No meki „wan fu den pikinwan disi” fadon

1. San Yehovah du gi ibriwan fu wi èn fu san ede?

YEHOVAH hari ibriwan fu wi kon na en (Yoh. 6:44). Prakseri san dati wani taki. Yehovah luku ala den milyunmilyun sma na grontapu èn a si wan moi sani na ini yu. A si taki yu ati krin èn taki yu kan kon lobi en (1 Kron. 28:9). Yehovah sabi fa yu de, a e frustan yu èn a lobi yu. A sani dati e gi wi wan bun firi.

2. Fa Yesus e yepi wi fu frustan taki Yehovah e broko en ede nanga ibriwan fu wi?

² Yehovah e broko en ede nanga yu. A e broko en ede tu nanga ala den Kresten brada nanga sisa fu yu. Fu eksempre, Yesus ben teki Yehovah gersi nanga wan skapuman. Efu 1 fu den 100 skapu fu na ipi lasi, dan san a skapuman o du? A o „libi den neigitenti na neigi skapu na tapu den bergi fu go suku a lasi skapu”. Te a skapuman feni a lasi skapu, dan a no o atibron nanga en. A o prisiri. San wi e leri fu a sani disi? Ibri skapu prenspari gi Yehovah. Yesus ben taki: „Mi Tata na hemel no wani kwetikweti taki wan fu den pikinwan disi musu lasi libi.”​—Mat. 18:12-14.

3. Fu san wi o taki na ini na artikel disi?

³ Noiti wi ben o wani hati den firi fu wi brada nanga sisa. Fa wi kan sorgu taki wi no du dati nanga trawan? San wi kan du efu wan sma hati den firi fu wi? Wi o gi piki tapu den aksi dati na ini na artikel disi. Ma fosi wi du dati, meki wi go luku san den wortu „den pikinwan disi” di kari na ini Mateyus kapitel 18 wani taki.

SUMA NA „DEN PIKINWAN DISI”?

4. Suma na „den pikinwan disi”?

⁴ „Den pikinwan disi” na den disipel fu Yesus, awinsi den yongu noso owru. Awinsi o owru den de, den de „leki yongu pikin” fu di den de klariklari fu teki leri fu Yesus (Mat. 18:3). Aladi den kon fu difrenti presi, fu difrenti kulturu èn den abi den eigi fasi fa den e si sani, toku den alamala e bribi na ini Krestes. Èn Krestes lobi den alamala trutru.​—Mat. 18:6; Yoh. 1:12.

5. Fa Yehovah e firi te wan sma e meki wan anbegiman fu en fadon noso te a e du wan hati sani nanga en?

⁵ Ala „den pikinwan disi” warti gi Yehovah. Fu frustan fa Yehovah e firi, luku fa wi e firi te wan sani miti wan pikin. Pikin-nengre warti gi wi. Wi wani kibri den fu di den no tranga, den no abi so furu ondrofeni, èn den no koni leki bigisma. Fu taki en leti, wi no lobi en te wan hati sani miti wan sma, ma wi kan atibron srefisrefi te wan sma du wan hati sani nanga wan pikin. Na a srefi fasi Yehovah wani kibri wi. A e atibron srefisrefi te wan sma e meki wan anbegiman fu en fadon noso te a e du wan hati sani nanga en.​—Yes. 63:9; Mark. 9:42.

6. Soleki fa 1 Korentesma 1:26-29 e sori, dan fa a grontapu disi e si den disipel fu Yesus?

⁶ Na sortu tra fasi den disipel fu Yesus de leki „pikinwan”? We, suma a grontapu disi e si leki prenspari sma? Den guduwan, den pôpi sma nanga den sma di abi furu makti. Ma nofo tron den disipel fu Yesus no de so. Dati meki sma na ini a grontapu disi feni taki den no de prenspari èn den e si den leki „pikinwan”. (Leisi 1 Korentesma 1:26-29.) Ma Yehovah no e si den so.

7. Fa Yehovah wani taki wi si wi brada nanga sisa?

⁷ Yehovah lobi ala den futuboi fu en, awinsi den dini en omeni yari kaba noso awinsi den kon na ini waarheid no so langa pasa. Ala wi brada nanga sisa prenspari gi Yehovah. Dati meki den musu prenspari gi wi tu. Wi wani sori taki wi „lobi ala brada”, a no soso wan tu fu den (1 Petr. 2:17). Wi musu de klariklari fu du ala san wi man fu kibri den èn fu sori taki wi e broko wi ede nanga den. Efu wi kon sabi taki wi hati den firi fu wan sma, dan wi no musu du neleki noti no pasa. Wi no musu prakseri tu taki a sma musu gi wi pardon èn frigiti a tori. Fu san ede son sma feni taki trawan hati den firi? Kande a fasi fa son brada nanga sisa kweki e meki taki den no e firi leki den warti nofo leki trawan. Trawan di de na ini waarheid no so langa ete, no leri ete taki den musu gi trawan pardon te den meki wan fowtu. Awinsi fa a no fa, wi musu du ala san wi man fu meki en bun baka nanga wi brada nanga sisa. Boiti dati, efu a e pasa makelek taki wan sma e meki den sani di trawan e du noso taki hati en firi, dan a sma disi musu frustan taki a fasi disi no bun èn a o abi fu wroko na dati. Disi o yepi en fu de nanga prisiri èn a o de bun mati fu den brada nanga sisa fu en.

SI TRAWAN MORO HEI LEKI YUSREFI

8. Fa den sma na ini Yesus ten ben denki èn fa a sani disi ben abi krakti tapu den disipel fu en?

⁸ Fu san ede Yesus ben taki fu „den pikinwan disi”? Fu di den disipel ben aksi en: „Suma o de a moro bigiwan na ini a Kownukondre fu hemel?” (Mat. 18:1) Furu fu den Dyu na ini a ten dati ben wani taki trawan ben si den leki prenspari sma. Wan sabiman e taki: „Sma ben de klariklari fu dede srefi, soso fu kisi grani, biginen, blesi nanga lespeki.”

9. San den disipel fu Yesus ben musu du?

⁹ Yesus ben sabi taki furu Dyu ben e strei nanga makandra fu sori suma moro hei. Fu dati ede den disipel fu en ben musu meki tranga muiti fu kenki a fasi fa den ben e denki. Yesus ben taigi den: „Meki a moro bigiwan fu unu tron leki a moro yonguwan èn meki a wan di e teki fesi, de leki wan futuboi” (Luk. 22:26). Wi de leki „a moro yonguwan” te wi e ’si trawan moro hei leki wisrefi’ (Fil. 2:3). A no o pasa so makelek taki wi e hati den firi fu trawan te wi e tan du muiti fu si den moro hei leki wisrefi.

10. Sortu rai fu Paulus wi musu fiti na ini wi libi?

¹⁰ Ala den brada nanga sisa fu wi abi wan sani di den e du moro bun leki wi. A no muilek fu si dati te wi e poti prakseri na den bun fasi fu den. Fu dati ede wi musu teki a rai di na apostel Paulus ben gi den Korentesma: „San meki taki yu e denki dati yu bun moro wan trawan? Iya, san yu abi di yu no kisi? We efu na kisi yu kisi en, dan fu san ede yu e meki bigi leki yu no kisi en?” (1 Kor. 4:7) Wi musu luku bun taki wi no du sani soso fu meki trawan poti prakseri na wi èn wi no musu denki taki wi bun moro trawan. Fu eksempre, efu wan brada e hori moi lezing noso wan sisa sabi fa fu bigin Bijbelstudie, dan a musu gi grani na Yehovah fu a sani dati di a man du bun.

GI PARDON NANGA ’YU HERI ATI’

11. San Yesus ben wani leri wi nanga na agersitori fu a kownu nanga en srafu?

¹¹ Syatu baka di Yesus warskow den bakaman fu en fu luku bun taki den no meki trawan fadon, a fruteri wan agersitori fu wan kownu nanga en srafu. A kownu ben taigi a srafu taki a no ben abi fu pai en a bigi paiman moro fu di a srafu noiti no ben o man pai a kownu baka. Bakaten a srefi srafu disi ben den nomonomo taki wan tra srafu pai en wan paiman di no ben bigi so. Te fu kaba a kownu poti a srafu di no ben sori sari-ati na strafu-oso. San na a les? Yesus ben taki: „Na so mi Tata na hemel o du tu nanga unu te unu no e gi un brada pardon nanga un heri ati.”​—Mat. 18:21-35.

12. Fa wi e hati trawan efu wi no wani gi pardon?

¹² A sani di a srafu disi du, hati a tra srafu, ma a hati trawan tu. A srafu disi no sori switifasi èn a no sori sari-ati gi a tra srafu fu di „a meki den trowe a tra srafu na ini strafu-oso teleki a pai a paiman fu en”. Boiti dati, a hati den tra srafu tu di den si san a du. „Di den tra srafu si san pasa, den ben sari trutru.” Na so a de tu taki den sani di wi e du abi krakti tapu trawan. San kan pasa efu wan sma du wan hati sani nanga wi èn wi no wani gi en pardon? Wi e hati a sma dati fu di wi no wani gi en pardon, wi no wani luku en na wan ai, èn wi no e sori taki wi lobi en. Boiti dati, wi e meki trawan na ini a gemeente firi fruferi te den e si taki wi no e libi na ini freide nanga a sma dati.

13. San yu e leri fu na ondrofenitori fu wan pionier?

¹³ Te wi e gi wi brada nanga sisa pardon, dan wi e firi bun èn wi e yepi trawan fu firi bun tu. Na dati wan pionier sisa di wi o kari Crystal, kon si. Wan tra sisa na ini en gemeente ben hati en firi. Crystal e taki: „A fasi fa a ben e taki nanga mi son leisi ben hati mi srefisrefi. Mi no ben wani wroko nanga en na ini a preikiwroko srefi. Disi meki taki mi no ben de nanga faya moro èn mi lasi mi prisiri.” Crystal ben feni taki a ben abi bun reide fu atibron. Ma a no hori a sisa na ati moro èn a no tan poti prakseri na ensrefi èn na a fasi fa a ben e firi. Fu san ede? Fu di a ben abi sakafasi èn a fiti a rai fu Bijbel di skrifi na ini na artikel „Gi Sma Pardon Nanga Yu Heri Ati” na ini A Waktitoren fu 15 oktober 1999. Crystal gi a sisa pardon. Crystal e taki: „Now mi kon frustan taki wi alamala e du tranga muiti fu kenki èn Yehovah de klariklari fu gi wi pardon ibri dei. Mi e firi leki wan hebi komoto na mi skowru. Now mi kon de nanga prisiri baka.”

14. Soleki fa Mateyus 18:21, 22 e taki, dan sortu problema na apostel Petrus ben abi èn san yu e leri fu a piki di Yesus gi en?

¹⁴ Wi sabi taki wi musu gi trawan pardon. Ma toku a kan muilek gi wi fu du dati. Kande na apostel Petrus ben firi so, son leisi. (Leisi Mateyus 18:21, 22.) San kan yepi wi? A fosi sani na taki wi musu denki dipi fu a tori taki Yehovah e gi wi pardon gi so furu sani (Mat. 18:32, 33). Wi no abi a reti fu kisi pardon, ma toku Yehovah e gi wi pardon nanga wi heri ati (Ps. 103:8-10). Na a srefi ten, wi „de fruplekti fu lobi makandra”. Sobun, fu gi trawan pardon a no wan sani di wi o bosroiti efu wi o du en noso efu wi no o du en. Wi de fruplekti fu gi wi brada nanga sisa pardon (1 Yoh. 4:11). A di fu tu sani na taki wi musu denki dipi san e pasa te wi e gi trawan pardon. Wi kan yepi a sma di du wi wan hati sani, wi kan sorgu taki freide de na ini a gemeente, wi kan sorgu taki wi nanga Yehovah no pori, èn wi kan firi moro bun fu di wi puru a hebi na wi tapu (2 Kor. 2:7; Kol. 3:14). Te fu kaba wi musu begi Yehovah, a sma di e aksi fu wi taki wi gi trawan pardon. No meki Satan pori yu nanga yu brada nanga sisa (Ef. 4:26, 27). Wi abi a yepi fu Yehovah fanowdu fu sorgu taki freide tan de na ini a gemeente.

NO MEKI DEN SANI DI TRAWAN E TAKI NOSO DU HATI YU FIRI

15. Soleki fa Kolosesma 3:13 e taki, dan san yu musu du efu wan brada noso sisa du wan sani di hati yu firi?

¹⁵ Ma fa a de efu wan brada noso wan sisa du wan sani di hati yu firi? San yu musu du? Du ala san yu man fu sorgu taki a freide tan de. Begi Yehovah èn taigi en fa yu e firi. Aksi en fu blesi a sma di hati yu firi. Aksi en fu yepi yu tu fu si den bun fasi fu a sma dati, neleki fa en e si den bun fasi fu a sma èn a lobi a sma dati (Luk. 6:28). Efu yu no man frigiti san a brada noso sisa du nanga yu, dan go denki san na a moro bun fasi fa yu kan go taki nanga en. Ala ten a moro bun fu prakseri taki noiti a brada noso sisa ben o hati yu firi fu espresi (Mat. 5:23, 24; 1 Kor. 13:7). Hori a sani dati na prakseri te yu e go taki nanga en. Ma san yu o du efu a sma no wani meki en bun baka nanga yu? „Tan frudrage” a sma. Tan abi pasensi nanga yu brada. (Leisi Kolosesma 3:13.) Ma san moro prenspari na taki yu no musu hori en na ati fu di dati kan meki taki yu nanga Yehovah pori. No meki nowan sani hati yu so te, taki yu e naki futu fadon. Efu yu sorgu taki dati no pasa, dan na so yu e sori taki yu lobi Yehovah moro leki iniwan tra sani.​—Ps. 119:165.

16. Sortu frantwortu ibriwan fu wi abi?

¹⁶ Wi de nanga tangi taki wi kan dini Yehovah makandra nanga wi brada nanga sisa na ini „wán ipi” di abi „wán skapuman” (Yoh. 10:16). A buku Wi orga fu du a wani fu Yehovah e taki na bladzijde 165: „Yu e kisi wini fu a wánfasi disi èn yu abi a frantwortu sosrefi fu sorgu taki a no lasi gowe.” Sobun wi musu „leri fu si wi brada nanga sisa soleki fa Yehovah e si den.” Gi Yehovah, wi alamala na „pikinwan” di a lobi srefisrefi. Na so yu e si yu brada nanga sisa? Yehovah e si ala san yu e du fu yepi den brada nanga sisa èn fu sori taki yu e broko yu ede nanga den èn a e warderi a muiti di yu e meki.​—Mat. 10:42.

17. San wi bosroiti fu du?

¹⁷ Wi lobi wi brada nanga sisa. Dati meki „wi teki a bosroiti fu no poti wan sani na pasi gi wi brada di kan meki a fadon” (Rom. 14:13). Wi e si den brada nanga sisa fu wi moro hei leki wisrefi èn wi wani gi den pardon nanga wi heri ati. Wi no wani meki den sani di trawan e taki noso du hati wi firi. Na presi fu dati, wi wani „du muiti fu libi bun nanga trawan èn fu du sani di e gi trawan deki-ati”.​—Rom. 14:19.