu a Gado disi di unu e anbegi sondro taki unu sabi en, mi e fruteri unu.” A koni fasi fa Paulus ben taki fu a tori disi, ben meki taki sonwan fu den sma di ben de drape poti yesi arki a Kownukondre boskopu, èn den tron bribiman.—Tori. 17:23, 34.
5 Te wi sosrefi luku sani finifini, dan wi sa kon si san den sma abi na prakseri, èn disi sa yepi wi fu taki na wan fasi di e hari sma. Poti aksi di kan meki na ososma taki san a abi na prakseri. Prakseri sortu bijbeltekst yu kan gebroiki, fu meki taki a sma wani sabi moro (Odo 20:5). Te wi de na ai èn te wi sori taki wi e broko wi ede trutru nanga trawan, dan disi sa yepi wi fu prati a bun nyunsu na wan koni fasi.