Gi leri na sma di no man leisi bun
1. San kan muilek gi wi na ini a diniwroko?
1 Te wi e du wi diniwroko, dan son leisi wi e miti sma di no man leisi bun. A muilek fu leri den sma disi den tru tori fu Bijbel. San wi kan du?
2. Fa wi kan sori lespeki gi sma di no man leisi bun, èn fu san ede wi musu du dati?
2 Sori lespeki gi den: A no a skoroleri di wan sma kisi prenspari gi Yehovah, ma na a fasi fa a sma en ati de (1 Sam. 16:7; Odo 21:2). Fu dati ede, wi no e wisiwasi sma di no man leisi bun. Te wi e sori lespeki gi den sma disi èn te wi abi pasensi nanga den, dan den o wani taki wi yepi den (1 Petr. 3:15). Dati wani taki dati wi no o dwengi a sma fu leisi wan tekst noso wan paragraaf. Te wan sma e kon sabi den warti tru tori fu Bijbel, dan kande a o wani du muiti fu leisi moro bun, so taki a kan kisi a prisiri fu leisi Gado Wortu „nanga wan safri sten dei nanga neti”.—Ps. 1:2, 3.
3. Na sortu fasi wi kan gi leri na sma di no man leisi bun?
3 Difrenti fasi fa wi kan gi leri na Bijbelstudenti: A bun fu gebroiki prenki fu gi sma leri èn fu yepi den fu memre den sani di den leri. Yu kan aksi wan studenti san a e si na tapu a prenki na ini a publikâsi di yu e gebroiki. Baka dati, yu kan poti spesrutu aksi fu yepi en frustan san a prenki e leri. Gebroiki Bijbeltekst di e taki fu spesrutu sani di yu wani tyari kon na krin nanga yepi fu a prenki. Yu kan gebroiki den prenki tu fu luku baka san unu ben leri. No studeri tumusi furu sani na ini wán leisi. Poti krakti tapu a nen fu a lès èn den moro prenspari tori. No taki fu sani di no de na ini a pisi di unu e studeri. Leisi den Bijbeltekst langalanga fu Bijbel, èn poti aksi fu kon sabi efu a studenti frustan san unu leisi. Disi kan meki taki a studenti sa wani du muiti fu leisi moro bun, so taki ensrefi kan ondrosuku moro tru tori fu Bijbel.
4. Fa wi kan yepi wi studenti fu leisi moro bun?
4 Sani di kan yepi den fu leisi moro bun: Sma di no man leisi bun, noso sma di no kisi na okasi fu leri leisi grati, kan frustan den sani di den e leri èn den kan hori den sani dati bun na ede. Yu kan gi den sma disi deki-ati fu arki den publikâsi fu wi di de tapu cassette. Den kan arki a leisiman bun, aladi den e leisi na ini den eigi buku, èn den kan taki den wortu tu nanga wan safri sten. Dati sa yepi den fu leisi moro bun. A brochure Du Muiti fu Leisi èn fu Skrifi kan de wan yepi tu. Na ini son kontren, den owruman kan seti wan leri leisi skoro na ini a gemeente. Den bun rai disi kan yepi wi fu gi leri na sma di no man leisi bun, so taki den kon frustan „den santa buku” di kan meki den kon koni, fu man kisi frulusu.—2 Tim. 3:15.