Yu ben sabi a sani disi?

Na ini sortu asiwagi a heihei man fu Etiopia ben e rèi di Filipus go miti en?

A WORTU di vertaal nanga „asiwagi” na ini a Nyun-Grontapuvertaling, abi fu du nanga difrenti sortu asiwagi (Tori 8:28, 29, 38). Ma soleki fa a sori, dan na Etiopiaman ben rèi na ini wan asiwagi di bigi moro den pkin asiwagi di sma ben e gebroiki na ini feti noso fu hori streilon. Luku wan tu reide fu san ede wi kan taki dati.

Na Etiopiaman ben de wan heihei man di ben kmoto fu wan farawe presi. A man disi ben de „wan prenspari man di ben e wroko gi Kandase, na umakownu fu den Etiopiasma. A man disi ben e luku ala den gudu fu na umakownu disi” (Tori 8:27). A kontren fu na owruten Etiopia ben de fu Sudan te go miti a moro farawe pisi na zuidsei fu Egepte. A kan taki a man disi no ben rèi na ini a srefi asiwagi a heri pisi ten di a ben de na pasi. Ma a musu de so taki a ben abi furu bagasi nanga en fu di a ben de na pasi wan langa ten. Sonwan fu den asiwagi di sma ben e gebroiki na ini a ten dati fu tyari sma fu a wan presi go na a trawan, ben de asiwagi nanga fo wiel èn den ben tapu. Wan buku e taki: „Den sortu asiwagi disi ben abi moro presi fu poti lai, a ben moro switi fu rèi na ini den, èn kande sma ben man teki moro langa pasi nanga den.”​—Acts​—An Exegetical Commentary.

Na Etiopiaman ben e leisi di Filipus go miti en. A tori na ini Bijbel e taki dati „Filipus lon na sei na asiwagi” èn „a yere a man e leisi a buku fu a profeiti Yesaya nanga wan tranga sten” (Tori 8:30). Den asiwagi di sma ben e rèi te den ben e go na presi, no ben meki fu rèi tranga. Fu di na asiwagi no ben e rèi tranga, meki na Etiopiaman ben man leisi èn na so Filipus ben man lon go miti na asiwagi.

Na Etiopiaman „begi Filipus fu kren kon na tapu a wagi fu kon sidon na en sei” (Tori 8:31). Sma ben gwenti tnapu na ini den asiwagi di den ben e gebroiki fu hori streilon. Ma na ini den wagi di sma ben e gebroiki fu go na presi, nofo presi ben o de gi na Etiopiaman nanga Filipus fu sdon.

Te wi e luku san Tori fu den apostel kapitel 8 e taki èn te wi e luku tra sani di wi sabi fu a ten dati, dan den buku fu wi abi prenki fu na Etiopiaman di e rèi na ini wan moro bigi asiwagi, na presi fu wan pkin asiwagi di sma ben e gebroiki na ini feti noso te den ben e hori streilon.