Dwengi yusrefi​—Wi musu abi a fasi disi efu wi wani taki Yehovah feni wi bun

„Di mi neef bigin haritaki nanga mi, mi grabu en na en neki, dan mi tyokro en. Mi ben wani kiri en.”​—Paul.

„Te mi ben de na oso, lawlaw sani ben meki mi ati bron. Mi ben naki sturu nanga tafra broko èn mi ben broko den preisani fu den pikin nanga iniwan tra sani di mi ben feni.”​—Marco.

Kande wi no e lasi wisrefi neleki den tu man disi. Toku a kan muilek gi wi son leisi fu dwengi wisrefi. Disi e kon fu di wi kisi sondu fu a fosi man, Adam (Rom. 5:12). Neleki Paul nanga Marco, son sma e atibron esi. Trawan feni en muilek fu no denki sani di no bun. Fu eksempre, den e tan prakseri sani di e meki den kon frede noso di e meki den lasi-ati. Tra sma e du hurudu, den e dringi tumusi furu sopi noso den e gebroiki drugs fu di den no man dwengi densrefi.

Sma di e du den sani disi fu di den no man dwengi densrefi, kan pori den libi. Ma dati no abi fu pasa nanga wi. San o yepi wi? Wi musu leri fu dwengi wisrefi. Meki wi poti prakseri na dri aksi: (1) San a wani taki fu dwengi wisrefi? (2) Fu san ede a prenspari fu abi a fasi disi? (3) Fa wi kan kon abi a fasi disi, di de wan fu „den fasi di a yeye e meki sma kisi”? (Gal. 5:22, 23) Baka dati wi o luku san wi kan du efu son leisi wi no man dwengi wisrefi.

SAN A WANI TAKI FU DWENGI WISREFI?

Wan sma di man dwengi ensrefi no e du ala san a e firi fu du. Na presi fu dati a e hori ensrefi fu no taki sani noso du sani di Gado no feni bun.

Na eksempre fu Yesus e sori wi san a wani taki fu dwengi wisrefi. Bijbel e taki: „Te sma ben e kosi en fu gi en syen, dan a no ben e kosi den baka. Te sma ben e pina en, dan a no ben e taigi den taki a o du den ogri baka, ma a ben tan saka ensrefi na ondro a sma di e krutu sani na wan reti fasi” (1 Petr. 2:23). Di Yesus ben anga na a postu a ben e dwengi ensrefi di feanti ben e spotu en (Mat. 27:39-44). A ben e hori ensrefi tu di den kerki fesiman ben poti wan lo aksi gi en fu meki a taki sani di no bun (Mat. 22:15-22). A gi wan moi eksempre tu di son Dyu ben wani trowe ston na en tapu! Na presi fu du ogri baka nanga den, „Yesus go kibri èn a komoto na ini a tempel”.​—Yoh. 8:57-59.

Wi man teki na eksempre fu Yesus? Iya, wi man! Na apostel Petrus ben skrifi: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petr. 2:21). Aladi wi na sondusma, wi kan du muiti fu waka soifri na Yesus baka. Fu san ede a prenspari fu du disi?

FU SAN EDE A PRENSPARI FU DWENGI WISREFI?

Wi musu dwengi wisrefi efu wi wani taki Yehovah feni wi bun. Awinsi wi e dini Yehovah furu yari kaba, wi kan pori wi matifasi nanga en efu wi no e luku bun san wi e du èn san wi e taki.

Luku na eksempre fu Moses, di ben de „a moro safri-ati sma fu ala libisma di ben de na grontapu” (Num. 12:3). Furu yari langa Moses ben abi pasensi nanga den Israelsma di ben lobi krutukrutu. Ma wan dei a lasi ensrefi. En ati bron di den ben krutu baka taki den no ben abi nofo watra. Moses taki grofu nanga den. A taigi den: „Un tranga-ede sma, arki mi! Unu wani taki wi puru watra fu a ston disi fu meki unu dringi?”​—Num. 20:2-11.

Moses no dwengi ensrefi. A no gi grani na Yehovah, a sma di ben meki watra komoto na ini a ston (Ps. 106:32, 33). Dati meki Yehovah no meki a go na ini a Pramisi Kondre (Num. 20:12). A no de fu taki dati te na a dei di Moses dede a hati en taki a ben lasi ensrefi.​—Deut. 3:23-27.

San disi e leri wi? Awinsi wi de na ini waarheid furu yari langa, noiti wi musu taki grofu nanga sma di e meki wi mandi noso di no e du wan sani bun (Ef. 4:32; Kol. 3:12). A tru taki te wi e kon owru èn a gosontu fu wi e go na baka, dan a kan moro muilek gi wi fu abi pasensi. Ma memre san pasa nanga Moses. Wi no wani pori a bun nen di wi abi na Yehovah fu di wi lasi wisrefi. Ma fa wi kan leri fu dwengi wisrefi?

FA WI KAN LERI FU DWENGI WISREFI?

Begi Gado fu gi yu en santa yeye. Fu san ede? Fu di a dwengi di wi man dwengi wisrefi na wan fu den fasi di a santa yeye e meki sma kisi èn Yehovah e gi en yeye na sma di e aksi en (Luk. 11:13). A santa yeye fu Yehovah kan gi wi a krakti di wi abi fanowdu fu dwengi wisrefi (Fil. 4:13). Yehovah kan yepi wi tu fu kon abi den tra fasi di a yeye e meki sma kisi, soleki lobi. Èn lobi e meki en moro makelek gi wi fu dwengi wisrefi.​—1 Kor. 13:5.

Wi no musu luku noso arki sani di kan meki en muilek gi wi fu dwengi wisrefi. Fu eksempre, no go tapu website fu arki poku noso fu luku felem pe sma e du sani di Gado no feni bun (Ef. 5:3, 4). Fu taki en leti, wi musu wai pasi gi iniwan sani di e gi wi deki-ati fu du sani di no bun (Odo 22:3; 1 Kor. 6:12). Fu eksempre, efu a muilek gi wan sma fu basi den seksfiri fu en, dan a no musu leisi buku noso luku felem di e taki fu lobitori.

Kande a muilek gi wi fu fiti a rai disi na ini wi libi. Ma efu wi e meki muiti, Yehovah o gi wi a krakti di wi abi fanowdu fu dwengi wisrefi (2 Petr. 1:5-8). A o yepi wi fu no prakseri, fu no taki èn fu no du sani di no bun. Paul nanga Marco di wi kari na a bigin, leri fu no ati bron esi moro. Luku na eksempre tu fu wan brada di ben lobi ati bron nanga sma na ini a verkeer. A ben e haritaki nanga den sma srefi. San yepi en fu no du dati moro? A e taki: „Ala dei mi ben e begi fayafaya. Mi ben e studeri artikel di e sori fa mi kan dwengi misrefi èn mi ben e pruberi fu memre Bijbeltekst di kan yepi mi. Mi e wroko na misrefi furu yari kaba, ma toku mi e memre misrefi ibri dei taki mi no musu lasi misrefi. Èn te mi musu go na wan presi, mi e komoto fruku na oso. Dan mi no abi fu hasti misrefi.”

SAN WI KAN DU EFU SON LEISI WI NO MAN DWENGI WISREFI?

Wi alamala kan lasi wisrefi son leisi. Te dati pasa, wi kan firi syen fu begi Yehovah. Ma na den momenti dati a bun fu begi. Sobun, begi Yehovah wantewante. Aksi en fu gi yu pardon, fu yepi yu èn fu gi yu a krakti fu no meki a srefi fowtu baka (Ps. 51:9-11). No denki taki Yehovah no o arki a begi fu yu (Ps. 102:17). Na apostel Yohanes e memre wi taki a brudu fu a Manpikin fu Gado „e krin wi fu ala sondu” (1 Yoh. 1:7; 2:1; Ps. 86:5). Efu Yehovah e taigi wi fu gi trawan pardon ibri leisi baka, dan wi kan de seiker taki a o du dati tu.​—Mat. 18:21, 22; Kol. 3:13.

Yehovah en ati ben bron nanga Moses di a lasi ensrefi na ini a sabana. Toku Yehovah gi en pardon. Èn Gado Wortu e sori taki Moses na wan heri bun eksempre fu wan sma di ben abi bribi (Deut. 34:10; Hebr. 11:24-28). Yehovah no meki Moses go na ini a Pramisi Kondre, ma a o meki a libi fu têgo na ini a paradijs na grontapu. Wi kan kisi a srefi blesi efu wi e tan meki muiti fu dwengi wisrefi.​—1 Kor. 9:25.