San na a moro prenspari sani gi wi?
1. Fa Yesus ben sori taki a diniwroko ben de prenspari gi en?
1 A diniwroko ben de a moro prenspari sani gi Yesus. A ben wroko tranga, èn a ben e waka furu hondrohondro kilometer na ini a heri kontren fu Palestina, fu man preiki gi so furu sma leki a ben man. A no ben abi furu sani na ini en libi, èn fu dati ede a ben kan gi moro ten na a diniwroko èn a ben man poti moro prakseri na dati (Mat. 8:20). Di den ipi-ipi sma ben pruberi fu tapu en fu gowe so taki a ben o dresi den sikisma, a taigi den: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon.”—Luk. 4:43.
2. Fu san ede a diniwroko ben de so prenspari gi Yesus?
2 Fu san ede a diniwroko ben de so prenspari gi Yesus? A moro prenspari sani gi en, ben de taki a nen fu Yehovah ben musu kon santa (Mat. 6:9). A ben lobi en hemel Tata èn fu dati ede a ben wani du a wani fu En èn gi yesi na ala den komando fu en (Yoh. 14:31). Boiti dati, a ben broko en ede trutru nanga sma èn a ben wani yepi den.—Mat. 9:36, 37.
3. Fa wi kan sori taki a diniwroko na a moro prenspari sani gi wi?
3 Teki na eksempre fu Yesus: Te wi wani tan poti a diniwroko na a fosi presi na ini wi libi soleki fa Yesus ben du dati, dan dati kan muilek fu di a grontapu disi e teki furu fu wi ten èn furu sani de di kan puru wi prakseri na a diniwroko (Mat. 24:37-39; Luk. 21:34). Fu dati ede, wi musu hori na prakseri san na den moro prenspari sani. Wi kan du dati, te wi e poti ten na wan sei fu sreka wisrefi gi a preikiwroko èn fu teki prati na dati doronomo (Fil. 1:10). Wi e du muiti fu libi soso nanga den sani di wi abi trutru fanowdu èn wi e luku bun taki wi no e gebroiki den sani fu grontapu dorodoro.—1 Kor. 7:31.
4. Fu san ede wi musu tan poti den moro prenspari sani na a fosi presi?
4 Te furu ten no de, dan wan koni sma e du den moro prenspari sani fosi. Fu eksempre, efu wan sma ben o sabi taki wan bigi winti o wai, dan a ben o gi en ten nanga en krakti fu seti sani fu kibri en osofamiri èn fu warskow den birtisma fu en. A no ben o du sani di no de so prenspari. A ten di tan abra fosi Armagedon kon, kon syatu (Sef. 1:14-16; 1 Kor. 7:29). Efu wi wani kibri wisrefi nanga den wan di e arki wi, dan wi musu tan poti prakseri na wisrefi èn na a fasi fa wi e gi leri na ini a gemeente èn dorosei fu a gemeente (1 Tim. 4:16). Iya, wi o kisi frulusu soso te wi e tan poti a diniwroko na a fosi presi na ini wi libi!