Aksi di opo kon

◼ Suma musu skrifi a papira na bakasei fu den publikâsi fu wi noso gebroiki na internet fu seni aksi buku noso wan Bijbelstudie?

Nofo tron den publikâsi fu wi abi wan pisi pe wan sma kan skrifi en nen nanga adres èn seni disi go na a bijkantoro efu den wani kisi wan publikâsi noso efu den wani taki Yehovah Kotoigi kon na den. Boiti dati, sma kan gebroiki wi website www.watchtower.org fu aksi fu wan Bijbelstudie. Den seti disi e yepi furu sma fu kon leri sabi a tru anbegi. Ma problema ben opo kon di preikiman gebroiki den sani disi fu meki den famiriman noso trawan kisi wan publikâsi noso Bijbelstudie.

Son sma di kisi den publikâsi fu a bijkantoro sondro fu aksi gi dati, e kragi taki na organisâsi fu wi e fruferi den nanga den publikâsi di den e seni ibri tron baka èn den feni taki na organisâsi fu wi abi na adres fu den fu seni den sani disi ibri tron baka. Son leisi preikiman e kisi wan boskopu fu go na wan sma di ben aksi fu Kotoigi kon na en. Ma te den preikiman doro drape, dan a sma e mandi fu di a no ensrefi ben seni aksi fu Kotoigi kon na en. A sani disi no ben switi gi den preikiman tu. Fu dati ede, te sma e seni aksi sani nanga yepi fu a website fu wi noso nanga yepi fu wan fu den publikâsi fu wi, dan na a sma srefi di wani sabi moro musu du dati. A no den preikiman musu seni aksi gi mati noso famiri fu meki den kisi publikâsi noso meki Kotoigi kon na den. Te a bijkantoro kon si taki na wan preikiman seni aksi dati gi wan sma, dan furu tron den no o sorgu taki sani seti gi so wan sma.

We dan fa wi kan seti sani so taki wan famiriman noso wan sma di wi sabi kan kisi yepi? Efu yu wani taki a kisi wan publikâsi, dan yusrefi kan seni dati gi en leki wan kado. Efu a sma wani sabi moro èn a wani taki Kotoigi kon na en, ma yu no sabi fa fu miti den owruman fu a gemeente na ini a kontren fu a sma, dan yu musu skrifi ala sani na tapu a Nabezoek-papira (S-43) èn gi en na a gemeente sekretarsi fu yu. A o luku efu ala sani skrifi bun na tapu a papira èn a o seni en go na a bijkantoro. Ma efu a sma di wani sabi moro de na strafu-oso, noso na wan ati-oso, dan yu no musu seni a papira go na a bijkantoro. Na presi fu dati, yu kan gi a sma deki-ati fu suku fu miti den brada di e kon na a presi drape noso meki ensrefi skrifi a bijkantoro.