Gebroiki Bijbel na wan bun fasi
1. Fa wi kan gebroiki Bijbel na wan bun fasi?
1 Te wi e gebroiki Gado Wortu bun, dan wi o man preiki gi sma èn wi o man leri den a waarheid na wan fasi di den man frustan bun. Boiti dati, wi o man sori den san na den falsi leri, nanga den gwenti di no e kruderi nanga Bijbel.—2 Tim. 2:15; 1 Petr. 3:15.
2. San o yepi wi fu feni Bijbeltekst moro makriki?
2 Kon sabi Bijbel moro bun: Te yu e gebroiki wan wrokosani furu leisi, dan te fu kaba yu o sabi wroko bun nanga en. Te yu e leisi Bijbel fu a bigin te go miti a kaba, dan yu o kon sabi san na a moro prenspari sani di Bijbel e taki fu en. Boiti dati, yu o man memre Bijbeltekst moro bun èn yu o man feni den moro gaw. Te yu kon sabi Bijbel moro bun, dan yu o man taki nanga moro faya èn yu o man overtoigi sma, te yu e gi kotoigi na wan okasi èn na ini a preikiwroko.—1 Tes. 1:5.
3, 4. (a) San na wan tu sani di wi kan du fu kon sabi Bijbel moro bun? (b) Sortu tra sani yu e du fu kon sabi Bijbel moro bun?
3 Abi a gwenti fu opo yu Bijbel èn fu leisi den tekst te yu de na den gemeente konmakandra. Te yu e studeri Bijbel, èn te yu e sreka gi den gemeente konmakandra, dan suku den Bijbeltekst èn denki dipi fu a fasi fa yu kan fiti den. Furu sma kon si taki a moro bun fu leisi den tekst langalanga na ini den Bijbel, na presi fu leisi den fu computer, noso fu wan papira. Disi e yepi den fu feni den tekst moro makriki te a de fanowdu na ini a preikiwroko.—Yoh.14:26.
4 Son osofamiri poti wan spesrutu ten te den e leri fu hori Bijbeltekst na ede. Den e gebroiki wan pisi papira pe den e skrifi wan Bijbeltekst na tapu, èn na a tra sei fu a papira den e skrifi pe a tekst de fu feni. Wan-fru-wan den e gebroiki den papira disi fu si efu den hori a tekst na ede noso efu den sabi pe a skrifi. Te wi e oefen den takimakandra di wi o hori na ini a preikiwroko, noso a fasi fa wi o gebroiki Bijbel fu gi piki, dan dati e yepi wi tu fu gebroiki Bijbel bun.
5. Fu san ede wi wani leri fu gebroiki Bijbel moro bun?
5 Nowan tra buku warti moro Bijbel. Na ini Bijbel wawan sani skrifi di kan meki sma ’kon koni, so taki den kan kisi frulusu’ (2 Tim. 3:15). Furu sma di wi e miti na ini a preikiwroko no sabi den tumusi moi sani di skrifi na ini Bijbel. Fu dati ede, wi abi bun reide fu leri fa fu gebroiki Bijbel moro bun, so taki wi kan sori den san Bijbel e leri trutru.—Odo 2:1-5.