Leri yu pikin fu prèise Yehovah
1. A de so taki yongu pikin kan prèise Yehovah?
1 Psalm 148:12, 13 e gi boi nanga meisje deki-ati fu „prèise a nen fu Yehovah”. Bijbel abi furu eksempre fu yongu pikin di ben du dati. Fu eksempre, ’Samuel ben e wroko leki wan dinari fu Yehovah di a ben de wan boi ete’ (1 Sam. 2:18). A ben de ’wan pikin meisje’ di ben fruteri a wefi fu Naman taki Yehovah en profeiti na ini Israel ben o man meki Naman kon betre fu en gwasi siki (2 Kow. 5:1-3). Di Yesus ben kon na ini a tempel èn a du wondruwroko, a ben de „den boi” di ben bari taki: „Grantangi, wi e begi yu, frulusu a Manpikin fu David!” (Mat. 21:15) Fa papa nanga mama kan leri den pikin fu den fu prèise Yehovah?
2. Fu san ede a de prenspari taki papa nanga mama e gi den pikin wan bun eksempre?
2 Na eksempre fu yu: Yehovah ben taigi den papa fu Israel taki densrefi ben musu lobi en èn den ben musu abi den komando fu en na ini den eigi ati, bifo den ben o leri den pikin fu den a waarheid (Deut. 6:5-9). Te yu e go na ini a preikiwroko ibri wiki èn yu e taki bun fu en, dan den pikin fu yu o si a diniwroko leki wan prenspari sani èn den o prisiri fu du en tu.
3. San wan sisa leri fu na eksempre di en papa nanga mama gi en?
3 Wan sisa e memre den prisiri momenti disi: „Di mi ben yongu, wi osofamiri ben gwenti fu go preiki ibri wiki. Mi ben kan si taki mi papa nanga mama ben e lobi a preikiwroko trutru. Wi leki pikin ben feni en wan prisiri sani fu preiki.” Di a sisa disi ben abi seibi yari, a tron wan preikiman di no dopu, èn now a de na ini a furuten diniwroko moro leki 32 yari kaba.
4. San a wani taki dati wi musu leri wi pikin fu go na fesi?
4 Leri yu pikin fu go na fesi: Te unu e go na ini a preikiwroko, dan un musu tyari den pikin fu unu tu. Kande unu kan meki den kari na ososma, gi na ososma wan traktaat, noso leisi wan bijbeltekst. Disi o gi den moro prisiri èn a o yepi den fu si taki den srefi kan fruteri sma a Kownukondre boskopu. Te den e kon moro bigi, den o man du moro na ini a preikiwroko. Fu dati ede, un musu yepi den fu go na fesi èn fu poti marki di den kan doro na ini a diniwroko.
5. O ten wan pikin kan tron wan preikiman di no dopu ete?
5 Te yu feni taki den pikin fu yu kan tron preikiman di no dopu ete, èn efu den pikin srefi wani dati tu, dan yu kan go taki nanga den owruman. Den pikin di e tron preikiman sa kon frustan taki den srefi abi a frantwortu fu prèise Yehovah. Hori na prakseri taki wan pikin no abi fu sabi ala den sani leki wan bigisma di dopu kaba, bifo a kan tron wan preikiman. A de so taki a pikin fu yu e frustan den moro prenspari leri fu Bijbel? A e tyari ensrefi na wan bun fasi, soleki fa Bijbel e leri? A wani go preiki trutru, èn a wani taki sma kon sabi en leki wan Kotoigi fu Yehovah? Efu dati de so, dan den owruman kan teki a bosroiti fu meki a tron wan preikiman di no dopu ete.—Luku Wi orga fu du a wani fu Yehovah, blz. 79-82.
6. Fu san ede papa nanga mama sa kisi winimarki te den e leri den pikin fu prèise Yehovah?
6 Papa nanga mama musu du furu muiti fu leri den pikin fu den fu prèise Yehovah nanga den heri ati. Wan tu sani nomo de di kan gi papa nanga mama furu prisiri, èn wan fu den sani disi de taki den pikin fu den e go na fesi na ini a preikiwroko. Ma a moro prenspari sani na taki Yehovah e prisiri te pikin e fruteri tra sma fu den tumusi moi sani di a du.