Wan spesrutu wroko fu gi sma wan kari fu kon na a Memrefesa!
1. San Kownukondre preikiman sa du na heri grontapu bigin fu 21 maart 2009, èn fu san ede?
1 Tapu fodewroko 9 april 2009, anbegiman fu Yehovah Gado na heri grontapu, sa kon makandra fu memre a prenspari okasi pe Gado sori bigi lobi gi libisma (Rom. 5:6-8). Wi e fruwakti taki milyunmilyun sma di wani sabi moro, sa kon makandra nanga wi fu memre a dede fu Yesus. Bigin fu 21 maart, wi sa prati wan spesrutu papira na heri grontapu, fu kari sma kon na a Memrefesa.
2. San wi musu hori na prakseri te wi e gi sma wan kari?
2 Sani di wi musu hori na prakseri: Gebroiki den prenki, den aksi nanga a tekst di skrifi na tapu a papira. Fu eksempre, yu kan sori sma a prenki na fesisei èn taki: „Mi wani gi yu wan kari fu kon makandra nanga wi tapu fodewroko 9 april 2009, fu memre a dede fu Yesus.” Baka dati, sori a sma den wortu di skrifi bigi èn sori a sma den aksi di skrifi na ondro. No frigiti fu taigi na ososma taki a kan tyari en osofamiri nanga tra sma kon tu.
3. San yu kan du te yu gi sma wan kari kaba?
3 Efu a gemeente fu yu abi wan bigi kontren fu wroko, dan den owruman kan taigi yu fu libi den papira na den oso pe sma no de. Tapu satra nanga sonde, wi sa prati den tijdschrift makandra nanga den papira disi. Poti en leki marki fu kari den gobaka fu yu, den Bijbelstudie, yu famiriman, sma na skoro, sma na wrokope, birtisma, nanga tra sma di yu sabi. A yari di pasa, wan sisa ben kari 30 fu den famiriman fu en, èn a ben tan memre den ibri leisi baka o prenspari na okasi disi de. A ben breiti taki 25 fu den sma disi kon na a Memrefesa, èn taki fo fu den ben wani studeri Bijbel!
4. Sortu sani wi musu seti now, èn fu san ede?
4 Seti sani now: Furu preikiman kan du moro na ini a preikiwroko na ini maart nanga april. Efu yu abi pikin noso Bijbelstudie di go na fesi, dan disi kan de wan moi okasi gi den fu tron preikiman di no dopu ete. Now na a ten fu bigin seti sani, so taki yu kan abi wan prati na a wroko disi fu gi sma wan kari fu kon memre na okasi di Gado nanga Yesus sori bigi lobi gi wi.—Yoh. 3:16; 15:13.