WI MAN STOP BITA-ATI

2 | No pai ogri fu ogri

Bijbeltekst:

„Te wan sma du unu wan ogri, un no musu du a sma dati ogri baka. . . . Du ala san yu man fu libi bun nanga ala sma. No pai wan sma gi na ogri di a du nanga yu, . . . bika Gado buku taki: ’Na mi o puru atibron na den tapu. Mi o pai den baka gi den ogri di den du, na so Yehovah taki.’”—ROMESMA 12:17-19.

San a wani taki:

Leki libisma wi kan atibron te wan sma du wan hati sani nanga wi. Ma Gado no wani taki wi du wan hati sani baka nanga a sma. Na presi fu dati a e gi wi deki-ati fu wakti nanga pasensi, fu di a pramisi taki a o puru ala ogri.—Psalm 37:7, 10.

San yu kan du:

Te sondu libisma e pai ogri fu ogri, dan dati e meki taki moro bita-ati kon de. Fu dati ede efu wan sma du wan ogri nanga yu, no du ogri nanga en baka. Suku fu hori yusrefi èn no du ogri. Son leisi a moro bun fu libi a tori so (Odo 19:11). Ma son leisi yu abi fu du wan sani. Fu eksempre, efu sma du wan ogri-ati sani nanga yu, yu kan go suku yepi na skowtu.

Wi e kori wisrefi te wi e pai ogri fu ogri

Ma san yu kan du efu a problema no man lusu na wan rustig fasi? Noso efu yu du ala san yu man fu lusu a problema? No pai ogri fu ogri. Fu di dati kan meki a situwâsi kon moro ogri. Ma te yu hori yusrefi, dan dati o yepi fu no meki bita-ati tan gro. Leri fu frutrow tapu Gado taki a o lusu a problema. „Frutrow tapu en, dan ensrefi o yepi yu.”—Psalm 37:3-5.

Wan tori di pasa trutru—ADRIÁN

Leri fu no pai ogri fu ogri moro

Di Adrián ben yongu a ben lobi du ogri èn a ben e feti na strati. A e taki: „Mi nanga den mati fu mi ben gwenti feti nanga tra grupu èn wi ben e sutu makandra nanga gon. Wan tu leisi mi ben didon brudu na strati. Den ben libi mi fu dede.”

Adrián bigin studeer Bijbel di a ben abi 16 yari. A e taki: „O moro mi ben e studeri Bijbel, o moro mi kon si taki mi ben musu kenki den fasi fu mi.” A ben abi fu stop hori sma na ati èn fu du ogri. A sani di skrifi na Romesma 12:17-19 yepi en fu no pai ogri fu ogri moro. A e taki: „Mi bigin bribi taki Yehovah o tyari wan kaba kon na kruktudu na wan fasi di a feni bun èn na wan ten di a feni bun. Safrisafri mi leri fu no du ogri moro.”

Wan leisi wan tu yonguman fu wan tra ogri grupu kon feti nanga Adrián. A fesiman fu a grupu ben bari gi en: „Feti noh!” Adrián taki: „A ben muilek gi mi fu hori misrefi.” Ma na presi taki a du wan sani, a begi Yehovah èn a gowe fu drape.

Adrián e taki moro fara: „A tra dei mi miti a fesiman fu a grupu. A ben de en wawan. Mi ati bron so te, taki mi ben wani go feti nanga en, ma mi begi Yehovah baka na ini mi ati fu yepi mi fu hori misrefi. Mi skreki di a yonguman waka kon na mi tapu èn a taigi mi: „Sorry yèrè gi a sani di pasa esdeneti. Eigenlijk mi wani kon de leki yu. Mi wani studeri Bijbel.” Mi breiti srefisrefi taki mi ben man hori misrefi a neti na fesi! A sani disi meki taki a bigin studeri Bijbel.”