Sreka gi a Memrefesa nanga wan prisiri ati
1. San wi kan du na a pisi ten fu a Memrefesa?
1 A Memrefesa na tapu tudewroko 26 maart na wan moi okasi fu de nanga prisiri gi a sani di Gado du fu frulusu wi (Yes. 61:10). Srefi bifo a Memrefesa, wi kan de nanga prisiri trutru. Disi o yepi wi fu sreka bun. Fa wi kan du dati?
2. Fu san ede wi e sreka gi a Memrefesa?
2 Sreka gi a Memrefesa: Aladi a Memrefesa makriki fu hori, toku a de wan tumusi prenspari fesa èn sani musu sreka bun na fesi, so taki wi no e frigiti den prenspari sani (Odo 21:5). Wi musu sabi o lati a Memrefesa o hori èn wi musu suku wan bun presi fu hori en. Wi musu abi a yoisti win nanga brede. Wi musu krin a presi pe wi o hori a fesa èn ala sani musu seti bun. A takiman musu sreka a lezing fu en bun tu. Den zaal-waktiman nanga den brada di o prati a win nanga a brede musu sabi san den musu du. A no de fu taki dati furu fu den sani disi du kaba. Fu di wi e warderi a lusu-paiman di e meki wi kisi frulusu, meki wi musu sreka wisrefi bun gi a santa dei disi.—1 Petr. 1:8, 9.
3. Fa wi kan sreka wi ati gi a Memrefesa?
3 Sreka wi ati: Te wi e sreka wi ati, dan a de prenspari taki wi e frustan heri bun san a Memrefesa wani taki (Esra 7:10). Dati meki wi musu teki ten fu leisi den pisi fu Bijbel di wi musu leisi na a ten fu a Memrefesa. Boiti dati wi musu denki dipi fu den sani di pasa na den lasti dei fu Yesus en libi na grontapu. Te wi e denki dipi fu a srakti-ofrandi fu Yesus, dan dati o gi wi deki-ati fu teki na eksempre fu en.—Gal. 2:20.
4. Sortuwan fu den wini fu a lusu-paiman e gi yu moro furu prisiri?
4 A dede fu Yesus na wan krin buweisi taki Yehovah abi a reti fu tiri. Na ofrandi fu en e frulusu wi fu sondu nanga dede (1 Yoh. 2:2). A e meki taki wi kon bun baka nanga Gado èn kisi têgo libi (Kol. 1:21, 22). A e yepi wi tu fu tan hori wisrefi na san wi pramisi Yehovah di wi gi wisrefi abra na en èn a e yepi wi fu tan de wan disipel fu Krestes (Mat. 16:24). Meki a de so taki yu abi furu prisiri te yu e sreka gi a Memrefesa èn te yu o hori a Memrefesa di e kon!