Wi alamala musu sorgu taki wánfasi de na ini a gemeente

Te wi de makandra nanga tra anbegiman fu Yehovah, dan wi e firi leki Kownu David di ben taki: „Luku o bun èn o switi a de te brada e libi makandra leki wán famiri!” (Psalm 133:1) Ma a wánfasi di wi abi no e kon fu ensrefi. Ibriwan fu wi musu sorgu taki wi no pori a wánfasi na ini a gemeente.

1. San na wan moi sani fu Gado pipel?

Te yu e go na wan konmakandra na ini wan tra kondre, dan kande yu no e frustan a tongo di den e taki. Ma toku yu e firi leki yu de na ini yu eigi gemeente. Fu san ede? Fu di awinsi pe yu e go, wi e gebroiki den srefi buku fu studeri Bijbel èn wi e du san wi man fu sori lobi gi makandra. Awinsi pe wi e libi, wi alamala e ’kari a nen fu Yehovah èn wi e dini en makandra leki wán man’.​—Sefanya 3:9.

2. San yu kan du fu sorgu taki wánfasi tan na ini a gemeente?

Bijbel e taki: „Un musu lobi makandra nanga un heri ati” (1 Petrus 1:22). Fa yu kan du san a tekst disi e taki? No luku den fowtu fu trawan, ma luku den bun fasi di den abi. No moksi soso nanga den sma di lobi den srefi sani di yu lobi, ma pruberi fu kon sabi brada nanga sisa di kweki tra fasi, di de fu wan tra ras noso wan tra kondre. Wi musu du ala muiti tu fu no desko nowan sma.​—Leisi 1 Petrus 2:17.a

3. San yu o du efu yu nanga wan tra brada noso sisa abi wan pikin trobi?

Wi abi wánfasi, ma wi na sondusma. Son leisi wi kan du sani di e hati trawan. Dati meki Gado Wortu e taigi wi fu ’tan gi makandra pardon’. A e taki tu: „Soleki fa Yehovah e gi unu pardon nanga en heri ati, na so un musu gi trawan pardon tu.” (Leisi Kolosesma 3:13.) Furu leisi wi e du sani di e hati Yehovah, ma toku a e gi wi pardon. Dati meki a wani taki wi gi wi brada nanga sisa pardon tu. Efu yu kon sabi taki yu hati wan sma firi, dan go na en fu meki en bun baka nanga en.​—Leisi Mateyus 5:23, 24.b

SORTU TRA SANI YU KAN LERI?

4. No desko trawan

Wi wani lobi ala den brada nanga sisa fu wi. Ma kande a muilek gi wi fu lobi wan sma di de tra fasi leki wi. San kan yepi wi? Leisi Tori fu den apostel 10:34, 35 èn taki fu den aksi disi:

• Yehovah e teki ala sortu sma leki en Kotoigi. Fu dati ede, fa wi musu si sma di de fu wan tra ras?

• Fa sma e desko trawan na ini a kondre pe yu e tan? Fu san ede yu no wani de leki den sma dati?

Leisi 2 Korentesma 6:11-13 èn taki fu na aksi disi:

• Fa yu kan kon abi moro lobi gi brada nanga sisa di de tra fasi leki yu?

5. Gi makandra pardon èn meki sani bun baka nanga makandra

Yehovah noiti e du wan sani fu hati wi, ma toku a de klariklari fu gi wi pardon te wi du wan sani di hati en. Leisi Psalm 86:5 èn taki fu den aksi disi:

• San a tekst disi e leri wi fu Yehovah?

• Fu san ede yu breiti taki Yehovah e gi sma pardon?

• San kan meki en muilek gi wi fu feni en nanga trawan?

Fa na eksempre fu Yehovah kan yepi wi fu abi wánfasi nanga wi brada nanga wi sisa? Leisi Odo 19:11 èn taki fu na aksi disi:

• Te wan sma e du wan sani di yu no lobi noso te a du wan hati sani nanga yu, dan san yu kan du fu meki sani go moro bun?

Son leisi wi e du sani di e hati sma firi. Te dati pasa, dan san wi musu du? Prei a FELEM èn taki fu na aksi disi:

FELEM: A e tyari wini kon te wi e meki en bun baka nanga trawan (6:01)

• San a sisa na ini a felem du fu meki en bun baka nanga a tra sisa?

6. Luku den bun fasi fu yu brada nanga sisa

Te wi e kon sabi den brada nanga sisa fu wi, dan wi e kon sabi den bun fasi nanga den swakifasi fu den. Fa wi kan poti moro prakseri na den bun fasi fu den? Prei a FELEM èn taki fu na aksi disi:

FELEM: Kon abi moro moi fasi! (5:10)

• San kan yepi yu fu si den bun fasi fu den brada nanga sisa?

Yehovah e luku den bun fasi fu wi. Leisi 2 Kroniki 16:9a èn taki fu na aksi disi:

• Fa yu feni en taki Yehovah e luku den bun fasi fu yu?

SAN YU LERI?

Yu kan sorgu taki wánfasi tan na ini a gemeente te yu e gi den brada nanga sisa pardon èn te yu e sori taki yu lobi den alamala.

Fa yu ben o piki den aksi disi?

• San o yepi yu fu no desko trawan?

• San yu o du efu yu nanga wan tra brada noso sisa abi wan pikin trobi?

• Fu san ede yu wani gi trawan pardon, neleki fa Yehovah e du dati?

TRA SANI DI YU KAN LUKU

Na ini a felem disi yu o si fa wan fu den agersitori fu Yesus o yepi wi fu no krutu trawan.

Puru a postu na ini yu ai (6:56)

Wi musu aksi pardon efu wi feni taki wi no du noti nanga wan sma?

„Wi sa man meki vrede nanga trawan te wi e aksi den pardon” (A Waktitoren, 1 november 2002)

Luku fa son sma leri fu no krutu trawan èn fu no luku nomo san ai e si.

Te yu e krutu sani, no luku nomo san yu e si nanga yu ai (5:06)

Efu yu nanga wan sma abi wan pikin trobi, dan san yu kan du fu no meki a tron wan bigi problema na ini a gemeente?

„Sori lobi te yu wani lusu wan trobi” (A Waktitoren, mei 2016)