Fa yu kan bigin wan bijbelstudie nanga sma di teki tijdschrift?
1. Fu san ede wi e libi den tijdschrift gi sma?
1 Tapu satra, wi gwenti prati A Waktitoren nanga Ontwaakt! na ini a preikiwroko. Disi na a fosi sani di wi e du fu doro a marki fu wi, namku fu leri opregtisma den tru tori fu Bijbel. Na artikel disi e gi wi wan tu eksempre di e sori fa wi kan pristeri a Bijbel leri-buku te wi e go baka na sma, èn fa wi kan bigin wan bijbelstudie. Yu kan fiti den eksempre disi na a kontren fu yu, èn yu kan taki sani nanga yu eigi wortu. Yu kan gebroiki tra eksempre tu efu dati fiti.
2. Fa wi kan gebroiki den fosi bladzijde fu a Bijbel leri-buku fu bigin wan bijbelstudie?
2 Gebroiki den fosi bladzijde fu a buku: Te yu e go baka na wan sma, dan yu kan taki: „Den tijdschrift di mi libi gi yu, e taki fu Bijbel. Luku fu san ede a de prenspari fu leisi Bijbel.” Leisi Yesaya 48:17, 18, Yohanes 17:3, noso wan tra tekst di e sori fu san ede a de prenspari fu leisi Bijbel. Baka te yu sori a sma a Bijbel leri-buku, èn yu gi en wan buku, dan yu kan taki:
◼ „Bijbel e gi wi trutru howpu gi a ten di e kon.” Sori na ososma bladzijde 4 nanga 5, èn aksi en: „Sortuwan fu den pramisi dyaso, yu ben o wani si kon tru?” Te a sma taki sortuwan fu den pramisi a ben o wani si kon tru, dan yu kan sori en a kapitel di e taki fu a pramisi dati di skrifi na ini Bijbel, èn taki syatu fu wán noso tu paragraaf, efu a sma wani dati.
◼ Noso yu kan taki: „Bijbel e gi piki tapu den moro prenspari aksi di wi abi na ini a libi.” Sori a sma bladzijde 6, èn aksi en efu oiti a ben poti prakseri na wan fu den aksi di skrifi na ondrosei fu a bladzijde. Go na a kapitel di e piki na aksi dati, èn taki syatu fu wán noso tu paragraaf.
◼ Noso yu kan sori a sma den nen fu wan tu fu den kapitel di de fu feni tapu bladzijde 2 fu a buku, èn aksi en fu sortuwan a wani sabi moro. Baka dati, opo a buku na a kapitel dati, èn sori a sma syatu fa wan bijbelstudie e hori.
3. Fa wi kan bigin wan bijbelstudie, baka te wi gi a sma wan tijdschrift di e taki fu: (a) den situwâsi na grontapu di e kon ogri moro nanga moro? (b) na osofamiri? (c) a frutrow di wi kan frutrow Bijbel?
3 Poti wan aksi di yu sa piki a tra leisi te yu go baka na a sma: Wan tra sani di yu kan du, na fu taigi na ososma fu san yu o taki a tra leisi te yu go baka na en. Efu na ososma teki den tijdschrift, poti wan aksi gi en, èn pramisi en taki yu o piki na aksi dati a tra leisi te yu go baka na en. Taigi a sma o ten yu o go baka na en, èn meki muiti fu hori yusrefi na a mofo di yu meki nanga en (Mat. 5:37). Te yu go baka, dan memre na ososma na a aksi di yu ben poti gi en, èn taki syatu fu a piki tapu na aksi, di de fu feni na ini a Bijbel leri-buku. Gi a sma wan buku, so taki a kan leisi makandra nanga yu. Dyaso na wan tu eksempre di e sori fa yu kan du dati:
◼ Efu a tijdschrift di yu libi gi a sma e taki fu den situwâsi na grontapu di e kon ogri moro nanga moro, dan yu kan taki: „A tra leisi te mi kon, dan wi kan luku fa Bijbel e piki na aksi disi: Sortu kenki Gado sa tyari kon na grontapu?” Te yu go baka, sori a sma bladzijde 4 nanga 5. Noso yu kan aksi en: „Na Gado wani taki so furu ogri sani e pasa?” Te yu go baka na a ososma, dan sori en paragraaf 7 nanga 8 fu kapitel 1.
◼ Efu a tijdschrift di yu libi gi a sma e taki fu na osofamiri, dan yu kan poti na aksi disi bifo yu gowe: „San ibri sma na ini na osofamiri kan du so taki den kan de moro koloku?” Te yu go baka na a sma, taki fu paragraaf 4 na ini kapitel 14.
◼ Efu a tijdschrift di yu libi gi a sma e taki fu a frutrow di wi kan frutrow Bijbel, dan yu kan poti na aksi disi di yu o piki a tra leisi te yu go baka: „A de so taki den sani di skrifi na ini Bijbel, e kruderi nanga den sani di sabiman ondrosuku?” Te yu go baka na a sma, taki fu paragraaf 8 na ini kapitel 2.
4. San wi musu du efu na ososma no wani teki a Bijbel leri-buku?
4 Baka ibri takimakandra, poti wan aksi di yu sa piki a tra leisi te yu go baka na a sma. Bakaten, te yu e studeri ibri wiki nanga a sma, dan bigin na a fosi kapitel fu a buku, teleki yu doro a kaba. San yu kan du efu na ososma no wani teki a Bijbel leri-buku? Yu kan tan tyari den tijdschrift gi en èn yu kan taki fu Bijbel tori nanga en. Te yu pruberi fu hari a prakseri fu a sma, dan kande a sa wani kon sabi moro fu Bijbel, èn a sa wani studeri te fu kaba.
5. Fu san ede wi musu pruberi fu du moro leki fu gi sma den tijdschrift nomo?
5 A Waktitoren nanga Ontwaakt! kan meki taki wan sma wani kon sabi san Bijbel e leri trutru. Fu dati ede, meki muiti fu bigin wan bijbelstudie nanga den sma di e teki den tijdschrift. Na so fasi wi sa du san Yesus ben taigi wi, namku fu ’meki sma tron disipel, èn . . . fu leri den’.—Mat. 28:19, 20.