Sori taki yu e broko yu ede nanga trawan —Fu di yu e poti aksi èn e arki den
1 Furu sma lobi fu taki fa den e denki fu sani, ma den no lobi en te sma e taigi den san fu du, noso te sma e poti wan lo aksi gi den. Fu dati ede, leki Kresten dinari wi musu leri fu poti aksi gi sma na wan koni fasi, so taki wi kan kon sabi fa den e denki.—Odo 20:5.
2 Den aksi di wi e poti, no musu meki sma firi fruferi, èn den no musu meki sma kisi a firi taki den no sabi sani, ma den musu gi sma deki-ati fu go denki. Wan brada e taki disi te a e preiki oso fu oso: „Yu denki taki oiti wan ten sa kon te sma sa handri nanga makandra na wan lespeki fasi?” Baka te a brada arki san a sma piki, dan a e taki: „San yu denki de fanowdu fu meki a sani disi pasa?”, noso „Fu san ede yu e denki so?” Wan tra brada di e gi kotoigi na difrenti okasi èn na presi pe furu sma e go, e taki dati a e aksi den sma di abi pikin: „San na a moro prisiri sani di yu ondrofeni leki papa noso mama?” Baka dati a e aksi: „Nanga sortu sani yu e broko yu ede moro furu?” Luku taki den aksi disi e gi sma na okasi fu taki fa den e denki, sondro taki wi e meki den firi fruferi noso taki den e syen fu piki den aksi fu wi. Fu di ibri situwâsi de tra fasi, meki a kan de fanowdu fu poti aksi fu wan tra tori èn fu kenki a fasi fa wi e taki, so taki a kan fiti na den sma fu a kontren pe wi e preiki.
3 Fa wi kan kon sabi fa sma e denki: Efu sma wani fruteri yu fa den e denki fu wan tori, dan yu musu arki nanga pasensi èn yu musu luku bun taki yu no e koti den mofo efu dati no de fanowdu (Yak. 1:19). Sori den na wan switi fasi taki yu e frustan san den e taki (Kol. 4:6). Wan sani di yu kan taki na: „Dati na wan moi sani. Mi breiti taki yu taigi mi dati.” Prèise den na wan opregti fasi efu dati kan. Poti tra aksi gi den na wan switi fasi, so taki yu kan kon sabi fa den e denki èn fu san ede den e denki so. Pruberi fu taki fu wan sani pe den e agri nanga yu. Te yu wani den poti prakseri na wan bijbeltekst, dan yu kan taki: „Yu denki taki a sani disi kan de a lusu fu a problema?” Luku bun taki yu no e dwengi a sma fu agri nanga san wi e leri èn taki yu no hari go hari kon nanga a sma.—2 Tim. 2:24, 25.
4 A fasi fa wi e arki, kan abi krakti tapu a fasi fa den e gi piki tapu den aksi fu wi. Sma kan si efu wi e arki den trutru. Wan opziener di e reis ben taki: „Te yu abi a pasensi fu arki san sma abi fu taki, dan dati e hari sma prakseri trutru èn wi e sori na so wan fasi taki wi e broko wi ede trutru nanga den sma.” Te wi e arki tra sma, dan dati e meki den firi taki wi e lespeki den, èn disi kan meki taki den arki a bun nyunsu di wi wani prati nanga den.—Rom. 12:10.