Aksi fu leisiman
San Yesus ben wani taki nanga den wortu: „No prakseri taki mi kon fu tyari freide”?
Yesus ben leri sma fu libi na ini freide nanga makandra. Ma wan leisi a taigi den disipel fu en: „No prakseri taki mi kon fu tyari freide na grontapu. Mi no kon fu tyari freide, ma mi kon fu tyari wan feti-owru. Bika mi kon fu tyari trobi na mindri wan man nanga en papa, na mindri wan umapikin nanga en mama, èn na mindri wan yongu wefi nanga a mama fu en masra” (Mat. 10:34, 35). San Yesus ben wani taki nanga den wortu disi?
Yesus no ben wani prati famiriman fu makandra, ma a ben sabi taki den sani di a ben leri sma ben o tyari pratifasi kon na ini son famiri. Fu dati ede, efu wan sma wani tron wan disipel fu Krestes èn a wani teki dopu, dan a musu frustan taki son famiriman no o breiti nanga a bosroiti fu en. Efu a trowpatna noso tra famiriman e gens en, dan a kan muilek gi en fu hori ensrefi na den leri fu Krestes.
Bijbel e gi Kresten a rai fu „libi bun nanga ala sma” (Rom. 12:18). Ma den leri fu Yesus kan de leki „wan feti-owru” na ini son osofamiri. Disi e pasa te wan memre fu wan osofamiri e bribi den leri fu Yesus, ma den trawan de teige den leri. Na so fasi den famiriman disi e meki densrefi tron „feanti” fu a sma di e kon leri sabi den tru tori fu Bijbel.—Mat. 10:36.
Disipel fu Krestes di e tan nanga famiri di abi wan tra bribi musu bosroiti son leisi efu den o du san Yehovah nanga Yesus lobi noso efu den o du san den famiri wani. Fu eksempre, famiriman di no de Kotoigi kan dwengi den fu teki prati na wan kerki fesadei. San den o du na ini so wan situwâsi? Yesus ben taki: „A sma di lobi en papa, noso en mama moro mi, no warti fu de mi disipel” (Mat. 10:37). Soleki fa wi kan frustan, Yesus no ben taki dati wan sma warti fu de wan disipel soso efu a e tapu fu sori lobi gi en papa nanga mama. Na presi fu dati, a ben leri den fu bosroiti san moro prenspari na ini den libi. Efu famiriman di no de Kotoigi e gens wi te wi e meki muiti fu anbegi Yehovah, dan wi e tan sori lobi gi den, ma wi e frustan taki wi musu lobi Gado moro.
A tru taki a e hati srefisrefi te famiri e gens wi. Ma toku disipel fu Yesus musu tan hori den wortu fu en na prakseri: „A sma di no wani teki en pinapostu èn di no e waka na mi baka, no warti fu de mi disipel” (Mat. 10:38). Nanga tra wortu, te Kresten e kisi problema fu famiri, dan den e si dati leki wan fu den tesi di e miti disipel fu Krestes, ma den de klariklari fu teki a pina dati. Na a srefi ten den e howpu taki a bun fasi fa den e tyari densrefi o yepi den famiriman disi fu kenki prakseri èn fu wani sabi moro fu Bijbel.—1 Petr. 3:1, 2.