Papa nanga mama—Leri den pikin foe oenoe foe preiki
1 Den gemeente foe wi blesi nanga foeroe pikin di abi a troetroe winsi foe dini Gado (Preik. 12:1). Den de na mindri den wan di kisi wan kari foe Jehovah foe abi wan prati na ini a prèise foe en (Ps. 148:12-14). Foe dati ede, a leri di papa nanga mama e gi den pikin foe den ibri dei moesoe abi rai na ini toe, fa den kan prati a bribi foe den nanga trawan na ini a Kownoekondre preikiwroko.—Deut. 6:6, 7.
2 Leri pikin foe go na fesi safri-safri: Pikin e froedini en foe kisi leri te den de jongoe srefisrefi foe go nanga den papa nanga mama na ini a diniwroko. Bifo joe e go na ini a diniwroko, sreka den pikin foe joe foe abi wan prati na wan boen fasi. Bepaal na fesi san joe e froewakti taki den moesoe doe te den de na a ososma. Toemoesi jongoe pikin kan gi sma traktaat nanga strooibiljet èn gi sma wan kari foe kon na a Kownoekondre zaal. Joe kan aksi jongoe pikin di man leisi boen, foe leisi bijbeltekst gi na ososma. Den kan pristeri den tijdschrift, ala di den e gebroiki wan sjatoe pristeri. Ala di den e kon moro bekwaam, leri den foe gebroiki bijbel na ini a pristeri foe den. Foeroe jongoe preikiman bigin nanga den eigi tijdschrift route, èn den e meki gobaka doronomo. A de a moro boen sani gi wan pikin foe wroko nanga wan bigisma, na presi taki a e wroko nanga wan tra jongoe pikin. A bigisma kan tjari kon na krin gi na ososma, taki a jongoewan e kisi leri na ini a diniwroko.
3 Wan pikin meisje ben aksi den owroeman jepi so taki a ben kan doro den markitiki foe tron wan Kownoekondre preikiman. Ala di, na a ten dati, a ben abi feifi jari nomo èn no ben sabi fa foe leisi, tokoe a ben man pristeri a Kownoekondre boskopoe na den ososma nanga boen bakapisi. A ben hori a presi pe den tekst ben tanapoe na ede, a ben opo a poeblikâsi na a bladzijde pe den tekst ben de, a ben aksi na ososma foe leisi den tekst, èn dan a ben tjari dati kon na krin.
4 Pikin moesoe leri toe foe na eksempre di papa nanga mama e gi, foe a waarde foe abi wan boen schema, so taki den kan abi wan doronomo prati na ini a diniwroko. Papa nanga mama moesoe abi wan gwenti foe doe a diniwroko ibri wiki èn den moesoe hori densrefi na dati, so taki den pikin sabi sortoe ten foe a wiki poti na wan sei gi a preikiwroko.
5 Te pikin e kisi leri te den de jongoe ete foe lobi a diniwroko èn foe abi prisiri na ini dati, dan a sa boeweigi den foe wani feti na baka moro bigi grani na ini a ten di e kon, kande so srefi a pionierwroko (1 Kor. 15:58). Wi alamala moesoe gi den pikin di de na wi mindri deki-ati foe meki boen go na fesi leki prèiseman foe Jehovah.