Wi e hari sani puru di rutu dipi na ini sma ati
1 Hondrohondro yari langa, Satan gebroiki falsi leri fu kori na ati èn a denki fu furu sma. A meki sma bribi na ini leri soleki a Dri-wánfasi, a leri taki a sili no e dede, èn a leri fu a helfaya. A meki sma tweifri efu wan Mekiman de trutru, èn efu na Gado skrifi Bijbel. A desko di sma e desko trawan fu wan tra ras, èn a denki di sma abi taki a kondre fu den bun moro tra kondre, na tra sani di e tapu sma fu kon na ini a tru anbegi (2 Kor. 4:4). Fa wi kan overtoigi sma taki den denki noso den leri disi di rutu dipi na ini den ati, no bun?—2 Kor. 10:4, 5.
2 Sani di rutu dipi na ini sma ati: Nofo tron kerkileri di sma e poti bribi na ini, rutu dipi na ini den ati. Son sma poti tranga bribi na ini falsi leri sensi di den ben yongu. Fu man yepi den sma disi, wi musu taki na wan fasi di e sori taki wi e lespeki a denki fu den.—1 Petr. 3:15.
3 Wi kan sori lespeki gi den sma disi, fu di wi o gi den na okasi fu fruteri san den e bribi èn fu san ede den e bribi dati (Yak. 1:19). Kande den e bribi trutru taki a sili no e dede, fu di den lasi lobiwan na ini dede èn den angri fu si den sma dati baka. Noso den e hori fesa fu di den lobi den okasi disi fu de makandra nanga den famiri. Te wi e arki san den e taki, dan wi sa man frustan fa den e denki èn dati sa yepi wi fu kon sabi fa wi kan taki na wan bun fasi nanga den.—Odo 16:23.
4 Teki na eksempre fu Yesus: Yesus gi wi wan bun eksempre, di a gi piki tapu den aksi fu wan man di ben sabi a Wet bun. Yesus no ben taigi a man san a musu du, bika a kan taki a man no ben o arki den sani dati fu di a ben e hori steifi na san a ben e bribi. Na presi fu dati, Yesus sori go na den Buku fu Bijbel, èn a aksi a man fu taki fa a e denki. Baka dati, Yesus gebroiki wan agersitori fu yepi a man fu kisi a yoisti denki fu sani.—Luk. 10:25-37.
5 Gado Wortu kan meki taki sma no poti bribi moro na ini den falsi kerkileri disi (Hebr. 4:12). Te wi e fruklari den tru tori fu Bijbel nanga pasensi gi sma, dan dati kan naki na ati fu den. Na so fasi wi man yepi den fu no poti bribi moro na ini falsi leri èn den kan teki a waarheid di kan meki den kon fri.—Yoh. 8:32.