Brifi fu a bijkantoro

Lobi Kownukondre preikiman:

Wi breiti fu si fa a wroko go na fesi na ini Sranan na ini a dienstyari 2007! Na ini mei wi ben abi wan heimarki fu 2185 preikiman, èn disi ben de 9 procent moro leki na ini a mun mei 2006. Na ini april, 3116 bijbelstudie ben hori, èn 16.541 gobaka ben tyari. Na ini a dienstyari di pasa, 114 sma teki dopu fu sori taki den gi den libi abra na Yehovah. Wi ben abi wan heimarki tu fu sma di ben kon na den difrenti bigi konmakandra. Moro leki 4177 sma ben kon na den spesrutu dei konmakandra, 4676 sma ben kon na den kring konmakandra, èn 5091 sma ben kon na den kongres di ben hori a yari di pasa.

A spesrutu kotoigiwroko di wi ben du bifo a „Frulusu de krosibei!” Distrikt Kongres fu 2006, ben abi bun bakapisi. Wan brada ben poti en leki marki fu gi dri sma na en wrokope wan kari fu kon na a kongres. Wán fu den sma disi ben kon na a kongres, aladi disi ben meki taki a kisi trobi nanga a man di a ben hori nanga en. A waarheid ben abi krakti tapu na uma disi, èn te fu kaba a ben abi krakti sosrefi tapu a man di no ben wani arki na a bigin. A man abi na overtoigi now taki a feni a waarheid. A pikin sisa fu na uma disi ben si tu fa a waarheid ben abi krakti tapu den. Bakaten na uma trow nanga a man di a ben hori nanga en. Sensi a ten dati den dri sma disi de tapu a Theokrasia Diniwroko-skoro, èn den e go na fesi so taki den kan teki dopu. A brada ben breiti srefisrefi taki a ben teki a deki-ati fu gi den sma fu en wrokope wan kari, fu di na so fasi a ben man yepi wan tu sma fu kisi ’frulusu so taki den no e go na srakti’.—Odo 24:11.

A marki di wi wani doro nanga den kotoigiwroko soleki a wan disi, na fu yepi opregtisma fu kon sabi san Bijbel e leri trutru (Mat. 28:19, 20). Sorgu taki te yu e preiki, èn te yu e miti sma di wani sabi moro, taki yu go baka na den nanga a marki fu bigin wan bijbelstudie. Wi breiti fu wroko makandra leki wán man nanga unu fu du a tumusi prenspari wroko disi, èn wi e seni unu wi Kresten lobi.

Un brada,

Bijkantoro fu Sranan