Wi musu luku bun na ini a preikiwroko
1. Fu san ede wi musu luku bun te wi de na ini a preikiwroko?
1 „Leki skapu na mindri busidagu”, na so den futuboi fu Gado e preiki „na mindri den ogri sma fu a ten disi di e du kruktudu” (Mat. 10:16; Fil. 2:15). Wi e yere nyunsu fu borgu di e opo densrefi, fu grupu sma di e du ogri, èn fu sma di e teki trawan tyari gowe na wan ogri-ati fasi. Ala den sani disi e sori taki ogri sma e kon „ogri moro nanga moro” (2 Tim. 3:13). Sortu Bijbel gronprakseri o yepi wi fu „luku bun” na ini a preikiwroko?—Mat. 10:16.
2. Na ini sortu situwâsi a moro bun fu gowe libi a kontren èn fu go preiki na wan tra presi?
2 Du sani na wan koni fasi: Odo 22:3 e sori krin taki a de wan koni sani fu „go kibri” te wi e si taki ogri kan miti wi. De na ai! A situwâsi na ini wan kontren pe furu ogri no e pasa, kan kenki wantronso. Kande yu o si furu skowtu noso ipi-ipi sma na strati. Son leisi wan ososma di abi switifasi kan warskow wi gi wan sani. Na presi fu tan wakti fu si san e pasa, wan koni sma o gowe wantewante èn a o preiki go doro na wan tra presi.—Odo 17:14; Yoh. 8:59; 1 Tes. 4:11.
3. Fa wi kan fiti a gronprakseri fu Preikiman 4:9 na ini a preikiwroko?
3 Wroko nanga makandra: Preikiman 4:9 e taki: „Tu sma moro bun leki wán.” Kande yu gwenti wroko yu wawan na ini a preikiwroko sondro taki wan sani pasa nanga yu. Ma a de so te now ete taki sani no kan pasa nanga yu na ini a kontren dati? Na ini son kontren ogri no e pasa so furu. Ma na ini tra kontren a no bun taki wan sisa noso wan yonguwan e wroko en wawan oso fu oso, spesrutu te a kon dungru kaba. Soleki fa a sori, a moro bun fu de nanga wan tra sma di o man yepi wi (Preik. 4:10, 12). Wi alamala musu luku bun na ini a preikiwroko èn wi musu warskow trawan na ini a preikiwroko grupu tu te wi e si taki ogri kan miti den. Te yu o gowe, dan sorgu taki yu e piki wan fu den tra sma na ini a grupu.
4. San wi kan du fu sorgu taki sani e go bun nanga ala sma fu a gemeente?
4 Den owruman di ’e luku wi’ abi a frantwortu fu gi rai èn fu sori den preikiman fa den musu wroko na ini a kontren drape (Hebr. 13:17). Yehovah o blesi wi seiker te wi e sori taki wi leki Kresten abi sakafasi èn taki wi e wroko makandra nanga den owruman (Mika 6:8; 1 Kor. 10:12). Meki a de so taki ala den futuboi fu Gado e yepi fu preiki finifini na ini wi kontren, ma meki wi luku bun ala ten te wi e du dati.