**Fa fu du wi diniwroko moro bun—Pristeri a Bijbel leri-buku**

Fu san ede a prenspari: A Bijbel leri-buku na wan prenspari buku di wi e gebroiki fu gi sma leri. Wi e gebroiki en fu yepi sma fu kon sabi san Bijbel e leri trutru. Ma fosi wi kan gebroiki en fu studeri nanga wan sma, wi musu pristeri a buku. Dati meki wi alamala musu meki muiti fu pristeri a Bijbel leri-buku na wan bun fasi na ini a preikiwroko (Odo 22:29). Difrenti fasi de fa wi kan du dati èn ibri preikiman musu luku san moro bun gi en. Luku wan tu eksempre di kan yepi wi.

Fa wi musu du dati:

Poti wan aksi di o hari a prakseri fu na ososma èn sori en sortu kapitel na ini a buku e taki fu a tori. Yu kan gebroiki wan fu den aksi di skrifi na a bigin fu ibri kapitel. Baka te yu arki a piki fu na ososma, yu kan leisi wan Bijbeltekst di fiti èn sori en wan paragraaf di e taki fu a tori dati. Kande yu kan taki syatu nanga en fu a paragraaf dati.
Wan tra sani di yu kan du na fu gebroiki den bladzijde na a bigin fu a buku fu hari a sma prakseri. Baka dati yu kan sori en na sortu pisi fu a buku a kan feni a piki di Bijbel e gi. Fu eksempre, yu kan taki fu wan rampu noso wan sari sani di ben de fu si na nyunsu. Sori a sma taki furu sma wani sabi a piki tapu den aksi na tapu bladzijde 3. Noso yu kan taki dati yu e fisiti den sma na ini a birti fu fruteri den wan moi boskopu di abi fu du nanga a ten di e kon. Dan yu kan sori en den prenki na tapu bladzijde 4 nanga 5, èn aksi en: „Sortuwan fu den pramisi disi yu ben wani si?” Wan tra sani di yu kan du, na fu taki dati yu e kon luku den birtisma syatu fu yepi den feni piki tapu den prenspari aksi fu a libi. Dan yu kan sori na ososma den aksi na ondrosei fu bladzijde 6 èn aksi en tapu sortuwan fu den a ben wani kisi piki.
Yu kan aksi a sma wantewante efu a wani studeri Bijbel. Yu kan taki: „Wi e sori sma a buku disi di wi e gebroiki fu studeri Bijbel nanga den. Yu si en kaba? [Gi a sma na okasi fu piki.] Efu yu abi wan tu miniti mi kan sori yu fa yu kan gebroiki a buku makandra nanga yu eigi Bijbel.”

Pruberi fu du disi a mun disi:

Oefen nanga yu osofamiri te unu e hori na Osofamiri Anbegi.
Te yu de na ini a preikiwroko, dan fruteri tra preikiman san yu o taki (Odo 27:17). Efu a fasi fa yu e pristeri a buku no e hari sma prakseri, dan kenki dati.