„Tan waka na mi baka”
1 Furu sma e libi soso fu plisi densrefi, ma nofo tron den no de koloku. Na a tra sei, Yesus e gi wi a deki-ati fu gi sani na trawan sondro fu suku wini gi wisrefi, èn dati e tyari trutru koloku kon (Tori. 20:35). A ben taki: „Efu wan sma wani kon na mi baka, dan a no musu teri ensrefi moro . . . èn meki a tan waka na mi baka” (Mark. 8:34). Disi no wani taki nomo dati wan sma e weigri wanwan leisi fu du son prisiri sani. Ma a wani taki dati ibri dei wi e libi, no fu plisi wisrefi, ma fu plisi Yehovah.—Rom. 14:8; 15:3.
2 Luku na eksempre fu na apostel Paulus. Fu di ’a sabi fu Krestes Yesus, warti moro ala sani’, meki Paulus tapu fu suku wini gi ensrefi, èn a bigin wroko fayafaya fu meki Kownukondre afersi go na fesi (Fil. 3:7, 8). A ben taki: „Mi fu mi sei wani gi ala sani nanga prisiri èn mi wani gi misrefi dorodoro fu a bun fu” trawan (2 Kor. 12:15). Ibriwan fu wi musu aksi ensrefi: ’Fa mi e gebroiki mi ten, mi krakti, mi koni, èn den sani di mi abi? Mi e denki soso fu suku wini gi misrefi, noso mi e suku fu plisi Yehovah?’
3 Difrenti fasi fa yu kan gi sani na trawan: Ibri yari, a pipel fu Gado e wroko moro leki wán milyard yuru fu preiki a Kownukondre nyunsu di e kibri sma libi. Na ini a gemeente yu abi yonguwan nanga owruwan di e du difrenti wroko gi a bun fu trawan. Furu difrenti tra wroko e du, soleki wroko di abi fu du nanga den bigi konmakandra, a bow fu difrenti konmakandra presi di sma e gebroiki na ini a tru anbegi, èn a sorgu di brada nanga sisa e sorgu gi den presi disi. Boiti dati, den brada fu na Ati-oso Kontakti Komte èn fu den Fisiti Grupu gi Sikisma e gi yepi na wan lobi-ati fasi. Ala den wroko disi di brada nanga sisa e du nanga den heri ati, de wan blesi gi a Kresten gemeente!—Ps. 110:3.
4 Son leisi wi e kisi na okasi fu yepi trawan na difrenti fasi te rampu miti den, noso te den de na ini nowtu. Ma furu tron a kan taki wi e si dati wan brada noso sisa fu wi abi yepi noso deki-ati fanowdu (Odo 17:17). Te wi de klariklari fu dini trawan èn fu meki Kownukondre afersi go na fesi, dan wi e teki na eksempre fu Yesus (Fil. 2:5-8). Meki wi du muiti fu tan waka na en baka.