Sreka sani bun gi a Memrefesa

Den bakaman fu Krestes e feni en wan prisiri sani èn wan grani fu sreka densrefi bun gi a neti te wi sa memre a dede fu Yesus Krestes (Luk. 22:19). San na wan tu sani di wi musu du fu sreka gi a Memrefesa?

◼ A ten nanga a presi pe a Memrefesa o hori: Ibri sma musu frustan bun o lati èn pe a Memrefesa o hori. Efu moro leki wan gemeente o hori a Memrefesa na ini a Kownukondre zaal, dan a de prenspari fu doro biten èn fu gowe biten, fu di syatu baka dati a tra gemeente o bigin nanga a Memrefesa fu den. A de prenspari fu sorgu taki ala sani waka na wan bun fasi te sma e kon na ini a Kownukondre zaal, aladi trawan e gowe. Den musu seti sani bun tu fu no meki sani waka bruyabruya na seipasi pe sma e waka èn pe sma e poti den wagi.

◼ A papira fu kari sma gi a Memrefesa: Den preikiman abi nofo fu den papira fu kari sma gi a Memrefesa, èn den sabi san skrifi na tapu a papira disi? Yu oefen kaba san yu o taki te yu o gi sma a papira disi? Suma yu o gi wan kari? Wi musu du muiti fu prati ala den papira disi.

◼ Fa yu o go na a Memrefesa: Kande son sma di wi gi wan kari, èn sosrefi son brada nanga sisa, sa abi yepi fanowdu fu kon na a Memrefesa, noso kande den sa abi tra yepi fanowdu. Sortu sani seti fu yepi den sma disi?

◼ A brede nanga a win: Sorgu taki a brede nanga a win prati baka te son dongo. Sani musu seti fu tyari a brede nanga a win gi iniwan fu den salfuwan di siki èn di no man kon na a Memrefesa. Un musu abi a yoisti brede nanga win, èn un musu poti den na ini preti nanga grasi di fiti. Un musu du dati fosi a konmakandra bigin.—Luku A Waktitoren fu 15 februari 2003, bladzijde 14, 15, paragraaf 14, 17.

◼ A Kownukondre zaal: A zaal musu krin bun wan pisi ten na fesi. Un musu tyari preti, win grasi, wan bun tafra nanga tafraduku go na a zaal, bifo a konmakandra bigin. Efu unu e hori a Memrefesa na wan tra presi, dan sorgu taki a geluid bun, so taki ala sma di de drape kan yere a takiman. Den owruman musu luku suma den o poti leki zaal-waktiman èn suma den o teki fu prati a brede nanga a win. Den musu sori den brada disi na fesi san den musu du èn fa den musu du dati. Den brada musu sorgu den skin bun èn den musu weri krosi di fiti na okasi dati.

Na a tumusi prenspari okasi disi, pe wi o memre a dede fu Yesus Krestes, ibriwan fu wi èn sosrefi a heri gemeente wani sreka sani bun. A no de fu taki dati Yehovah sa blesi ala sma di sori taki den abi furu warderi gi san a du gi libisma, nanga yepi fu na ofrandi fu en lobi Manpikin, Yesus Krestes.