Fa fu yepi den sma di no sabi leisi bun

1. Sortu problema e miti wi te wi wani studeri nanga den sma di no sabi leisi bun?

¹ A kan taki ososma di no sabi leisi bun wani leri sani fu Gado. Ma kande den e feni en muilek fu leisi Bijbel nanga tra buku. A kan taki te yu e pristeri den sma disi a Bijbel leri-buku, dan den no wani en. Fa wi kan yepi den sma di no sabi leisi, fu kon sabi Gado? Wi ben aksi lepi preikiman fu moro leki 20 kondre san den e du. Den sani di den taki de na ini den paragraaf di e kon.

2. San wi kan gebroiki fu yepi wan sma di no sabi leisi bun?

² Efu a studenti sabi leisi pikinso nomo, noso efu a no sabi leisi srefisrefi, dan yu kan bigin studeri wan brochure nanga en. Kande yu kan gebroiki a brochure Arki Gado, noso Arki Gado èn libi fu têgo. Wan pionier fu Amerkankondre e sori a sma ala tu brochure èn a e aksi en sortuwan a man leisi moro bun. A bijkantoro fu Kenia e taki dati den brochure disi de heri bun gi a preikiwroko. Disi de so fu di na ini Afrika sma abi a gwenti fu fruteri wan tori di e leri tra sma wan sani, na presi fu hori wan aksi nanga piki takimakandra nanga sma. Wan sma di kisi bun skoro no e feni en muilek kande fu leisi den paragraaf na ini wan buku èn fu piki den aksi. Ma a sani disi kan muilek gi wan sma di no kisi furu skoro. Furu preikiman e bigin studeri den brochure Gado abi bun nyunsu gi wi!, Yu kan de Gado mati!, noso Mi buku nanga Bijbel tori te den e si taki a sma man leisi pikinso.

3. San wi musu hori na prakseri te wi o studeri nanga wan sma di no sabi leisi?

³ Prèise a sma: Den sma di no sabi leisi kan firi syen èn furu fu den sma disi e denki taki den no warti noti. A fosi sani di yu kan du fosi yu gi den Bijbel leri, na fu yepi den fu no firi syen. Furu sma di no sabi leisi abi a frustan fu man leri sani. No taki nanga den neleki den na pikin-nengre, ma sori lespeki gi den (1 Petr. 3:15). Te den e si taki den e go na fesi èn taki den e leri sani fu Bijbel, dan den o kisi deki-ati fu go doro nanga a Bijbelstudie. Dati meki yu musu prèise den furu tron gi a muiti di den e meki.

4. Fa wi kan yepi den wan di sabi leisi pikinso nomo fu sreka gi a Bijbelstudie?

⁴ Awansi a studenti sabi leisi pikinso nomo, toku yu musu gi en deki-ati fu sreka gi a studie. Son preikiman na ini Zuid-Afrika e gi den studenti deki-ati fu aksi wan famiriman noso wan mati di sabi leisi, fu yepi den. Te wan preikiman na ini Ingrisikondre wani sori den studenti fa den musu sreka, dan a e meki den gebroiki en buku fu leisi wan tu paragraaf. Na so den kan si taki a moro makriki fu feni den piki te yu hari strepi na ondro èn a sani disi e gi den deki-ati fu sreka gi a studie. Wan brada na ini India e taigi den studenti meki den luku den prenki fu a les di den o du a wiki di e kon èn meki den denki fu den.

5. Fa wi kan abi pasensi te wi e hori wan Bijbelstudie nanga wan sma di no sabi leisi bun?

⁵ Abi pasensi: Awansi sortu publikâsi yu e gebroiki, poti prakseri na den moro prenspari penti èn yepi a studenti fu frustan den bun. Na a bigin a moro bun kande fu studeri 10 te go miti 15 miniti. No pruberi fu studeri tumusi furu sani, ma kande yu kan studeri wan tu paragraaf nomo. Abi pasensi te a studenti e leisi den wortu wan-fru-wan. Te a e kisi moro warderi gi Yehovah, dan a o meki moro muiti fu leisi bun. Efu yu wani yepi en fu du dati, dan na a bigin kaba a ben o bun fu gi en wan kari fu kon na den konmakandra.

6. Fa wi kan leri sma fu leisi?

⁶ Te Bijbelstudenti e leri leisi, dan den o go na fesi moro esi (Ps. 1:1-3). Furu preikiman yepi den Bijbelstudenti, di den gebroiki a buku Du Muiti fu Leisi èn fu Skrifi. Ibri leisi te den ben kaba studeri, dan den ben teki wan tu miniti fu yepi a sma nanga a buku disi. Efu a studenti e lasi-ati, dan yu kan sori en wan tu sani di a ben leri na ini a ten di pasa, fu gi en deki-ati. Taigi en taki Yehovah o blesi a muiti di a e meki, èn gi en deki-ati fu begi Yehovah fu yepi en (Odo 16:3; 1 Yoh. 5:14, 15). Son preikiman na ini Ingrisikondre e gi den studenti deki-ati fu poti marki di den kan doro. Den e bigin leri na alfabet fosi, dan den leri fu feni èn leisi wan tu Bijbeltekst, èn te fu kaba den kan pruberi fu leisi Bijbel publikâsi di makriki. Boiti taki yu e yepi sma fu leri leisi, yu musu leri den tu fu lobi leisi.

7. Fu san ede wi no musu frede fu preiki gi den sma di no sabi leisi bun?

⁷ Yehovah no e wisiwasi den sma di no kisi furu skoro (Yob 34:19). Na a ati fu den sma Yehovah e ondrosuku (1 Kron. 28:9). Sobun, no frede fu preiki gi den sma di no sabi leisi bun. Yu abi furu moi brochure di yu kan gebroiki. Bakaten yu kan studeri a Bijbel leri-buku nanga a sma so taki a kan frustan Bijbel moro bun.