Twarfu sani di e meki taki wi e preiki
Fu san ede wi e preiki a bun nyunsu èn e studeri nanga sma? A de so taki a moro prenspari sani di e meki taki wi du a preikiwroko, na fu yepi reti-ati sma fu waka na tapu a pasi di e tyari den go na libi? (Mat. 7:14) Dati na a fosi sani di kari na ondrosei, ma a no de a moro prenspari sani di e meki taki wi e preiki. San yu denki? Sortuwan fu den 12 sani di e meki taki wi e du a preikiwroko, na a moro prenspariwan?
1. Te wi e preiki, dan dati e yepi sma fu kisi libi.—Yoh. 17:3.
2. Te wi e du a preikiwroko, dan wi e warskow den ogri sma.—Esek. 3:18, 19.
3. A preikiwroko di wi e du e meki Bijbel profeititori kon tru.—Mat. 24:14.
4. Te wi e du a preikiwroko, dan wi e sori taki Gado e du sani na wan reti fasi. Nowan sma kan krutu Yehovah taki a kiri den ogri sma sondro fu gi den na okasi fu sori berow.—Tori 17:30, 31; 1 Tim. 2:3, 4.
5. Te wi e preiki, dan wi e du san wi de fruplekti fu du, èn dati na fu yepi sma di bai nanga a brudu fu Yesus fu tron wan mati fu Gado.—Rom. 1:14, 15.
6. Te wi e du a preikiwroko, dan wi no o abi brudu-paiman.—Tori 20:26, 27.
7. Wi musu du a preikiwroko fu man kisi frulusu.—Esek. 3:19; Rom. 10:9, 10.
8. Te wi e du a preikiwroko, dan wi e sori taki wi lobi tra sma.—Mat. 22:39.
9. Te wi e du a preikiwroko, dan wi e sori taki wi e gi yesi na Yehovah nanga en Manpikin.—Mat. 28:19, 20.
10. A preikiwroko na wan pisi fu na anbegi fu wi.—Hebr. 13:15.
11. Te wi e du a preikiwroko, dan wi e sori taki wi lobi Gado.—1 Yoh. 5:3.
12. A preikiwroko e yepi fu meki a nen fu Yehovah kon santa.—Yes. 43:10-12; Mat. 6:9.
Disi a no den wan-enkri sani di e meki taki wi e du a preikiwroko. Fu eksempre, te wi e preiki, dan dati e tranga a bribi fu wi èn a e gi wi a spesrutu okasi fu wroko makandra nanga Gado (1 Kor. 3:9). Ma a moro prenspari sani di e meki taki wi e du a preikiwroko, na nomru 12. Awinsi sma e arki noso den no e arki, toku a preikiwroko e yepi fu meki Gado nen kon santa èn a e meki taki Yehovah man piki a sma di e spotu en (Odo 27:11). Iya, prenspari sani de di e meki taki wi ’e gi sma leri doronomo èn e fruteri den a bun nyunsu’.—Tori 5:42.