Aksi di opo kon

◼ San na den kefar te wi e gebroiki Internet fu taki nanga sma di wi no sabi?

Tapu Internet, furu okasi de fu kon leri sabi trawan, noso fu taki nanga den. Wan lo Web site e gi sma na okasi fu fruteri sani fu densrefi èn fu poti fowtow fu densrefi tu. Tra sma di e si den sani disi kan suku fu kon leri sabi den sma di poti den tori na den Web site disi. Yonguwan lobi a sani disi srefisrefi, èn son yongusma na ini a gemeente ben go na den Web site disi fu kon leri sabi trawan di e taki dati den na Yehovah Kotoigi.

A makriki gi wan sma di wi e miti tapu Internet fu fruteri sani fu ensrefi di no tru. A kan taki a sma e fruteri dati a abi wan bun matifasi nanga Yehovah, noso taki a abi bun marki na ini en libi (Ps. 26:4). Ma wan sma di e taki dati en na wan Yehovah Kotoigi kan de wan sma di no de na bribi, a kan de wan sma di no de wan Kotoigi moro, noso a kan de wan sma di fadon komoto na bribi èn di e suku fu meki tra Kresten fadon tu (Gal. 2:4). Soleki fa raportu e sori, dan furu sma di wani abi seks nanga pikin-nengre, e gebroiki den Web site disi fu suku den pikin disi.

Srefi efu wi abi na overtoigi dati den sma di wi e taki nanga den tapu Internet na sma di abi wan bun nen na ini a gemeente, toku a kan pasa makriki dati wi e bigin taki fu sani di no bun. Disi de so, bika sma di no si makandra noiti ete no e syen fu taki fu ala sortu sani nanga makandra. Yonguwan kan denki tu taki te den de tapu Internet, dan sma soleki den papa, den mama, noso den owruman, no o sabi fu sortu tori den e taki. A de wan sari sani taki na Internet ben de wan tesi gi wan tu yonguwan fu Kresten osofamiri, fu di den bigin taki fu morsu fisti tori nanga trawan (Ef. 5:3, 4; Kol. 3:8). Tra yonguwan poti fowtow fu densrefi di e meki trawan kisi sekslostu. Na presi fu den eigi nen, den e gi densrefi ala sortu fisti nen, noso den e skrifi gi trawan pe den kan go luku morsu video clip.

Te wi e prakseri den sani di wi taki fu den didyonsro, dan a de prenspari taki papa nanga mama e luku finifini fa den pikin fu den e gebroiki a computer (Odo 29:15). Ogri ben kan miti wi efu wi ben o kari wan freimdesma fu kon na ini wi oso, noso efu wi ben o meki so wan sma de en wawan nanga den pikin fu wi. Na so ogri kan miti wi, noso den pikin fu wi tu, efu wi e tron mati nanga sma di wi no sabi tapu Internet, srefi te den sma dati e taki dati den na Yehovah Kotoigi.—Odo 22:3.