Go wantewante na den sma di wani wan Bijbelstudie

Di wi poti a nyun website fu wi tapu Internet, dan moro nanga moro sma aksi tapu Internet fu wi studeri Bijbel nanga den. Di wi bigin preiki na den presi pe furu sma de, dan moro sma seni aksi wan Bijbelstudie tu. Te a bijkantoro kisi den aksi disi, dan wantewante den e seti sani gi den sma. Fu eksempre, efu wan sma aksi tapu a jw.org website fu kisi wan Bijbelstudie, dan nofo tron den owruman fu a gemeente di de na ini a kontren fu a sma dati, o kisi wan boskopu fu a bijkantoro baka tu dei. Ma wi kon si taki son sma di ben aksi wan Bijbelstudie ben wakti wan tu wiki fosi wan Kotoigi go na den. Fa wi kan sorgu taki wan sma go na den fosi tra sani puru den prakseri?​—Mark. 4:14, 15.

Efu wan sma di no e libi na ini a kontren fu yu gemeente wani wan Bijbelstudie, dan skrifi dati wantewante na tapu a Nabezoek-papira (S-43) èn gi dati na a sekretarsi na a fosi konmakandra. A sekretarsi musu seni a papira dati wán noso tu dei na baka go na a yoisti gemeente noso go na a bijkantoro, èn den musu gebroiki a jw.org website na a faki di nen Gemeente. Den owruman musu abi a gwenti fu go luku san de tapu a website fu den. Efu den kisi boskopu fu go na wan sma, dan den musu seti sani wantewante. Efu den aksi wan preikiman fu go na a sma, dan a musu du dati wantewante. Efu a sma no de na oso, dan kande yu kan libi wan pisi papira pe yu skrifi fa a sma kan meki kontakti nanga yu.