Fa fu du wi diniwroko moro bun​—Sori taki yu e broko yu ede nanga sma

Fu san ede a prenspari: Yesus ben e broko en ede nanga ibri sma di a miti èn a ben sori lobi gi den. Fu eksempre, di Yesus si taki wan dofuman ben e syensyen, dan a puru en na mindri den furu sma di ben de drape èn a tyari en go na seisei fu dresi en (Mark. 7:31-35). Yesus ben broko en ede nanga den disipel fu en èn a ben hori na prakseri san den no ben man du. Dati meki a no ben leri den tumusi furu sani (Yoh. 16:12). Srefi di Yesus go baka na hemel a sori taki a e broko en ede nanga den (2 Tim. 4:17). Wi leki bakaman fu Krestes wani teki na eksempre fu en (1 Petr. 2:21; 1 Yoh. 3:16, 18). Wi o man du wi diniwroko moro bun te wi e hori a situwâsi nanga den firi fu na ososma na prakseri, te wi sabi san a lobi èn nanga sortu sani a e broko en ede. Te na ososma si taki wi no kon soso fu tyari wan boskopu noso den buku fu wi, ma taki wi e broko wi ede nanga en, dan kande a o wani arki.