Sori taki yu e broko yu ede nanga trawan—Fu di yu e sreka yusrefi bun
1 Te we e sreka wisrefi bun gi a preikiwroko, dan dati e yepi wi fu sori taki wi e broko wi ede nanga trawan. Fa so? Te wi sreka wisrefi bun, dan wi no sa prakseri soso den sani di wi musu taki, èn na so fasi wi kan poti moro prakseri na a ososma. Boiti dati, a e yepi wi fu no senwe so furu moro, èn fu taki na wan opregti fasi. Ma fa wi kan sreka wisrefi fu hori wan bun takimakandra?
2 Taki fu sani di fiti: Luku sortuwan fu den eksempre fu takimakandra di skrifi na ini Wi Kownukondre diniwroko fu yanuari 2006, e fiti a kontren fu yu, èn prakseri fa yu kan taki en nanga yu eigi wortu. Taki na so wan fasi taki a e hari a prakseri fu den sma na ini a kontren pe yu e preiki. Fu eksempre, efu a de so furu tron taki yu e miti sma di abi wan spesrutu bribi, noso di de fu wan spesrutu ras, dan yu musu go denki san yu kan taki fu hari den prakseri. Te yu e fiti a takimakandra fu yu na den sma di yu e taki nanga den, dan yu e sori taki yu e broko yu ede nanga den trutru.—1 Kor. 9:22.
3 Te yu e si taki a takimakandra abi bun bakapisi, dan yu musu du muiti fu meki en kon moro bun. Fu di den wortu di yu e taki na a bigin prenspari srefisrefi, meki yu musu luku efu den sma e arki yu. Yu e hari a prakseri fu den sma nanga den sani di yu e taki? Den sani di yu e aksi, e meki taki den sma wani gi piki? Efu dati no de so, dan yu musu kenki a fasi fa yu e taki nanga sma, teleki yu feni wan fasi fu hari den prakseri.
4 Sani di e yepi yu fu memre sani: Furu sma e feni en wan muilek sani fu memre san den o taki te den de na a mofodoro fu wan sma. Efu disi e pasa nanga yu tu, dan yu kan pruberi fu oefen a takimakandra nanga wan tra sma. Disi kan yepi yu fu memre moro bun san yu wani taki, èn sosrefi fu taki den na wan makriki fasi di de krin fu frustan. A kan yepi yu tu fu de srekasreka gi difrenti piki di den ososma o gi.
5 Wan tra sani di kan yepi yu fu memre san yu wani taki, na fu skrifi wan tu syatu sani na tapu wan pisi papira èn fu luku en leti bifo yu e go na wan doro. Son sma feni taki den sani disi di den skrifi syatu, e yepi den fu no senwe so furu moro, èn fu taki moro bun nanga sma. Te wi e sreka wisrefi bun na a fasi disi, dan dati kan yepi wi fu sori taki wi e broko wi ede nanga trawan, èn na so fasi wi kan pristeri a bun nyunsu na wan moro bun fasi.