Leri den safri-atisma fu waka a pasi fu Gado
1. San a wani taki fu meki disipel?
1 Sma ben taki dati den fosi yarihondro disipel fu Krestes ben de fu „A Pasi” (Tori. 9:2). A tru Kresten bribi abi fu du nanga a heri fasi fa wan sma e libi (Odo 3:5, 6). Fu dati ede, te wi e studeri Bijbel nanga sma, dan wi no musu sori den nomo san Bijbel e leri trutru. Ma wi musu yepi bijbelstudenti sosrefi fu waka a pasi fu Yehovah.—Ps. 25:8, 9.
2. San kan meki taki wan bijbelstudenti o wani gi yesi na den komando fu Gado?
2 Yepi bijbelstudenti fu kisi lobi gi Yehovah nanga Yesus: A muilek trutru gi sondu libisma fu kenki a fasi fa den e denki, a fasi fa den de, a fasi fa den e taki, èn a fasi fa den e tyari densrefi. Iya, a muilek srefisrefi gi den fu du sani soleki fa Yehovah wani! (Rom. 7:21-23; Ef. 4:22-24) Ma te safri-atisma abi lobi gi Gado èn gi en Manpikin, dan den o wani du a muilek sani disi (Yoh. 14:15; 1 Yoh. 5:3). Fa wi kan yepi den bijbelstudenti fu wi fu kisi a lobi disi?
3. Fa wi kan yepi bijbelstudenti fu kon kisi lobi gi Yehovah nanga Yesus?
3 Yepi a studenti fu yu fu kon si fa Yehovah de trutru. Wan brada ben taki: „Sma no man lobi wan sma di den no sabi. Fu dati ede, na a fosi studie kaba, mi e sori den na ini Bijbel fa Gado nen, èn mi e suku okasi fu poti krakti tapu den fasi fu Yehovah.” Wan kefalek bun fasi fu du disi, na fu poti prakseri na a eksempre fu Yesus (Yoh. 1:14; 14:9). Boiti dati, poti prakseri na a faki di nen „San Bijbel e leri wi”, di de fu feni na a kaba fu ibri kapitel fu a Bijbel leri-buku. Gebroiki a faki disi fu yepi a bijbelstudenti fu prakseri dipi fu den moi fasi fu Gado, èn fu en Manpikin.
4. (a) Fu san ede furu bijbelstudenti feni en muilek fu du a preikiwroko? (b) Fa wi kan yepi den bijbelstudenti fu wi fu bigin teki prati na a Kresten diniwroko?
4 De wan bun eksempre: Te wi e gi sma leri èn te wi e yepi den fu waka a pasi fu Gado, dan wi musu de wan bun eksempre gi den (1 Kor. 11:1). Fu eksempre, furu bijbelstudenti no abi a gwenti fu go na freimdesma fu go fruteri fu a bribi fu den. Fu dati ede, a kan taki wi musu abi pasensi nanga koni fu yepi den kisi a lobi, a bribi, nanga a deki-ati di de fanowdu fu kan teki prati na a preikiwroko èn fu meki disipel (2 Kor. 4:13; 1 Tes. 2:2). Efu wi wani yepi den studenti fu wi trutru, dan wi sa wroko makandra nanga den te den e bigin teki prati na a Kresten diniwroko.
5. Fa a bun eksempre di wi e gi kan yepi bijbelstudenti fu kon si san a wani taki fu gi yesi na den komando fu Gado?
5 Na eksempre di yu e gi, kan sori studenti sortu tra prenspari sani wan Kresten e du. Te yu e go luku sikisma, noso te yu e taki sma odi na wan switi fasi na den gemeente konmakandra, dan den e si a lobi di wi abi gi makandra (Yoh. 15:12). Te yu e yepi fu krin a Kownukondre zaal, noso te yu e du sani fu yepi trawan, dan yu e leri den fa fu dini trawan (Yoh. 13:12-15). Te den e si taki yu e libi soso nanga den sani di yu abi fanowdu trutru, dan den e si san a wani taki fu ’tan suku a kownukondre fosi’.—Mat. 6:33.
6. San na a bakapisi te wi e yepi safri-atisma fu dini Yehovah?
6 A e teki furu muiti fu leri trawan san a Wortu fu Gado taki, èn fu meki disipel. Ma a e gi furu prisiri fu si fa safri-atisma „e tan waka na ini a waarheid”!—3 Yoh. 4.