„De klariklari fu du ibri bun wroko”
1 Fosi Yesus seni en disipel fu go preiki, a ben teki ten fu sreka den gi a wroko disi (Mat. 10:5-14). Wi alamala abi furu sani fu du. Ma te wi ben o teki wan tu miniti fu sreka wisrefi bifo wi teki prati na a oso-fu-oso preikiwroko, dan dati sa yepi wi fu abi bun bakapisi.—2 Kor. 9:6.
2 Fa fu sreka wisrefi: A fosi sani di wi musu du te wi e sreka wisrefi, na fu kon sabi san skrifi na ini den publikâsi di wi wani pristeri. Wi musu hori den sma fu a kontren fu wi na prakseri tu. Nanga sortu sani den e broko den ede? Sortu bribi den sma na ini a kontren abi? Wi kan gebroiki den eksempre fu Wi Kownukondre diniwroko fu pristeri den publikâsi èn wi kan gebroiki den eksempre na ini a Bijbel takimakandra-buku.
3 Wan tra sani di kan yepi wi tu, na te wi arki bun fa brada nanga sisa e hori den demonstrâsi na a Diniwroko Konmakandra. Te wi e kisi moro ondrofeni na a fasi fa wi e pristeri a bun nyunsu, dan wi no sa abi so furu ten fanowdu moro fu sreka wisrefi. Ma ibri leisi bifo wi go na ini a preikiwroko, wi kan poti prakseri na den sani di wi o taki èn wi kan tan meki muiti fu pristeri den publikâsi moro bun. Disi o meki taki wi o abi moro bun bakapisi. Wi no musu frigiti tu fu luku efu wi abi ala den publikâsi di wi o abi fanowdu na ini wi tas.
4 San o yepi wi fu memre den sani di wi o taki? Te wi e oefen nanga wan tranga sten san wi o taki, dan dati sa yepi wi fu no frigiti a pristeri fu wi. Son preikiman lobi fu oefen san den o taki te den e du na osofamiri studie. Tra preikiman feni en moro bun fu skrifi wan tu prenspari sani na tapu wan pisi papira, so taki den kan luku san den o taki bifo den go na wan oso.
5 Fu san ede wi o kisi wini: Te wi sreka wisrefi bun, dan wi o abi moro prisiri èn wi o abi moro bun bakapisi na ini a preikiwroko. A o yepi wi fu no senwe so furu te wi e taki nanga na ososma. Na so fasi wi sa man poti moro prakseri na a ososma, na presi fu denki nomo na san wi o taki. Boiti dati, te wi sabi san skrifi na ini den publikâsi, dan dati sa yepi wi fu taki nanga moro faya te wi o pristeri den.
6 Bijbel e gi wi a deki-ati fu „de klariklari fu du ibri bun wroko” (Tit. 3:1). Iya, a moro bun wroko di wi kan du, na fu preiki a bun nyunsu. Te wi sreka wisrefi bun, dan wi e sori lespeki gi na ososma di wani arki wi, èn wi e sori lespeki gi Yehovah, a Gado di wi e dini.—Yes. 43:10.