Yu kan tan dini Yehovah awinsi yu e firi brokosaka

1. San na wan tu fu den blesi di wi e kisi fu di wi de na ini na organisâsi fu Yehovah?

NA INI den muilek lasti dei disi a de wan grani trutru fu de na ini na organisâsi fu Yehovah. A libi na ini a grontapu disi e kon moro muilek dei fu dei, ma Yehovah gi wi brada nanga sisa di kan yepi wi (Ps. 133:1). A e yepi wi fu abi wan koloku osofamiri-libi (Ef. 5:33–6:1). Èn te wi e broko wi ede, a e gi wi a koni di wi abi fanowdu fu sorgu taki wi no e lasi prisiri.

2. San wi musu du èn fu san ede?

² Ma aladi Yehovah e yepi wi, tòg wi musu du tranga muiti fu tan gi yesi na en. Fu san ede? Fu di den sani di trawan e taki èn e du kan hati wi son leisi. Kande wi e firi brokosaka tu te wi meki fowtu, spesrutu te wi e meki den fowtu dati ibri tron baka. Wi musu tan dini Yehovah (1) te wan brada noso wan sisa e du wan hati sani nanga wi, (2) te wi trowpatna e du wan sani di wi no lobi, èn (3) te wi e firi brokosaka fu di wi meki fowtu. Na ini na artikel disi wi o poti prakseri na ibriwan fu den situwâsi disi. Wi o luku tu san wi kan leri fu dri sma na ini Bijbel di tan gi yesi na Gado.

TAN DINI YEHOVAH TE WAN BRADA NOSO WAN SISA DU WAN HATI SANI NANGA YU

3. Sortu sani kan muilek gi a pipel fu Yehovah?

³ San kan de wan problema gi wi. Son brada nanga sisa abi fasi di wi no lobi. Tra brada noso sisa kande e du wan sani di wi no feni bun noso kande den e du wan hati sani nanga wi. Den brada di e teki fesi kan meki fowtu. Den situwâsi disi kan meki taki son sma e bigin tweifri efu disi na Gado en organisâsi. Na presi taki den e tan dini Gado „leki wán man” makandra nanga den brada nanga sisa fu den, a kan taki den no e bemui moro nanga den wan di du wan hati sani nanga den, noso kande den no e go moro na den konmakandra (Sef. 3:9). A sani dati na wan koni sani fu du? Luku san wi kan leri fu wan sma na ini Bijbel di ben kisi den srefi problema disi.

4. Sortu problema ben miti Paulus?

⁴ Wan eksempre na ini Bijbel. Na apostel Paulus ben sabi taki den Kresten brada nanga sisa fu en ben abi swakifasi. Fu eksempre, son sma na ini a gemeente na ini Yerusalem no ben e bribi taki a ben de wan disipel (Tori 9:26). Bakaten wan tu Kresten taki ogri fu en fu pori en nen (2 Kor. 10:10). Paulus ben si taki wan owruman ben du wan sani di no bun èn a sani dati ben kan meki trawan naki futu (Gal. 2:11, 12). Boiti dati, Markus, wan disipel di ben e wroko skinskin nanga Paulus, du wan sani di Paulus no ben lobi srefisrefi (Tori 15:37, 38). Paulus ben kan besroiti fu no moksi moro nanga den sma di ben du den sani disi nanga en. Ma a tan denki bun fu den brada nanga sisa fu en èn a tan dini Yehovah. San yepi Paulus fu horidoro?

5. San yepi Paulus fu tan moksi nanga den brada nanga sisa fu en? (Kolosesma 3:13, 14) (Luku a prenki.)

⁵ Paulus ben lobi den brada nanga sisa fu en. Dati meki a no tan poti prakseri na den swakifasi fu den, ma na den bun fasi fu den. Lobi yepi Paulus tu fu du san en srefi ben skrifi soleki fa wi kan leisi dati na Kolosesma 3:13, 14. (Leisi en.) Luku san Paulus du baka di Markus du wan sani di a no ben lobi. Aladi Markus gwe libi Paulus di a ben e teki a fosi zendeling waka fu en, tòg Paulus no tan mandi na en tapu. Bakaten di Paulus skrifi wan brifi gi a gemeente na ini Kolose fu prèise den Kresten drape, dan a skrifi taki Markus ben de wan wrokoman di a ben e warderi srefsrefi èn di ben ’trowstu en trutru’ (Kol. 4:10, 11). Di Paulus ben de na straf’oso na ini Rome, dan a aksi spesrutu taki Markus kon yepi en (2 Tim. 4:11). A de krin taki Paulus ben gi den brada nanga sisa fu en pardon èn taki a tan moksi nanga den. San wi kan leri fu Paulus?

6-7. Fa wi kan tan sori lobi gi wi brada nanga sisa awinsi den abi swakifasi? (1 Yohanes 4:7)

⁶ San disi e leri wi. Yehovah wani taki wi musu tan lobi wi brada nanga sisa. (Leisi 1 Yohanes 4:7.) Te wi brada nanga sisa du wan hati sani nanga wi, dan wi kan abi a fertrow taki den no du dati fu espresi èn taki den e pruberi fu du san Yehovah e ferwakti fu den (Odo 12:18). Gado lobi den getrow futuboi fu en awinsi den e meki fowtu. A no e drai baka gi wi te wi meki fowtu èn a no e tan mandi na wi tapu (Ps. 103:9). Wi de nanga tangi trutru taki Yehovah e gi wi pardon èn neleki en wi musu gi trawan pardon tu.​—Ef. 4:32–5:1.

⁷ Hori na prakseri tu taki a kaba e kon moro krosibei èn wi musu tan abi wan bun matifasi nanga wi brada nanga sisa. Wi kan ferwakti taki wi o kisi moro hebi ferfolgu. Kande den o poti wi na straf’oso fu di wi e anbegi Yehovah. Efu dati psa, dan wi o abi wi brada nanga sisa tranga fanowdu (Odo 17:17). Luku san ben miti Josepa, wan owruman na ini Spanyorokondre. En nanga tra brada ben de na straf’oso fu di den ben weigri fu go na ini a legre. A e taki: „Na straf’oso wi alamala ben e libi makandra, sobun, son leisi wi ben e du wan sani di wan trawan no ben lobi. Wi ben musu ferdrage makandra èn wi ben musu de klarklari fu gi makandra pardon. A sani disi yepi wi fu tan mati fu makandra. Èn wi ben e horbaka gi makandra so taki den tra strafuman di no ben e anbegi Yehovah no ben man du ogri nanga wi. Wan leisi mi anu ben de ini gips fu di mi ben kisi mankeri. Mi no ben man du son sani. Ma wan fu den tra brada wasi mi krosi èn a yepi mi tu nanga tra sani. Na ini a muilek situwâsi dati, mi si taki a ben lobi mi trutru.” Disi e sori krin taki nownow kba wi musu de gaw fu lusu iniwan trobi di wi abi nanga makandra.

TAN FERDRAGE YU TROWPATNA TE A E DU WAN SANI DI YU NO LOBI

8. San kan muilek gi trowpaar?

⁸ San kan de wan problema gi wi. Ala trowlibi abi den problema. Bijbel e taki krin taki sma di trow o „kisi banawtu na ini den libi” (1 Kor. 7:28). Fu san ede? Fu di wan masra nanga en wefi na sondu sma. Den no abi den srefi fasi èn den ala tu abi sani di den lobi èn di den no lobi. Son leisi wan masra nanga en wefi no de fu a srefi ras noso kulturu. Sobun, baka wan pisi ten, a masra noso a wefi kan bigin tyari ensrefi tra fasi leki fa a ben e du fosi a trow. Ibriwan fu den sani disi kan tyari problema kon. A kan taki den e gi makandra a fowtu fu den problema di den abi aladi den ala tu e meki fowtu. Na presi fu dati den musu wroko makandra fu lusu den problema disi. Kande den e prakseri srefi fu prati noso fu broko a trow. Ma den o lusu den problema fu den efu den prati noso efu den broko a trow?b Meki wi go luku san wi kan leri fu wan uma na ini Bijbel di ben tan gi yesi na Yehovah aladi a masra fu en ben meki a libi muilek gi en.

9. Sortu problema ben miti Abigayil?

⁹ Wan eksempre na ini Bijbel. Abigayil ben trow nanga Nabal. Bijbel e taki dati a man disi ben grofu èn a ben e libi takru nanga sma (1 Sam. 25:3). A ben musu fu muilek gi Abigayil fu libi nanga sowan man. A de so taki Abigayil ben abi na okasi fu broko trow? A ben kisi na okasi dati di David, a man di ben o tron kownu fu Israel, kon fu kiri a masra fu en fu di Nabal ben wiswasi en nanga den man fu en (1 Sam. 25:9-13). Abigayil ben kan lowe gwe, so taki David ben kan feni okasi fu kiri Nabal. Ma a no du dati. Na presi fu dati, a begi David fu no kiri Nabal (1 Sam. 25:23-27). Fu san ede a du dati?

10. San ben kan meki taki Abigayil tan nanga a masra fu en aladi a ben muilek srefsrefi gi en?

¹⁰ Abigayil ben lobi Yehovah èn a ben e lespeki a fasi fa Yehovah e si a trowlibi. A musu fu de so taki a ben sabi san Gado ben taki di a ben gi Adam wan wefi (Gen. 2:24). Abigayil ben sabi taki a trowlibi santa gi Yehovah. A ben wani meki Yehovah prisiri èn a sani dati ben gi en dek’ati fu du ala san a man fu kibri den sma di ben e tan na ini en oso, sosrefi a masra fu en. A no draidrai fu tapu pasi gi David so taki a no kiri Nabal. A ben de klar’klari tu fu aksi pardon gi wan ogri di en srefi no ben du. A de krin taki Yehovah ben lobi na uma disi di ben abi dek’ati èn di no ben e denki ensrefi nomo. San masra nanga wefi kan leri fu na eksempre fu Abigayil?

11. (a) San Yehovah e ferwakti fu sma di trow? (Efeisesma 5:33) (b) San yu leri fu a muiti di Carmen du fu meki a trowlibi fu en waka bun? (Luku a prenki.)

¹¹ San disi e leri wi. Yehovah wani taki sma di trow musu lespeki a trowlibi, awinsi a no makelek fu libi nanga a trowpatna fu den. Yehovah musu fu prisiri te a e si taki trowpaar e du ala san den man fu lusu den problema fu den èn fu sori lobi nanga lespeki gi makandra. (Leisi Efeisesma 5:33.) Luku na eksempre fu Carmen. Sowan siksi yari baka di a trow, a bigin studeri nanga Yehovah Kotoigi èn bakaten a dopu. A e taki: „Mi masra no ben lobi a sani dati. A ben e mandi taki mi ben e libi en na oso fu go na den konmakandra èn taki mi ben de nomonomo fu anbegi Yehovah. A ben e kosi mi èn a ben e taigi mi taki a o gwe libi mi.” Tòg Carmen tan nanga a masra fu en. Feifitenti yari langa a du tranga muiti fu sori lobi nanga lespeki gi a masra fu en. Carmen e taki moro fara: „Te fu kba mi leri fu ferstan moro bun fa mi masra ben e firi èn mi leri fu taki na wan lespeki fasi nanga en. Fu di mi sabi taki a trowlibi santa gi Yehovah, meki mi du ala san mi man fu sorgu taki wi abi wan bun trowlibi. Fu di mi lobi Yehovah, meki mi no pruberi noiti fu gwe libi mi masra.”c Efu problema e opo kon na ini a trowlibi fu yu, dan yu kan abi a fertrow taki Yehovah o yepi yu fu hordoro.

TAN DINI YEHOVAH TE YU E FIRI BROKOSAKA FU DI YU MEKI FOWTU

12. Fa wi ben kan firi te wi du wan seryusu sondu?

¹² San kan de wan problema gi wi. Te wi du wan seryusu sondu, dan kande wi e firi brokosaka trutru. Bijbel e taki dati den sondu fu wi kan meki wi firi „brokosaka”, èn wi kan „lasi-ati” (Ps. 51:17). Wan brada di nen Kenny ben du tranga muiti omeni yari langa fu doro den marki fu kan tron dinari ini a diniwroko. A tron dinari, ma baka wan pisi ten a du wan seryusu sondu. A kon si taki a ben meki Yehovah fesi fadon. A e taki: „Di mi kon ferstan san mi ben du, dan mi kisi hebi konsensi fonfon. Bakaten, mi no ben e firi bun kwetikweti. Mi krei èn mi begi Yehovah. Mi sabi ete taki mi ben e denki taki Yehovah noiti no o ben o arki den begi fu mi moro fu di mi ben meki en fesi fadon.” Efu wi du wan seryusu sondu, dan wi ben kan sari so te taki wi e bigin denki taki Yehovah gwe libi wi (Ps. 38:4). Efu na so yu ben e firi, dan poti prakseri na a eksempre fu wan getrow man na ini Bijbel di tan dini Yehovah aladi a ben du wan seryusu sondu.

13. Sortu seryusu sondu na apostel Petrus ben du èn san meki taki a du a sondu dati?

¹³ Wan eksempre na ini Bijbel. A neti fosi den kiri Yesus, na apostel Petrus ben meki wan tu fowtu èn leki bakapisi fu dati a du wan seryusu sondu. A fosi fowtu di Petrus ben meki, na taki a ben fertrow tumsi furu tapu ensrefi. A ben meki bigi taki a ben o tan horbaka gi Yesus, srefi efu den tra apostel ben gwe libi Yesus (Mark. 14:27-29). Wan tra fowtu di a meki, na taki di den ben de na ini a dyari fu Getseimanei, dan Petrus ben e fadon na sribi ibri leisi baka na presi taki a ben e hori wakti (Mark. 14:32, 37-41). Èn di wan grupu sma kon fu grabu Yesus, dan Petrus lon gwe libi en (Mark. 14:50). Te fu kba, Petrus taki dri leisi taki a no sabi Yesus èn a sweri srefi taki a no ben e lei (Mark. 14:66-71). San Petrus du di a kon ferstan taki a ben du wan seryusu sondu? En ai kon furu nanga watra èn a bari krei, kande na fu di en konsensi ben e fon en (Mark. 14:72). Prakseri fa a ben hati Petrus di den kiri en mati Yesus wan tu yuru baka dati. A ben musu fu firi leki a no warti noti.

14. San yepi Petrus fu tan dini Yehovah? (Luku a prenki.)

¹⁴ Difrenti sani de di yepi Petrus fu tan dini Yehovah go doro. A no hori ensrefi aparti fu trawan, ma a go na den tra disipel èn den trowstu en (Luk. 24:33). Èn baka di Yesus kisi wan opobaka, a sori ensrefi na Petrus, kande na fu di a ben wani gi en deki-ati (Luk. 24:34; 1 Kor. 15:5). Bakaten, Yesus no pir’ai gi Petrus fu den fowtu di a ben meki, ma na presi fu dati a taigi a mati fu en taki a ben o kisi moro bigi frantwortu (Yoh. 21:15-17). Petrus ben sabi taki a ben du wan seryusu sondu, ma tòg a tan du san bun. Fu san ede? Fu di a ben de seiker taki en Masra, Yesus, ben lobi en ete. Èn den Kresten brada nanga sisa fu Petrus tan horbaka gi en. San wi kan leri fu na eksempre fu Petrus?

15. Fu san wi musu de seiker? (Psalm 86:5; Romesma 8:38, 39) (Luku a prenki.)

¹⁵ San disi e leri wi. Yehovah wani taki wi musu de seiker taki a lobi wi èn taki a de klariklari fu gi wi pardon. (Leisi Psalm 86:5; Romesma 8:38, 39.) Te wi du wan sondu, dan wi e kisi konsensi fonfon. Na so a de nanga ala sma èn a sani dati fiti. Ma wi no musu denki taki a sondu fu wi bigi tumsi èn taki Yehovah no lobi wi moro, noso taki a no wani gi wi pardon. Na presi fu dati, wi musu suku yepi wantewante. Kenny di ben kari kba na ini a artikel disi, e taki: „Mi du wan sondu fu di mi ben e fertrow tumsi furu tapu misrefi.” Kenny kon si taki a ben musu taki nanga den owruman. A e taki: „Di mi du dati, dan den owruman yepi mi fu firi taki Yehovah lobi mi. Èn mi ben man firi taki den owruman lobi mi tu. Den yepi mi fu si taki Yehovah no ben gwe libi mi.” Wi kan abi a fertrow tu taki Yehovah lobi wi trutru. Wi kan de seiker taki a o gi wi pardon te wi e sori berow fu den sondu fu wi, te wi e suku a yepi di wi abi fanowdu, èn te wi e du ala muiti fu no meki den srefi fowtu baka (1 Yoh. 1:8, 9). Efu wi abi a fertrow taki Yehovah lobi wi èn taki a wani gi wi pardon, dan wi no o tapu fu dini en, awinsi wi meki wan fowtu.

16. Fu san ede yu o du ala san yu man fu tan dini Yehovah?

¹⁶ Yehovah e warderi a muiti di wi e du fu dini en na ini den muilek lasti dei disi. Fu di Yehovah e yepi wi, meki wi man tan dini en awinsi wi e firi brokosaka. Wi kan tan lobi wi brada nanga sisa èn wi kan gi den pardon srefi te den du wan hati sani nanga wi. Te problema opo kon na ini wi trowlibi, dan wi o du ala san wi man fu lusu den problema dati. Na so wi kan sori taki wi lobi Gado trutru èn taki wi e lespeki a trowlibi. Èn efu wi du wan sondu, wi kan suku yepi na Yehovah. Wi kan de seiker taki Yehovah lobi wi èn taki a de klarklari fu gi wi pardon. Dati meki wi musu tan dini en go doro. Wi kan de seiker taki wi o kisi furu blesi efu wi no e „tapu fu du san bun”.​—Gal. 6:9.