Nyun singi fu anbegi Yehovah!
1 Na tapu 4 oktober 2014, a Watch Tower Bible and Tract Society of Pennsylvania ben hori en alayari konmakandra. Na a konmakandra dati, den brada meki bekènti taki den o tyari kenki kon na wi singibuku. Dati ben de trutru bun nyunsu! Den arkiman ben leri o prenspari den Kownukondre singi fu wi musu de na ini na anbegi.—Ps. 96:2.
2 Kande yu e aksi yusrefi: ’Fu san ede a de fanowdu fu tyari kenki kon na ini a singibuku?’ Difrenti sani de di e meki taki dati de fanowdu. A fosi sani na taki safrisafri wi e kon frustan Gado Wortu moro bun èn dati meki son wortu fu den singi fu wi musu kenki (Odo 4:18). Wan tra sani, na taki na ini furu tongo den wortu di de na ini a singibuku di wi abi now, teki puru fu wan fosi Nyun-Grontapuvertaling na ini Ingrisitongo. Ma na ini 2013 wan nyunwan fu a Bijbel disi kon na doro na ini Ingrisitongo. Dati meki den wortu fu son singi musu kenki now so taki den e kruderi nanga den wortu fu a nyun Bijbel na ini Ingrisitongo. Fu di a de wan bigi wroko fu tyari kenki kon na den singi, meki den brada bosroiti fu poti wan tu nyun singi tu na ini a singibuku.
3 A de so taki wi o abi fu wakti teleki a nyun singibuku kon na doro fosi wi kan singi den nyun singi? Nôno. Wi breiti fu meki unu sabi taki na ini den mun di e kon, wi o poti wan tu fu den nyun singi tapu a jw.org website fu wi. Te wan nyun singi kon na doro, dan wi o singi en na a kaba fu wan Diniwroko Konmakandra. Tapu a schema wi o skrifi den wortu „nyun singi” sei a nomru fu a singi disi.
4 Fa fu leri den nyun singi: A kan muilek fu leri wan nyun singi. Ma neleki a psalm skrifiman wi wani singi nanga wan tranga sten te wi de na wi gemeente konmakandra èn wi „no wani tan pî” (Ps. 30:12). Efu yu wani leri wan nyun singi, dan du den sani disi.
Arki a poku fu a singi difrenti leisi. Den poku disi o de tapu a website fu wi. O moro yu o arki den poku, o moro yu o sabi den.
Leri den wortu fu a singi èn pruberi fu hori den na ede.
Singi aladi a poku e prei. Du disi teleki yu sabi singi a singi bun.
Singi den nyun singi wan tu leisi te yu abi na Osofamiri Anbegi teleki yu osofamiri man singi den bun.
5 Te den schema na ini den mun di e kon e sori taki wi o tapu a Diniwroko Konmakandra nanga wan nyun singi, dan den brada o prei a poku fu a singi wán leisi, so taki ala sma kan arki en. Baka dati a poku o prei baka èn dan a gemeente kan singi.
6 Te wi e singi na den konmakandra fu wi, dan wi e prèise Yehovah leki wán man èn dati e gi wi prisiri. Dati meki wi no musu teki en leki wan gwenti fu opo go waka te a ten doro fu singi na wi Kresten konmakandra.
7 Ete wan fasi de fa wi kan sori taki wi e warderi den santa poku fu wi. Na den bigi konmakandra èn na den kongres, den brada e prei poku fosi a programa bigin. Tu leisi na ini a yari, brada nanga sisa fu ala sei fu grontapu e teki opolani go na Patterson, na ini New York, fu sreka den moi poku disi di wi kan gebroiki fu anbegi Yehovah. Den srefi e pai den kostu di den e meki fu go drape. Sobun, te a fesiman e aksi wi fu suku wan sidonpresi èn fu arki a poku di o prei, dan wi musu du dati wantewante. A poku o sreka wi ati gi den sani di wi o leri a dei dati.—Esra 7:10.
8 Na a kaba fu a konmakandra fu tide wi o singi wan fu den nyun singi. A singi disi tyari kon na doro na a alayari konmakandra èn a skrifi fu meki sma sabi taki a Kownukondre e tiri 100 yari kaba.
9 A no de fu taki dati den nyun singi na „bun sani” di wi e kisi fu Yehovah (Mat. 12:35a). Dati meki wi musu abi a fasti bosroiti fu leri den nyun singi disi èn fu singi den nanga wi heri ati fu prèise wi Gado èn fu gi en grani!—Ps. 147:1.