Augustus o de wan spesrutu mun!

1. Sortu spesrutu preikiwroko o du na heri grontapu, now di a Kownukondre e tiri wán hondro yari?

¹ A yari disi o meki wán hondro yari taki Gado Kownukondre e tiri. Dati meki a fiti taki wi du wan spesrutu preikiwroko fu gi Yehovah grani. Na ini a mun augustus fu a yari disi wi o prati wan nyun traktaat di nen Pe wi kan feni piki tapu aksi fu a libi? A traktaat disi e gi den leisiman deki-ati fu suku den piki na ini Bijbel èn a e sori fa a jw.org website kan yepi den.

2. San wi kan du fu „prèise Yehovah” na ini augustus?

² Wi o prèise Yehovah: Wi seti wan spesrutu sani fu yepi den preikiman di wani dini leki yepipionier na ini augustus. Na ini a mun dati dopu preikiman di wani dini leki yepipionier kan wroko 30 yuru. A mun augustus abi feifi freida, feifi satra nanga feifi sonde. Dati meki furu preikiman di e wroko mindriwiki, o man dini leki yepipionier na ini a mun dati. Boiti dati, den yonguwan kan gebroiki den fakansi dei fu augustus fu dini leki yepipionier. Efu wan Bijbelstudie fu yu noso wan pikin fu yu wani tron preikiman, dan taki nanga a fesiman fu den owruman. Den nyun preikiman o kisi deki-ati te den o bigin nanga a preikiwroko na ini a spesrutu mun dati! Furu gewoon pionier gwenti teki fakansi na ini augustus, te den doro den yuru gi a yari. Ma kande den kan kenki den schema so taki den kan teki prati fayafaya na a spesrutu preikiwroko disi. Now na a ten gi osofamiri fu bosroiti fa den o horibaka gi a spesrutu wroko disi di o du na ini augustus, so taki den kan „prèise Yehovah”.​—Esra 3:11; Odo 15:22.

3. Sortu winsi wi abi gi a spesrutu preikiwroko di o du na ini augustus?

³ A tru taki wi ben e du spesrutu preikiwroko kaba na heri grontapu, ma wi howpu taki disi leisi o de tra fasi. Kande wi kan doro nyun heimarki fu den yuru, fu preikiman èn fu yepipionier na ini augustus. Meki Yehovah blesi a muiti di en pipel o du na heri grontapu fu meki augustus 2014 tron a moro moi mun di wi ben abi na ini a preikiwroko!​—Mat. 24:14.