Aksi di opo kon

◼ Preikiman musu abi a gwenti fu gebroiki Internet fu preiki noso studeri nanga sma di den no sabi na ini wan tra kondre?

Son preikiman gebroiki Internet fu feni sma di wani studeri Bijbel na ini kondre pe lanti tapu a wroko fu wi noso pe wan tu preikiman nomo de. Son preikiman ben abi bun bakapisi di den du disi. Ma a kan tyari problema kon tu te preikiman e gebroiki Internet (e-mail noso chat room) fu taki nanga sma di den no sabi. (Luku Wi Kownukondre diniwroko fu yuli 2007 blz. 3.) Aladi den preikiman wani yepi reti-ati sma fu kon sabi a Kownukondre boskopu, toku den kan kisi fu du nanga takru kompe èn sma di fadon komoto na bribi (1 Kor. 1:19-25; Kol. 2:8). Boiti dati, na ini den kondre pe lanti tapu a preikiwroko, den tiriman kan luku san sma e skrifi tapu Internet èn dati kan poti den brada nanga sisa drape na ini problema. Fu dati ede preikiman no musu go tapu Internet fu suku sma fu wan tra kondre fu preiki a bun nyunsu gi den.

Efu wi preiki gi wan sma di wi no sabi èn di kon fu wan tra kondre, dan wi no musu pruberi fu preiki go doro gi en te a drai go baka na en kondre, boiti efu a bijkantoro fu wi kondre gi primisi fu du dati. Na presi fu dati, wi kan sori a sma fa fu gebroiki a jw.org website. Drape a kan kon sabi moro noso a kan skrifi a bijkantoro na ini en kondre. Wi kan gi en deki-ati tu fu go na wan Kownukondre zaal na ini a birti pe a e tan. Ma son kondre no abi Kownukondre zaal. Efu a sma wani taki Kotoigi fu en birti kon na en, dan wi musu gebroiki a Nabezoek-papira (S-43) èn gi dati na a sekretarsi. En o seni a nen nanga den tra sani fu a sma dati go moro fara nanga yepi fu jw.org. A bijkantoro di e luku a wroko na ini a kondre pe a sma e libi sabi fa a situwâsi drape de èn den sabi san na a moro bun fasi fu yepi a sma.​—Luku Wi Kownukondre diniwroko fu yuni 2014 blz. 7 nanga a di fu november 2011 blz. 2.

Efu nownow wi e preiki ete gi wan sma di froisi go na wan tra kondre noso efu wi e studeri nanga wan sma di de na ini wan tra kondre èn di wi sabi soso fu Internet, dan wi musu gebroiki den rai di wi kari na fesi. Ma wi kan tan gi a sma deki-ati teleki wan preikiman fu en eigi kontren man fisiti en. Efu a sma e libi na ini wan kondre pe lanti tapu a wroko fu wi noso pe wi no kan preiki so fri, dan wi musu luku bun te wi e taki fu Bijbel nanga yepi fu brifi, telefon, e-mail noso tra sani.​—Mat. 10:16.