No draidrai fu teki dopu

1. San na wan tu bun reide fu teki dopu?

YU LOBI Yehovah Gado, a Gado di gi yu ibri bun kado, srefi a libi fu yu? Yu no wani sori en taki yu lobi en? A moro bun fasi fa yu kan du dati, na te yu e gi yusrefi abra na en èn e dopu. Te yu e teki dopu, dan yu e kon na ini a ini a bigi famiri fu Yehovah. Disi o meki taki yu P’pa di de sosrefi yu Mati, o sori yu san na a moro bun pasi fu waka èn a o sorgu gi yu fu di yu o de fu en (Ps. 73:24; Yes. 43:1, 2). Te yu gi yusrefi abra na en èn e dopu, dan yu o abi a howpu tu fu libi fu têgo.​—1 Petr. 3:21.

2. San wi o luku na ini na artikel disi?

² Wan sani e tapu yu fu teki dopu? Efu dati de so, dan yu no de yu w’wan. Milyunmilyun sma ben musu tyari bigi kenki kon na ini a fasi fa den ben e tyari densrefi èn na ini a fasi fa den ben e denki, soso fu man doro den marki fu teki dopu. Ma now den sma disi e prisiri fu dini Yehovah fayafaya. San yu kan leri fu sma di ben teki dopu na ini owruten?

DEN SAMARIASMA TEKI DOPU

3. Sortu kenki den Samariasma ben musu tyari kon kande fu man teki dopu?

³ Den Samariasma ben de wan kerkigrupu na ini a ten fu Yesus. Furu fu den sma disi ben e libi na a noordsei fu Yudea, krosbei fu den foto Sikem nanga Samaria. Fosi den Samariasma ben kan teki dopu, den ben musu poti bribi na ini a heri Wortu fu Gado èn den ben musu fiti den sani di skrifi na ini. Den Samariasma ben e si soso den fosi feifi buku fu Bijbel, Genesis te go miti Deuteronomium, leki buku di ben e kmoto fu Gado. A kan taki den ben e denki so tu fu a buku Yosua. Ma den Samariasma ben e ferwakti taki a Mesias ben o kon, fu di Gado ben pramisi dati na Deuteronomium 18:18, 19 (Yoh. 4:25). Fu man teki dopu, den ben musu bribi taki Yesus na a Mesias di Gado ben pramisi. Èn „furu fu den Samariasma” ben e bribi dati (Yoh. 4:39). Boiti dati, fu di furu fu den fosi Kresten ben de Dyu, meki son Samariasma ben musu kenki a fasi fa den ben e denki fu den sma dati.​—Luk. 9:52-54.

4. Soleki fa Tori fu den apostel 8:5, 6, 14 e sori, dan san ben de a bakapisi di Filipus preiki gi den Samariasma?

⁴ San yepi den Samariasma fu teki dopu? Di a preikiman Filipus ferteri den Samariasma „fu Krestes”, dan sonwan fu den „teki a wortu fu Gado”. (Leisi Tori fu den apostel 8:5, 6, 14.) Aladi Filipus ben de wan Dyu, tòg den arki en. Kande den ben e memre den Bijbeltekst di ben e taki dati Gado no lobi a wan sma moro a trawan (Deut. 10:17-19). Awinsi fa a no fa, den „ben e poti prakseri na den sani di Filipus ben e taki” fu a Krestes èn den kon si krin taki na Gado ben seni Filipus kon na den. Boiti dati, a preikiman disi ben e du furu wondru. A dresi den sikiwan èn a puru ogri yeye na sma tapu.​—Tori 8:7.

5. San yu kan leri fu den Samariasma?

⁵ Den Samariasma dati ben kan weigri fu arki Filipus fu di a ben de wan Dyu, noso fu di noiti ete den ben yere den sani di a ben e leri den. Ma dati no psa. Di den Samariasma ben de seiker taki Filipus ben leri den a waarheid, dan den no draidrai fu teki dopu. Bijbel e taki: „Di Filipus ferteri den a bun nyunsu fu a Kownukondre fu Gado èn fu a nen fu Yesus Krestes, dan den bribi en èn mansma nanga umasma ben e dopu” (Tori 8:12). Yu e bribi taki Gado Wortu na waarheid? Yu e bribi taki Yehovah Kotoigi leri fu sori a lobi di Yesus ben taki dati den trutru bakaman fu en ben o sori? (Yoh. 13:35) Dan no frede fu teki dopu. Yu kan de seiker taki Yehovah o blesi yu.

6. San yu kan leri fu na eksempre fu Ruben?

⁶ Ruben, di e libi na ini Doisrikondre, kweki leki Kotoigi. Ma di a ben yongu, dan a ben e tweifri efu wan Gado de trutru. San yepi en fu no tweifri moro? Di a kon si taki a no ben sabi nofo fu Gado, dan a besroiti fu kon leri sabi en moro bun. A ben taki: „Mi ondrosuku sani moro fini fu kon sabi san tru. Mi ben musu ondrosuku na evolutie-leri difrenti leisi.” Ruben leisi a buku Wan Mekiman de di e broko en ede nanga yu? A buku dati yepi en fu tranga a bribi fu en na ini Gado. A ben e prakseri na ensrefi: ’Boi! Yehovah de trutru!’ Èn di a go luku na edekantoro fu na organisâsi, dan a bigin warderi a wánfasi di de na mindri ala den brada nanga sisa fu wi na heri grontapu. Di a drai go baka na Doisrikondre, dan a teki dopu di a ben abi 17 yari. Efu yu e tweifri efu den sani di yu leri tru, dan ondrosuku sani moro fini na ini den buku fu wi. Te yu e kon sabi sani finfini, dan dati kan yepi yu fu no tweifri moro (Ef. 4:13, 14). Te yu e yere den ondrofenitori fu a lobi nanga a wánfasi di de na mindri a pipel fu Yehovah na tra kondre, èn te yu e si krin beweisi fu dati na ini yu eigi gemeente, dan yu o kon abi moro lobi gi na organisâsi fu wi.

SAULUS FU TARSUS TEKI DOPU

7. Fu san ede Saulus ben musu kenki a denki fu en?

⁷ Luku na eksempre fu Saulus fu Tarsus. A ben sabi a Dyu wet heri bun, èn den Dyu ben e si en leki wan prenspari sma (Gal. 1:13, 14; Fil. 3:5). Na a ten dati, furu Dyu ben e bribi taki Kresten ben de sma di ben drai baka gi a Dyu bribi. Dati meki Saulus ben e ferfolgu den Kresten disi fayafaya. A ben e denki taki a ben e du a wani fu Gado, ma dati no ben de so (Tori 8:3; 9:1, 2; 26:9-11). Efu Saulus ben o poti bribi na ini Yesus èn tron wan dopu Kresten, dan en srefi ben musu ferwakti taki sma ben o ferfolgu en tu.

8. (a) San yepi Saulus fu teki dopu? (b) Fa Ananias yepi Saulus, soleki fa Tori fu den apostel 22:12-16 e sori? (Luku a prenki.)

⁸ San yepi Saulus fu teki dopu? Di Yesus taki nanga Saulus kmoto fu hemel, dan wan leti di ben kmoto fu hemel breni en (Tori 9:3-9). Dri dei langa Saulus no nyan èn a musu de so taki a denki dipi fu a sani di psa nanga en. Iya, Saulus ben de seiker now taki Yesus ben de a Mesias èn taki den bakaman fu en ben abi a tru bribi. Saulus ben musu fu sari taki a ben gi pasi taki sma kiri Stefanus (Tori 22:20). Na a kba fu den dri dei, wan disipel di nen Ananias kon na Saulus, a meki a si baka, èn a gi en dek’ati fu dopu wantewante. (Leisi Tori fu den apostel 22:12-16.) Saulus sori sakafasi, a arki Ananias, èn a teki dopu.​—Tori 9:17, 18.

9. San wi kan leri fu Saulus?

⁹ Wi kan leri wan tu sani fu Saulus. Efu a ben abi heimemre noso a efu a ben e frede libisma, dan dati ben kan tapu en fu teki dopu. Ma a no gi pasi taki dati psa. Saulus ben abi sakafasi èn a ben de klarklari fu kenki en libi fu man tron wan bakaman fu Krestes (Tori 26:14, 19). Saulus ben de klarklari fu tron wan Kresten aladi a ben sabi taki sma ben o ferfolgu en (Tori 9:15, 16; 20:22, 23). Baka di a teki dopu, a tan abi a fertrow taki Yehovah ben o yepi en fu hordoro te a ben o kisi tesi (2 Kor. 4:7-10). Te yu teki dopu fu tron wan Yehovah Kotoigi, dan a kan taki yu o kisi tesi noso taki sma o gens yu. Ma yu kan de seiker taki Gado nanga Krestes ala ten o gi yu a yepi di yu abi fanowdu fu hordoro èn fu tan getrow.​—Fil. 4:13.

10. San yu e leri fu na eksempre fu Anna?

¹⁰ Anna kweki na ini wan Koerdis famiri na ini Owstu-Europa. Baka di en m’ma teki dopu, dan Anna bigin studeri Bijbel di a ben abi neigi yari, èn en p’pa ben feni dati bun. Ma den tra famiriman fu Anna di ben e libi makandra nanga Anna en osofamiri, no ben e agri nanga a sani dati. Den famiriman ben feni taki a ben de wan syen gi a famiri te wan fu den ben e drai baka gi a bribi fu den afo fu den. Di Anna ben abi 12 yari, dan a aksi en p’pa primisi fu teki dopu. En p’pa ben wani sabi efu na Anna srefi ben wani dati, noso efu na sma ben e dwengi en fu dopu. Anna piki en: „Mi lobi Yehovah.” A sani disi meki taki Anna en p’pa gi en primisi fu teki dopu. Bakaten, sma bigi spotu Anna èn den ben e libi takru nanga en. Wan fu den famiriman fu en taigi en: „Moro betre yu ben e libi wan yayolibi èn yu ben e smoko, leki fu de wan Yehovah Kotoigi.” Fa Anna psa den tesi disi? A taki: „Yehovah yepi mi fu no las’ati, èn mi p’pa nanga m’ma yepi mi furu.” Anna abi wan lijst pe a skrifi ala den leisi di a si fa Yehovah yepi en. A e luku a lijst dati ten na ten, so taki a no e fergiti fa Yehovah e horbaka gi en. Efu yu e frede taki sma o ferfolgu yu, dan hori na prakseri taki Yehovah o yepi yu tu.​—Hebr. 13:6.

KORNELIUS TEKI DOPU

11. Fu san ede Kornelius ben kan tweifri fu teki dopu?

¹¹ Bijbel e taki tu fu na eksempre fu Kornelius. A ben de wan „legre-ofsiri” na ini a legre fu Rome. Dati wani taki dati a ben de wan edeman fu wan grupu fu 100 srudati (Tori 10:1). Fu di a ben abi a posisi disi, meki a ben de wan prenspari man na ini a libimakandra èn na ini a legre. A „ben e du bun gi pôtisma” (Tori 10:2). Yehovah seni na apostel Petrus fu go preiki a bun nyunsu gi en. A de so taki Kornelius ben e tweifri fu teki dopu fu di a ben de wan prenspari man?

12. San yepi Kornelius fu teki dopu?

¹² San yepi Kornelius fu teki dopu? Bijbel e taki dati „en nanga ala den sma na ini en oso ben e anbegi Gado”. Boiti dati, Kornelius ben gwenti begi Gado (Tori 10:2). Di Petrus meki Kornelius kon sabi a bun nyunsu, dan en nanga en famiri poti bribi na ini Krestes èn den teki dopu wantewante (Tori 10:47, 48). A no de fu taki, dati Kornelius ben de klarklari fu tyari iniwan kenki kon di ben de fanowdu fu man anbegi Yehovah makandra nanga en famiri.​—Yos. 24:15; Tori 10:24, 33.

13. San yu kan leri fu Kornelius?

¹³ Neleki Saulus, Kornelius ben kan feni taki a no ben o man tron wan Kresten fu di a ben de wan prenspari sma. Ma a no gi pasi taki dati psa. Yu o abi fu tyari bigi kenki kon na ini yu libi fu man teki dopu? Efu dati de so, dan Yehovah o de yu Yepiman. A o blesi yu efu yu e du ala san yu man fu fiti Bijbel gronprakseri na ini yu libi so taki yu kan tron wan anbegiman fu en.

14. San yu e leri fu na eksempre fu Tsuyoshi?

¹⁴ Tsuyoshi di de fu Yapan, ben o abi fu tyari kenki kon efu a ben wani dopu. A ben e wroko makandra nanga na edeman fu wan prenspari skoro pe sma ben e leri fa fu seti bromki. Na edeman ben gwenti fu seti bromki gi den beri fu sma, èn te a ben de na den beri, dan a ben e teki prati na den kerkigwenti fu den Budasma. Ma te a no ben man go na den beri, dan Tsuyoshi ben e teki presi gi en. Ma di Tsuyoshi kon sabi san Bijbel e leri fu den dedewan, dan a ben sabi taki a no ben o man teki dopu efu a ben e tan teki prati na den kerkigwenti disi. A besroiti fu no teki prati na den sani dati moro (2 Kor. 6:15, 16). Tsuyoshi ferteri na edeman san a ben besroiti. San ben de a bakapisi? Tsuyoshi ben mag tan du a wroko fu en, sondro taki a ben abi fu teki prati na den Buda kerkigwenti. A teki dopu wán yari baka di a ben bigin studeri Bijbel.a Kande yu musu tyari kenki kon tu te a abi fu du nanga a wroko fu yu. Efu yu e du dati fu di yu wani dini Gado, dan yu kan de seiker taki a o sorgu gi san yu nanga yu famiri abi fanowdu.​—Ps. 127:2; Mat. 6:33.

DEN KORENTESMA TEKI DOPU

15. San ben kan tapu den Korentesma fu teki dopu?

¹⁵ Den sma di ben e libi na ini na owruten foto Korente, ben lobi fu feti baka gudu èn den ben e libi wan yayolibi. Furu fu den sma drape ben e du sani di Gado no feni bun. A de krin taki a ben o muilek gi den sma fu a foto disi fu bigin dini Yehovah. Ma di na apostel Paulus go na a foto dati èn a preiki a bun nyunsu fu a Krestes, dan tòg „furu fu den Korentesma di ben arki Paulus bigin bribi èn den dopu” (Tori 18:7-11). Ne Masra Yesus Krestes taigi Paulus na ini wan fisyun: „Mi abi furu sma na ini a foto disi ete”. Dati meki Paulus tan preiki drape wán nanga afu yari langa.

16. San yepi son sma na ini Korente fu teki dopu? (2 Korentesma 10:4, 5)

¹⁶ San yepi den Korentesma fu teki dopu? (Leisi 2 Korentesma 10:4, 5.) Gado en Wortu nanga a makti santa yeye fu en yepi den fu tyari bigi kenki kon na ini den libi (Hebr. 4:12). Den sma fu Korente di ben e poti bribi na ini a bun nyunsu fu Krestes ben man tapu nanga sani di Gado no feni bun. Den tapu fu dringi sopi teleki den drungu, den tapu nanga fufuru, èn den tapu nanga a homo-libi.​—1 Kor. 6:9-11.b

17. San yu e leri fu den Korentesma?

¹⁷ A moi fu si taki aladi son sma na ini Korente ben musu tyari bigi kenki kon, tòg den no ben e denki taki a ben o muilek tumsi gi den fu tron Kresten. Den du tranga muiti fu kon na tapu a smara pasi di e tyari sma go na têgo libi (Mat. 7:13, 14). Yu e du tranga muiti fu tapu nanga wan takru gwenti noso nanga wan sani di no bun so taki yu kan teki dopu? Noiti no gi abra. Begi Yehovah fu gi yu en santa yeye fu yepi yu fu dwengi yusrefi te yu e firi fu du sani di no bun.

18. San yu e leri fu na eksempre fu Monika?

¹⁸ Monika di e libi na ini Georgia, meki tranga muiti fu no taki dot’taki moro èn fu no luku felem noso arki poku di no bun. A du disi fu di a ben wani dopu. A e taki: „Fosi mi dopu, mi begi Yehovah fu gi mi a krakti fu tyari den kenki kon di ben de fanowdu. Yehovah ben sabi taki mi ben wani du san bun, èn ala ten a ben e yepi mi èn a ben e sori mi a yoisti pasi.” Monika dopu di a ben abi 16 yari. Yu musu tapu nanga son sani fu man dini Yehovah na a fasi di a feni bun? Tan aksi en fu gi yu a krakti di yu abi fanowdu fu tyari kenki kon. Yehovah de klarklari fu gi yu a santa yeye fu en.​—Yoh. 3:34.

A BRIBI FU YU KAN DU BIGI SANI

19. San kan yepi yu fu psa bigi problema? (Luku a prenki.)

¹⁹ Yu kan bribi taki Yehovah lobi yu èn taki a wani taki yu kon na ini a bigi famiri fu en, awinsi sortu problema e meki en muilek gi yu fu teki dopu. Yesus ben taigi wan grupu fu den fosi disipel fu en: „Efu a bribi fu unu pikin leki wan mosterd-siri, dan unu o man taigi a bergi disi: ’Opo fu dya go drape’, èn a bergi o opo ensrefi go drape. Noti sa de di unu no man du” (Mat. 17:20). Den sma di ben de drape fu yere san Yesus taki, ben e waka nanga Yesus wan tu yari nomo, sobun a bribi fu den no ben tranga so ete. Ma Yesus pramisi den taki efu den ben abi nofo bribi, dan Yehovah ben o yepi den fu psa problema di ben de leki bigi bergi. Èn yu kan de seiker taki Yehovah o yepi yu fu du a srefi.

20. San yu leri fu den fosi Kresten èn fu den Kresten fu a ten disi di kari na ini na artikel disi?

²⁰ Efu wan sani de di e tapu yu fu teki dopu, dan no draidrai fu puru a problema dati na pasi. Meki na eksempre fu den fosi Kresten èn a di fu den Kresten fu a ten disi trowstu yu èn gi yu krakti. Meki den besroiti di den teki de wan dek’ati gi yu èn meki den yepi yu fu gi yusrefi abra na Yehovah èn fu teki dopu. Dati na a moro bun besroiti di yu ben kan teki na ini yu libi.