„Now mi kon lobi a preikiwroko trutru!”

MI LASI PRISIRI

A sari fu taki dati di mi ben abi sowan 13 yari, mi no ben de so fayafaya moro. Mi ben e si leki den skoromati fu mi ben kan du ala san den wani èn mi srefi ben wani de so tu. Den wet fu mi papa nanga mama èn fu Bijbel ben de leki skotu di ben e tapu mi fu du san mi wani. Èn den sani di wi leki Kresten musu du, ben de leki wan hebi gi mi. Mi ben sabi taki Yehovah de, ma mi no ben e si en leki mi mati.

Mi no ben tapu fu preiki, ma mi no ben e preiki furu tu. Fu di mi no ben e sreka misrefi gi a preikiwroko, meki mi no ben man abi wan bun takimakandra nanga sma èn mi no ben man feni gobaka nanga studie. Na so mi ben kon lasi prisiri na ini a preikiwroko. Son leisi mi ben e aksi misrefi: ’Fa wan sma kan du a sani disi ala wiki, ibri mun baka?’

Di mi ben abi 17 yari, mi ben wani libi mi eigi libi. Dati meki mi gowe libi oso èn mi froisi go na Australia. Mi papa nanga mama ben e sari di mi ben e gowe. Aladi den ben e broko den ede nanga mi, toku den ben e howpu taki mi ben o dini Yehovah go doro.

Na ini Australia mi ben e go nanga baka moro nanga moro. Mi bigin misi konmakandra èn mi bigin bumui nanga yonguwan di ben e denki leki mi. Den no ben feni en erg fu go na konmakandra a wán neti èn fu go dringi sopi èn dansi na ini wan club a tra neti. Te mi e denki a tori, mi ben de nanga wán futu ini waarheid èn a tra futu ini grontapu. Mi ben e du san mi ben wani, ma toku mi no ben e firi switi.

MI LERI WAN PRENSPARI SANI

Tu yari baka dati, mi miti wan sisa di kenki mi libi sondro fu a sabi. A heri fasi fa a ben de ben e meki mi prakseri san mi ben e du nanga mi libi. Mi ben e tan na ini wan oso nanga fo sisa. Wan leisi un kari a kring-owruman nanga en wefi Tamara fu kon tan nanga wi na ini a kring-wiki. Te en masra ben abi takimakandra nanga den brada fu a gemeente, dan Tamara ben e tan nanga wi èn wi ben e taki switi tori nanga makandra. A ben de so gewoon èn ala sortu tori mi ben kan taki nanga en. Mi no ben man bribi taki wan sma di ben e dini Yehovah so fayafaya ben kan de so fleksi.

Te mi ben e luku fa Tamara ben lobi a waarheid nanga a preikiwroko, dan mi ben wani de leki en. A ben e prisiri fu di a ben e wroko tranga gi Yehovah, ma mi no ben e prisiri fu di mi no ben e du furu gi en. A ben naki mi ati trutru fu si fa a ben de so koloku. Te mi ben e luku a fasi fa a ben de, dan mi ben e prakseri wan sani di Bijbel e taki: Yehovah wani taki wi musu dini en „nanga prisiri”. A wani taki wi musu „bari fu prisiri”.​—Ps. 100:2.

MI BIGIN LOBI A PREIKIWROKO BAKA

Mi ben wani prisiri neleki Tamara, ma dan mi ben musu tyari bigi kenki kon. A no ben makriki, ma pikinsopikinso mi kenki wan tu sani, mi bigin sreka misrefi gi a preikiwroko, èn ten na ten mi ben e go na ini a yepipionier-wroko. Disi yepi mi fu no frede so furu moro, èn mi kisi moro deki-ati fu taki nanga den sma. O moro mi ben e gebroiki Bijbel na ini a preikiwroko, o moro mi ben e firi bun. A no langa baka dati, mi bigin du a yepipionier-wroko ibri mun.

Mi ben e suku mati di ben de bun ini waarheid èn di ben lobi Yehovah. A no abi trobi efu den ben de yonguwan noso owruwan. A bun eksempre fu den ben yepi mi fu luku san ben de a moro prenspari sani na ini mi libi, èn mi bigin leisi Bijbel ibri dei. A preikiwroko ben e gi mi moro prisiri, èn te fu kaba mi bigin dini leki gewoon pionier. Someni yari ben pasa, ma now fosi mi ben e firi bun baka na ini a gemeente.

MI FENI WAN PIONIER PATNA DI O DE NANGA MI ALA TEN

Wán yari baka dati, mi miti Alex. A ben abi switifasi, a ben abi wan krin ati, èn a ben lobi Yehovah nanga a preikiwroko. A ben de wan dinari ini a diniwroko èn a ben e pionier siksi yari kaba. Wan pisi ten Alex ben go yepi tu na Malawi pe moro preikiman ben de fanowdu. Drape a ben miti wan tu zendeling di ben de wan bun eksempre gi en. Den ben gi en deki-ati fu tan poti a Kownukondre na a fosi presi na ini en libi.

Na ini 2003, mi nanga Alex trow èn wi tan du furuten diniwroko sensi a ten dati. Wi leri furu moi sani na ini wi libi èn Yehovah blesi wi na ala sortu fasi.

YEHOVAH E GI WI MORO BLESI

Na ini 2009, wi kisi a kari fu go leki zendeling na Owstu-Timor, wan pikin kondre na wan fu den èilanti na Indonesia. Aladi wi no ben fruwakti a sani disi, toku wi ben e prisiri. Ma wi ben frede pikinso tu. Baka feifi mun, wi doro na a mamafoto Dili.

Di wi froisi, wi ben musu kenki furu sani na ini wi libi. Wi ben musu kon gwenti wan nyun kulturu, wan nyun tongo, tra sortu nyanyan, èn wan tra fasi fu libi. Na ini a preikiwroko wi ben e miti sma di ben pôti èn di no ben kisi furu skoroleri. A libi ben hebi gi den tu. Wi si furu sma di ben e pina fu di feti ben de na ini a kondre èn fu di sma ben e du ogri nanga den.a

A preikiwroko e gi mi furu prisiri. Wan leisi mi miti wan meisje fu 13 yari di ben nen Maria.b A ben e sari furu. Wan tu yari na fesi en mama ben kon dede èn en nanga en papa no ben e miti so furu. Neleki furu tra pikin di abi a srefi yari leki en, Maria no ben sabi san a ben musu du nanga en libi. Mi sabi ete taki wan leisi di mi ben go na en, a bigin fruteri mi den problema fu en aladi a ben e krei. Ma mi no ben e frustan san a ben e taki, fu di na a ten dati mi no ben e frustan a tongo so bun ete. Dati meki mi begi Yehovah fu yepi mi, so taki mi ben kan gi Maria deki-ati. Dan mi leisi wan tu tekst gi en fu trowstu en. Den yari baka dati, mi si fa a waarheid kenki a libi fu Maria. A ben kon abi moro prisiri èn a bigin sorgu ensrefi moro bun. Te fu kaba a dopu èn now en srefi abi Bijbelstudie. Tide na dei, Maria abi brada nanga sisa na heri grontapu èn a e firi taki sma lobi en.

Yehovah blesi a wroko na ini Owstu-Timor. Aladi furu fu den preikiman na sma di dopu na ini den tin yari di pasa, toku furu fu den e dini leki pionier, dinari ini a diniwroko, noso owruman. Trawan e wroko na a vertaal-kantoro pe den e yepi fu vertaal den buku fu na organisâsi fu wi na ini den difrenti tongo di sma e taki drape. A e gi mi furu prisiri te mi e yere fa den e singi na den konmakandra, te mi e si fa den e lafu, èn fa den e tron moro bun mati fu Yehovah.

MI NO BEN KAN ABI WAN MORO BUN LIBI

A libi na ini Owstu-Timor no ben de a srefi leki a libi na ini Australia. Ma toku wi ben de koloku. Son leisi wi ben e sidon na ini wan pikin bus di furu nanga sma, drei fisi, nanga ipi-ipi gruntu di sma ben bai na wowoyo. Son leisi wi ben e hori Bijbelstudie na ini wan pikin faya oso pe a gron ben de fu santi èn pe fowru ben e lon na ala sei. Ma awinsi fa a situwâsi ben de, toku mi ben prakseri: ’Mi lobi a libi disi yèrè!’

Te mi e denki fa mi libi waka, dan mi e taki mi papa nanga mama tangi taki den du muiti fu meki mi kon sabi Yehovah, èn taki den horibaka gi mi, srefi di mi no ben e du furu gi Yehovah. Mi kon si taki san skrifi na Odo 22:6, tru. Mi papa nanga mama breiti srefisrefi te den e si fa Yehovah e gebroiki mi nanga Alex. Sensi 2016 wi e du kringwroko na ini a kontren di de ondro a tiri fu a Australasia bijkantoro.

Mi no man bribi taki fosi mi ben e si a preikiwroko leki wan hebi. Now mi kon lobi en trutru! Mi kon frustan taki awinsi san e pasa na ini wi libi, a wan-enkri sani di kan gi wi prisiri trutru, na te wi e du a wroko fu Yehovah nanga wi heri ati. Iya, den 18 yari di mi dini Yehovah makandra nanga Alex, ben de den moro prisiri yari fu mi libi. Now fosi mi kon frustan den wortu fu a psalm skrifiman David di ben taigi Yehovah: „Ala den sma di e kon suku kibri na yu, o breiti. Fu ala ten den o bari fu prisiri. . . . Èn den wan di lobi yu nen, o prisiri pasa marki.”​—Ps. 5:11.