Ala ten wi musu de klariklari fu preiki
1. Fa wi du sabi taki den preikiman fu a fosi yarihondro ben de klariklari fu preiki ala ten?
1 Den fayafaya preikiman fu a fosi yarihondro ben e preiki a bun nyunsu „doronomo” na ala presi pe sma ben de (Tori 5:42). Dati meki wi kan frustan taki te den ben e go oso fu oso den no ben waka pasa sma di de na pasi, sondro fu preiki gi den. Den no ben o meki wan okasi pasa tu fu preiki gi sma te den ben e bai sani na wowoyo, baka te den kaba preiki. Neleki Yesus, den ben de klariklari fu preiki ala ten.—Mark. 6:31-34.
2. Fa wi e sori taki wi na Yehovah Kotoigi?
2 De klariklari fu preiki ala ten: A nen fu wi, Yehovah Kotoigi, no e sori nomo san wi e du, ma a e sori tu suma na wi (Yes. 43:10-12). Fu dati ede, wi de klariklari ala ten fu opo taki gi a bribi fu wi, awinsi wi no de na ini na oso-fu-oso preikiwroko (1 Petr. 3:15). Yu e denki sortu situwâsi yu kan miti di o gi yu na okasi fu preiki, èn yu e denki san yu ben kan taki? Yu e tyari buku, noso tijdschrift fu gi sma di wani sabi moro? (Odo 21:5) Yu e preiki oso fu oso nomo, noso yu e preiki a bun nyunsu tu gi sma na tra presi efu yu abi na okasi?
3. San a wani taki fu preiki gi ala sma?
3 Preiki gi sma na ala sei: Na apostel Paulus ben taki dati a ben preiki „na fesi ala sma”, noso gi sma na ala sei, èn a ben preiki oso fu oso (Tori 20:20). Sobun, te wi e preiki na strati, na presi pe sma e koiri, na bisnis kontren, èn na tra presi, dan wi e preiki gi sma na ala sei. A tru taki na oso-fu-oso preikiwroko na a moro prenspari fasi èn a moro bun fasi fa wi e miti sma fu fruteri den a boskopu fu a Kownukondre. Toku a moro prenspari sani gi den preikiman fu a fosi yarihondro no ben de fu go na sma oso, ma fu miti sma. Den ben gebroiki ibri okasi fu taki fu den tru tori fu Bijbel. Iya, den ben du dati na fesi ala sma, te den ben kisi na okasi, èn te den ben go oso fu oso. Meki wi du muiti fu miti sma tu na ala presi so taki wi kan du wi diniwroko finifini.—2 Tim. 4:5.