Wan fasi fu yepi sma

Tru Kresten e panya a bun nyunsu fu di den e teki prati na a preikiwroko (Fil. 2:17). Fu man prati a bun nyunsu, dan wan tu brochure, traktaat, nanga tra artikel de fu feni na ini 20 tongo tapu Internet na a adres www.watchtower.org. A website disi (a presi tapu Internet pe yu kan feni sani di abi fu du nanga a Genootschap), no meki fu prati nyun publikâsi gi Yehovah Kotoigi. A marki fu a website na fu sori a publiki soifri san Yehovah Kotoigi e leri fu Bijbel.

No so langa pasa, wan prenspari sani ben poti na a website fu a Waktitoren Genootschap. A nyun sani disi na a brochure San Gado e aksi foe wi? di de fu feni na ini moro leki 220 tongo. Boiti dati, bigin nanga A Waktitoren fu 1 yanuari 2004 nanga na Ontwaakt! fu 8 yanuari 2004, dan na ini ala tongo na adres fu a website de fu si na tapu a lasti bladzijde fu ibri tijdschrift.

Fa yu kan gebroiki a sani disi? We, kande yu e miti wan sma di sori taki a wani sabi moro, ma a sma dati e taki wan tra tongo. Efu a sma abi na okasi fu gebroiki Internet, dan yu kan sori en na adres fu a website na tapu a lasti bladzijde fu A Waktitoren noso Ontwaakt! Na so wan fasi a sma man ondrosuku a San Gado e aksi-brochure na ini a tongo di a e frustan, teleki yu drai go baka na en nanga publikâsi di de na ini a tongo di a sma e taki. Noso, kande yu kan gi a nen nanga na adres fu a sma disi na a gemeente, noso a grupu di e taki a tongo fu en.