Wi musu horidoro na ini a preikiwroko
1 Moro leki 30 yari langa, na apostel Paulus ben abi prisiri na ini a diniwroko, di ben de a moro prenspari wroko gi en. Neleki fa a de nanga ala bun sani di wi e meki muiti fu du, na so Paulus ben kisi fu du nanga wan tu problema na ini a preikiwroko (2 Kor. 11:23-29). Ma Paulus no ben tapu fu preiki (2 Kor. 4:1). A ben frustan taki na Yehovah ben o gi en a krakti fu horidoro na ini a diniwroko fu en (Fil. 4:13). Fu di Paulus ben tan horidoro, meki a ben man taki: „Waka baka na eksempre fu mi, neleki fa mi e waka baka na eksempre fu Krestes.”—1 Kor. 11:1.
2 Horidoro na ini a ten disi: Ibri dei, sma e spotu furu brada nanga sisa fu wi, sma e gens den, noso den e kisi fu du nanga famiriman, sma na wrokope, noso sma na skoro di no wani arki den (Mat. 10:35; Yoh. 15:20). Kande yu e ondrofeni den sani dati tu. Na a tra sei, a kan de so taki yu abi problema nanga a gosontu fu yu. Noso a kan taki yu musu du muiti ibri dei fu sani no hari yu prakseri, bika dati ben kan meki yu lasi bribi. Noso a de so tu, taki yu e kisi tesi di kan meki taki yu no man horidoro moro. Wi kan kisi krakti fu horidoro, te wi e luku na eksempre fu den futuboi fu Gado na ini owruten di tan gi yesi na En. San kan yepi wi tu na te wi e luku na eksempre fu wi Kresten brada nanga sisa na ini a ten disi di kisi tesi èn di horidoro na ini muilek ten.—1 Petr. 5:9.
3 Wi kan kisi krakti fu tan du wi diniwroko, te wi e sorgu taki wi ’abi ala den sani di Gado gi wi fu feti’ (Ef. 6:10-13, 15). A prenspari fu begi Gado, so taki wi kan horidoro. Gado e gi wi en santa yeye, so taki wi kan horidoro te wi e kisi tesi (2 Kor. 6:4-7). Fu man feti teige Satan èn teige a grontapu fu en, dan wi musu gi yesi na den frumane fu Gado, di o gi wi krakti baka (Ps. 119:24, 85-88). Neleki fa wan pikin kan leisi wan brifi fu en lobi-ati papa ibri tron baka, na so wi e kon abi wan moro bun matifasi nanga Yehovah te wi e leisi Bijbel ibri dei. Wi e kon kisi a koni fu kakafutu gi tesi, te wi e studeri doronomo. Na so wi e meki a denki fu Gado abi krakti tapu den bosroiti di wi e teki èn a e yepi wi fu horidoro.—Odo 2:10, 11.
4 Wi o kisi blesi te wi e horidoro: Neleki fa a ben de nanga Paulus, na so a de tu taki te wi e tan horidoro na ini wi diniwroko, dan wi o prisiri na ati fu Yehovah. Leki bakapisi fu dati, wi èn sosrefi trawan o kisi blesi (Odo 27:11). Meki a de so taki wi abi a fasti bosroiti fu tan horidoro na ini a diniwroko, fu di na so fasi wi o sori taki a bribi fu wi tranga èn taki a „warti moro gowtu di e lasi gowe aladi faya meki a kon soifri”.—1 Petr. 1:6, 7.