Mi e du nofo?
1. Sortu broko-ede wan Kresten di e tan horidoro, kan abi?
1 Yu aksi yusrefi a sani disi kaba? Kande yu no e du so furu moro na ini a diniwroko fu di yu kon owru, fu di a gosontu fu yu go na baka, noso fu di yu kon kisi moro frantwortu na ini yu osofamiri. Kande den sani disi e meki yu lasi-ati. Wan sisa di abi dri pikin ben skrifi taki son leisi a e firi leki a du wan sani di fowtu, fu di a ten nanga a krakti di de fanowdu fu sorgu gi en osofamiri e meki taki a no man du so furu na ini a diniwroko. San kan yepi wi fu si sani na a yoisti fasi?
2. San Yehovah e fruwakti fu wi?
2 San Yehovah e fruwakti fu wi: A no de fu taki dati wi alamala wani du moro na ini a diniwroko. Ma nofo tron wan bigi difrenti de na mindri san wi ben o wani du èn san wi kan du trutru. Efu wi wani du moro, dan dati e sori taki wi abi a yoisti denki. Wi musu hori na prakseri taki Yehovah sabi heri bun san wi no man du, èn a no e fruwakti moro fu wi leki san wi man du trutru (Ps. 103:13, 14). San a e fruwakti fu wi? A wani taki wi dini en nanga wi heri sili, noso taki wi du ala san wi man gi en.—Kol. 3:23.
3. Fa wi kan ondrosuku efu wi e du nofo na ini a diniwroko?
3 San sa yepi wi fu kon si san wi kan du trutru? Wi kan aksi Yehovah fu yepi wi fu si a situwâsi fu wi soleki fa a de trutru (Ps. 26:2). Wan lepi Kresten mati di wi e frutrow èn di sabi wi bun, no o frede fu taigi wi efu wi kan du moro. Boiti dati, so wan mati o yepi wi tu (Odo 27:9). Hori na prakseri tu taki fu di a libi fu wi e kenki, meki a bun efu ten na ten wi e ondrosuku a situwâsi fu wi.—Ef. 5:10.
4. Fa wi musu si den Bijbel rai di abi fu du nanga a diniwroko?
4 Fa wi musu si den rai di wi e kisi: Na ini wan streilon, sma de di e bari sani fu gi den sma di e lon deki-ati. Den e du disi fu yepi den sma di e lon, doro a marki fu den, èn no fu meki den lasi-ati. Na so a de tu, taki wi e kisi deki-ati fu Bijbel èn wi e kisi rai na den konmakandra fu wi èn na ini den publikâsi fu wi fu ’preiki a wortu fayafaya’. Den sani disi a no fu meki wi firi taki wi no e du nofo muiti, ma den de gi a bun fu wi (2 Tim. 4:2). Wi kan de seiker taki solanga wi e tan du ala san wi man, Yehovah no sa frigiti a ’wroko nanga a lobi’ fu wi.—Hebr. 6:10.