No draidrai fu hori wan bijbelstudie!
1. Na sortu fasi wi no e meki noti ’tapu wi fu du bun’?
1 Te wi de fayafaya fu meki a bun nyunsu fu Gado Kownukondre bekènti, dan wi no e meki noti ’tapu wi fu du bun’ gi den sma na ini a kontren pe wi e preiki (Odo 3:27). Wan moro bun boskopu no de di wi kan prati nanga sma, leki a boskopu di e taki dati wan moro bun ten o kon te Gado o tiri grontapu. Kande yu e du furu muiti kaba fu fruteri sma a Kownukondre howpu, fu di yu e gi kotoigi te yu e kisi na okasi, noso fu di yu e prati publikâsi. Ma efu yu no e hori wan bijbelstudie ete, dan fu san ede yu no e poti en leki marki fu du dati?
2. San kan tapu wi fu bigin wan bijbelstudie?
2 Wan fu den moro bigi sani di kan tapu wi fu hori wan bijbelstudie son leisi, na a fasi fa wisrefi e denki fu a tori dati. Son sma no e hori bijbelstudie fu di den e feni taki den no bun nofo fu du dati, noso fu di den abi furu fu du na ini den aladei libi. Kande den sani di e kon now kan yepi yu fu no draidrai fu hori wan bijbelstudie.—Mat. 28:19; Tori. 20:20.
3. Fu san ede wi bun nofo fu gi sma leri fu Bijbel?
3 Te wi feni taki wi no bun nofo: Kande yu no kisi furu skoroleri, noso kande wan tra sani kan meki yu feni taki yu no bun nofo fu man hori wan bijbelstudie. Kresten dinari fu a fosi yarihondro ben abi bun bakapisi na ini a preikiwroko, aladi den ’no ben kisi furu skoro èn den ben de neleki ala tra sma’. San meki taki den ben man leri trawan a waarheid? Den „ben gwenti fu de nanga Yesus” (Tori. 4:13). Den ben kisi leri fu a Gran Leriman, Yesus. Den sani di Yesus ben leri èn a fasi fa a ben gi leri, de fu feni te nanga a dei fu tide na ini Bijbel. Srefi efu yu no kisi furu skoroleri, toku yu e kisi a moro bun leri di de, fu di yu e kisi leri fu Gado èn yu e kon sabi san a abi na prakseri fu du.—Yes. 50:4; 2 Kor. 3:5.
4. San wi kan leri fu na eksempre fu Amos?
4 Son leisi Yehovah ben gebroiki profeiti fu piri-ai gi tiriman, noso gi tra sma di ben abi wan hei posisi. Sonwan fu den profeiti, soleki Amos, no ben abi wan kefalek wroko, èn den no ben de prenspari na ini a libimakandra. Amos ben taki: „Mi no ben de wan profeiti, èn mi no ben de a manpikin fu wan profeiti; ma mi ben de wan skapuman èn wan man di e kerfu den figa fu sikomoorbon” (Amos 7:14). Ma toku Amos no ben meki noti tapu en fu tyari a krutu boskopu fu Yehovah gi a priester Amasia di ben e anbegi wan pikin kaw (Amos 7:16, 17). Ala ten wi musu hori na prakseri taki wi e du a wroko fu Gado, èn taki na en o meki wi de bun nofo fu du a wroko di a gi wi fu du.—2 Tim. 3:17.
5. Fu san ede wi musu du muiti fu bigin wan bijbelstudie, srefi te wi abi furu fu du?
5 Te wi abi furu fu du: Srefi efu yu abi furu fu du, a kan de so taki yu poti ten na wan sei kaba fu teki prati na a preikiwroko doronomo. Wan fu den moro prisiri sani di yu kan ondrofeni na ini a diniwroko, na fu hori wan bijbelstudie. A de wan moi grani fu si fa a Wortu fu Yehovah abi krakti tapu wan sma en libi (Hebr. 4:12). Yehovah e prisiri te wi e gebroiki wi ten nanga wi krakti fu yepi sma fu „kon sabi a waarheid soifri” (1 Tim. 2:4). Srefi den engel e prisiri te wan sma abi berow fu a fasi fa a ben libi fosi èn te a e go na fesi fu tron wan moro bun futuboi fu Gado.—Luk. 15:10.
6. Sortu bigi grani wi e kisi te wi e du a wani fu Gado?
6 Gado „wani taki ala sortu sma musu kisi frulusu èn taki den musu kon sabi a waarheid soifri” (1 Tim. 2:4). A de wan bigi grani fu du wan wroko di e meki a wani fu Gado kon tru. Fu dati ede wi no e draidrai fu hori bijbelstudie.