Tan „meki furu froktu”
1 Na ini wan agersitori, Yesus ben agersi ensrefi nanga a trutru droifibon. A ben agersi en Tata nanga a Gronman èn den bakaman fu en di salfu nanga santa yeye, nanga den taki fu a bon di e meki froktu. Di Yesus taki fu a wroko fu na agersi Gronman, a ben tyari kon na krin o prenspari a de fu tan krosibei fu a droifibon (Yoh. 15:1-4). A sani di wi kan leri fu disi, na taki ala sma di de bun mati fu Yehovah musu de leki wan taki di e meki froktu èn di de na a „trutru droifibon”, Yesus Krestes. Wi musu tan sori „a froktu fu a yeye” èn wi musu tan meki Kownukondre froktu, dati wani taki dati wi musu tan preiki fayafaya fu a Kownukondre.—Gal. 5:22, 23; Mat. 24:14; 28:19, 20.
2 A froktu fu a yeye: Efu wi e sori a froktu fu a yeye na wan bun fasi, dan sma sa si krin taki wi e go na fesi na ini a diniwroko. Yu e meki muiti fu kisi a froktu fu Gado en yeye, fu di yu e studeri Gado Wortu doronomo èn e denki dipi fu en? (Fil. 1:9-11) No draidrai fu begi fu a santa yeye, fu di a kan yepi yu fu kisi moi fasi di e gi Yehovah glori èn a kan yepi yu fu tan go na fesi na ini a tru anbegi.—Luk. 11:13; Yoh. 13:35.
3 Te wi e meki muiti fu kisi a froktu fu a yeye, dan dati sa yepi wi fu preiki nanga moro faya. Fu eksempre, te wi lobi Gado èn te wi abi bribi, dan wi sa meki ten fu preiki doronomo awinsi wi abi furu fu du. Den fasi soleki vrede, langa pasensi, bun-ati, bunfasi, nanga a dwengi di wi e dwengi wisrefi, e yepi wi fu tyari wisrefi na wan fasi di fiti te sma e gens wi. Prisiri na wan tra froktu fu a yeye di e meki taki wi e firi bun te wi e preiki, awinsi sma no wani arki wi.
4 Kownukondre froktu: Wi wani meki Kownukondre froktu tu. Disi wani taki dati wi e tyari ’wan srakti-ofrandi fu prèise ala ten, namku den froktu fu a mofo di e meki a nen fu Yehovah bekènti na trawan’ (Hebr. 13:15). Wi e tyari na ofrandi disi te wi e preiki a bun nyunsu na wan getrow fasi èn te wi e du disi fayafaya. Yu e pruberi fu fruteri moro sma fu a Kownukondre fu di yu e meki muiti fu kon moro bun na ini a preikiwroko?
5 Yesus ben sori taki a no ala getrow bakaman fu en ben o wroko a srefi. Sonwan ben o meki furu froktu èn trawan no ben o meki so furu (Mat. 13:23). Dati meki wi no musu teki wisrefi gersi nanga tra sma, ma wi musu gi Yehovah den moro bun sani fu wi (Gal. 6:4). Te wi e gebroiki Gado Wortu fu ondrosuku wi eigi situwâsi, dan dati sa yepi wi fu tan gi Yehovah glori fu di wi e „meki furu froktu”.—Yoh. 15:8.