Yu o bigin wan Bijbelstudie na ini oktober?
1. San wi o pristeri na ini oktober?
1 Na ini oktober wi o pristeri a Waktitoren nanga na Ontwaakt! Te wi o go baka na wan sma di ben arki, dan wi kan gebroiki a traktaat Yu wani sabi a piki tapu den aksi disi? èn wi kan du muiti fu bigin wan Bijbelstudie. Fa wi kan du dati te wi e go baka na a ososma?
2. Fa wi kan gebroiki a traktaat Yu wani sabi a piki tapu den aksi disi? fu bigin wan Bijbelstudie te wi e go baka na wan sma di teki den tijdschrift?
2 Fa fu gebroiki a traktaat: Wi kan taki: „Den tijdschrift di mi ben libi gi yu e gi sma fu difrenti kulturu nanga bribi a deki-ati fu ondrosuku Bijbel. [Gi na ososma a traktaat Yu wani sabi a piki tapu den aksi disi? èn sori en den aksi na fesisei.] Dyaso wan tu moi aksi skrifi èn Bijbel e gi bun piki tapu den aksi disi. Oiti yu aksi yusrefi wan fu den sani disi?” Baka te na ososma gi piki, luku makandra nanga en na ini a traktaat san na a piki tapu wan fu den aksi fu en. Baka dati, leisi wan fu den tekst di kari. Taigi na ososma taki disi na wan eksempre nomo fu den sani di Bijbel e leri, èn gi en a Bijbel leri-buku. Te a sma luku den difrenti nen fu den kapitel na ini a buku èn a taki sortuwan a feni moi, dan wi kan taki nanga en fu den fosi paragraaf fu a kapitel dati. Noso wi kan taki moro fu a tori di unu ben luku na ini a traktaat èn di a buku e taki fu en. Luku pe wi kan feni wan tu moi tori:
● Gado e broko en ede nanga wi trutru? (blz. 9-11, par. 6-10)
● Wan ten o kon pe sma no o feti noso pina moro? (blz. 11, par. 12, 13)
● San e pasa nanga wi te wi dede? (blz. 59, 60, par. 7, 8)
● Howpu de gi den dedewan? (blz. 71, par. 13-15)
● Fa mi musu begi efu mi wani taki Gado arki mi? (blz. 166, 167, par. 5-8)
● Fa mi kan abi wan koloku libi? (blz. 9, par. 4, 5)
3. San na wan tu difrenti sani di wi kan du te wi go baka na sma?
3 A no de fu taki dati te wi no abi na okasi fu bigin wan Bijbelstudie nanga a Bijbel leri-buku a fosi leisi te wi go baka na a ososma, noso wi no man sori en fa wan Bijbelstudie e hori, dan wi kan seti sani fu go baka na en wan tra leisi fu taki moro fu a tori. Te a sma no wani sabi so furu, dan wi kan taki fu den tra aksi na ini a traktaat te wi go baka na en, fosi wi e pristeri a buku. Meki wi gebroiki a moi traktaat disi na ini oktober fu bigin wan Bijbelstudie èn fu yepi reti-ati sma fu kon „sabi a waarheid”.—Yoh. 8:31, 32